“Ungopanga, Ndine Tindikovwire”

YESU wakacenjezga ŵalondezgi ŵake kuti: “Dyabulosi walutilirenge kuponya ŵanji ŵa imwe mu gadi kuti muyezgeke fikepo.” Kweni pambere wandayowoye cenjezgo ili, Yesu wakati: “Ungopanga cara vinthu ivyo uli pafupi kusuzgika navyo.” Pakuti Satana walutilirenge kofya Ŵakhristu mwa kuŵaponya mu gadi kuti ŵaleke kupharazga Ufumu, nchakuwonekerathu kuti maboma ghanyake ghayuzgenge Ŵakhristu ŵaunenesko. (Uvu. 2:10; 12:17) Ntheura, kasi nchivici cingatovwira kuti tiŵe ŵakunozgekera mauryarya gha Satana ndiposo kuti tileke ‘kopa’ nga umo Yesu wakayowoyera?

Mbunenesko kuti nyengo zinyake tikuŵa na wofi. Ndipouli, Mazgu gha Ciuta ghakutisimikizgira kuti tileke kopa, cifukwa Yehova watovwirenge. Kasi wakutovwira wuli? Nthowa yimoza iyo wakutovwilira njakuti wakutilongora njomba izo Satana na awo ŵakumulondezga ŵakucita. (2 Kor. 2:11) Kuti tipulikiske fundo iyi, tiwonenge nkhani yinyake ya mu Baibolo. Tiwonengeso umo Ŵakhