Buku Lakuti Lovwire Ŵawukirano Kukumbuka Mlengi Wawo

PAFUPIFUPI vilimika 3,000 ivyo vyajumpha, munthu wavinjeru Solomoni wakalemba kuti: “Kumbuka Mlengi wako apo ucali mwanici.” (Muph. 12:1, Today’s English Version) Ŵawukirano awo Mbakhristu, sono ŵali na buku ilo lingaŵawovwira kucita ntheura. Buku laciŵiri la Mayankho a Zimene Achimanyata Amafunsa, likafumiskika pa Ungano wa Cigaŵa wa Ŵakaboni ŵa Yehova wa mutu wakuti, “Kulongozgeka na Mzimu wa Ciuta,” uwo ukacitika pa caru cose capasi kwamba mu Meyi 2008 mpaka Janyuwale 2009.

Ku cikopi cakwamba ca buku ili, kuli kalata yakufuma ku Wupu Wakulongozga kuya ku ŵawukirano. Mu kalata iyi muli mazgu ghakuti: “Tikupempherera kuti mfundo zimene zili m’buku lino zikuthandizeni polimbana ndi mayesero amene achimanyata ambiri amakumana nawo ndiponso kuti muzichita zinthu zogwirizana ndi zimene Mulungu amafuna.”

Mupapi waliyose ŵakukhumba kulera ŵana ŵake “mu kulanga na kuŵasambizga maghanoghano gha Yehova” ndipo ici nchakwenelera. (Efe. 6:4) Ndipouli, para ŵana ŵafika pa uwukirano, ŵanandi ŵakujikayikira ndipo ŵakukhumba comene kulongozgeka. Usange muli na mwana uyo ni muwukirano, kasi mungamovwira wuli kuti wasange candulo na buku ili? Wonani masacizgo agha.

▪ Namwe ŵani na buku linu ndipo limanyani makora. Kulimanya makora nkhuliŵazga waka yayi. Yezgani kuwona umo fundo zake zalembekera. M’malo mwa kuphalira waka ŵawukirano ico nchakwenelera na ico nchakubudika, buku ili likusambizga “nkhongono zawo zakamanyiro.” (Heb. 5:14) Liliso na masacizgo ghakovwira umo ŵangacitira ico nchakwenelera. Mwaciyelezgero, Cipaturo 15 (“Kodi Ndingapewe Bwanji Kutengera Zochita za Anzanga?”) cikulongosora vinandi m’malo mwa kuphalira waka ŵawukirano kuti ŵakanenge ivyo ŵanyawo ŵakucita. Cikulongosora umo Baibolo lingaŵawovwilira kumazga masuzgo na umo ‘ŵangazgolera waliyose’ uyo waŵafumba cigomezgo cawo.—Kol. 4:6.

▪ Gwiliskirani nchito vigaŵa vya buku ili ivyo vikukhuŵilizga kudumbiskana. Nangauli vigaŵa ivi vili kulembekera ŵawukirano, namwe mungacita makora kulembamo mu buku linu apo mphakwenelera?a Mwaciyelezgero, para mukudumbiskana mafumbo ghaŵiri ghakuyowoya za cibwezi pa peji 16, kumbukani umo imwe mukajipulikiranga apo mukaŵa pa msinkhu wa mwana winu. Cingaŵa ciwemi kulembapo mazgoro pa mipata iyo yapelekeka, agho mukatenge muzgorenge pa nyengo iyo. Kufuma apo, mungajifumba kuti: ‘Kasi maghanoghano ghane pa nkhani iyi ghasintha wuli kuzakafika sono? Kasi ni vinthu wuli ivyo nasambira kufuma pa uwukirano wane, ndipo ningacita wuli kuti mwana wane nayo nimusambizgeko?’

▪ Kuwonamo yayi ivyo walemba. Vigaŵa vya buku ili vyakukhuŵilizga kudumbiskana vili kulembeka kuti mwana winu walembemo maghanoghano ghake pa nkhani iyo. Cilato cinu nchakuti mumanye ivyo vili mu mtima wake, ivyo vili mu buku lake yayi. Pa peji 3 pa mutu wakuti “Makolo Dziwani Izi,” pali fundo yakuti: “Kuti ana anu alembe zakukhosi kwawo m’bukuli, musamaone zimene alemba. Anawo akafuna angathe kukusonyezani okha zimene alembazo.”

Buku Lakovwira pa Nyengo ya Kusopera ya Mbumba

Buku laciŵiri, la Mayankho a Zimene Achinyamata Amafunsa, ndiwemi comene kusambira pa Nyengo Yakusopera ya Mbumba. Pakuti buku ili lilije mafumbo pa ndime yiliyose, kasi mungacita wuli pakusambira? Cingaŵa ciwemi kusambira mu nthowa iyo mukuwona kuti yingaŵa yakovwira comene ku ŵana ŵinu?

Mwaciyelezgero, mbumba zinyake zingatemwa kuyezgelera para zikudumbiskana cigaŵa cakuti, “Mmene Mungakonzekerere” pa peji 132 na 133. Fumbo lakwamba pa cigaŵa ici lingawovwira mwana winu kumanya nkhani iyo wakuwona kuti njakusuzga comene. Fumbo laciŵiri likuyowoya za malo agho ivi vingacitikira. Para mwana winu waghanaghanirapo ivyo vingacitika para wangacita ivyo ŵanyake ŵakukhumba, iyo wakupempheka kuti wanozgekerethu umo wangazgolera. Wovwirani mwana winu kuti wacitenge vinthu mwamahara, na kumusambizga umo wangazgolera ŵanyake mwakupulikikwa makora ndiposo mwacikanga.—Sal. 119:46.

Buku Lakovwira Kudumbiskana

Buku laciŵiri la Mayankho a Zimene Achinyamata Amafunsa, likukhuŵilizga ŵawukirano kuti ŵadumbiskanenge na ŵapapi ŵawo. Mwaciyelezgero, mabokosi ghakuti, “Kodi Ndingafunse Bwanji Bambo Kapena Mayi Anga Nkhani Zokhuza Kugonana?” (peji 63-64) na “Kambiranani ndi Makolo Anu!” (peji 189) muli masacizgo ghakwambira kudumbiskana nkhani izo ni zakusuzga kuyowoya. Msungwana munyake wa vilimika 13 wakalemba kuti, “Buku ili likanovwira kuti nileke kopa kuphalira ŵapapi ŵane vinthu ivyo vikaŵa mu mtima wane, kweniso ivyo nkhacita.”

Buku ili likukhuŵilizga kudumbiskana mu nthowa zinyakeso. Paumaliro wa cipaturo cilicose pali kabokosi kakuti, “Mukuganiza Bwanji?” Kabokosi aka kakovwira kuweleramo kweniso kangamovwirani kudumbiskana na mbumba yinu. Kuumaliro wa cipaturo cilicose kuli kabokosi kakuti “Zoti Ndichite!” Bokosi ili likuŵapa mwaŵi ŵawukirano kulembamo nthowa izo ŵangalondezgera ivyo ŵasambira mu cipaturo ico. Fundo yaumaliro pa cigaŵa cakuti “Zoti Ndichite!” yikuti: “Zimene ndikufuna kufunsa makolo anga pankhaniyi ndi izi . . . ” Fundo iyi yingawovwira ŵawukirano kuti ŵafumbenge ŵapapi ŵawo ulongozgi uwo ungaŵawovwira.

Conthani Mtima

Pakuŵa mupapi, cilato cinu nchakuti muconthe mtima wa mwana winu. Buku laciŵiri la Mayankho a Zimene Achinyamata Amafunsa, lingamovwirani kucita ntheura. Wonani umo buku ili likawovwilira dada munyake kuti wadumbiskanenge mwakufwatuka na mwana wake msungwana.

Dada uyu wakati: “Rebekah na ine tikutemwa kuluta ku malo ghanyake ghawemi pa njinga, pasi, panji pa galimoto. Ku malo agha nkhuwona kuti wakufwatuka comene kuyowoya vya kusingo kwake.

“Cigaŵa cakwamba ico tikadumbiskana mu buku ili ni kalata yakufuma ku Wupu Wakulongozga, na ‘Makolo Dziwani Izi.’ Nkhakhumbanga kuti mwana wane wamanye kuti nga umo vyayowoyekera pa peji 3, waŵe wakufwatuka kulemba ivyo wakhumba mu buku lake. Nkhalaŵiskangamo yayi mu buku lake kuti niwone ivyo walemba.

“Nkhamupanga mwaŵi Rebekah kuti wasorenge vipaturo vya nkhani izo tingadumbiskana na kuyowoya ndondomeko iyo tingadumbiskirana. Cimoza mwa vipaturo ivyo wakasora ni ‘Kodi Ndiyenera Kuchita Masewera a Pakompyuta?’ Nkhaghanaghanapo yayi kuti wangasora cipaturo ici. Ndipouli, pakaŵa cifukwa ico wakasolera cipaturo ici. Ŵabwezi ŵake ŵanandi ŵakaseŵeranga seŵero linyake liheni comene. Nkhamanyanga yayi vithuzithuzi vyambembe na vinthu viheni ivyo vikayowoyekanga mu seŵero ili. Kweni vyose ivi vikavumbukwa apo tikadumbiskananga cigaŵa cakuti, “Zoti Ndichite!” pa peji 251. Bokosi ili likawovwiraso Rebekah kuti wamanyenge ico wangayowoya para ŵanyake ŵakumucicizga kuti waseŵere seŵero ili.

“Pa nyengo yasono, Rebekah wakufwatuka kuniphalira ivyo walemba mu buku lake. Para tikusambira tikudumbiskana makora. Tikupokerana pakuŵazga ndipo wakunweka kulongosora vyose, vithuzithuzi na mabokosi wuwo. Ici cikunipa mwaŵi kuti nimuphalire umo vinthu vikaŵira kwa ine apo nkhaŵa nga ndiyo, ndipo nayo wakuniphalira umo vinthu viliri mazuŵa ghano. Palije ico wakunibisira.”

Usange ndimwe mupapi, tikukayika yayi kuti mukakondwa kupokera buku ili. Sono muli na mwaŵi wakuti muligwiliskire nchito. Wupu Wakulongozga ukugomezga kuti buku laciŵiri la Mayankho a Zimene Achinyamata Amafunsa, liŵenge thumbiko ku mbumba yinu. Mphanyi lawovwira wose, comenecomene ŵawukirano ŵithu ŵakutemweka, kuti ‘ŵalutilire kwenda mwa mzimu.’—Gal. 5:16.

[Mazgu ghamusi]

[Bokosi pa peji 30]

Ivyo Ŵawukirano Ŵanyake Ŵakuyowoya

“Buku ili ndakuti munthu wakhalenge nalo pasi, na kuliŵazga mwakughanaghanirapo. Pakuti lili nga ni dayare likupeleka mwaŵi wakuti munthu walangulukenge payekha, na kusankha viwemi ivyo wangacita mu umoyo wake.”—Nicola.

“Ŵanthu ŵanandi ŵakunicicizga kuti niŵe na cibwezi, ŵanji awo ŵakunicicizga ni ŵanthu awo ŵakuwoneka nga mbamahara. Cigaŵa cakwamba ca buku ili cikanovwira kumanya kuti nanga munthu wangayowoya wuli, nili wakunozgeka cara kuŵa na cibwezi.”—Katrina.

“Bokosi lakuti ‘Kodi Mukufuna Kubatizidwa?’ lanovwira kuwona kuti nchakuzirwa comene kubapatizika. Lanovwira kuti nisandeso umo nkhusambilira na kulombera.”—Ashley.

“Nangauli ŵapapi ŵane awo Mbakhristu ŵanisambizga kwambira pa wanici, buku ili lanovwira kuti nighanaghanirenge ivyo ningacita mu umoyo wane. Lanovwiraso kuti nifwatukenge comene na ŵapapi ŵane.”—Zamira.

[Cithuzithuzi pa peji 31]

Mwaŵapapi, limanyani makora buku ili

[Cithuzithuzi pa peji 32]

Conthani mtima wa mwana winu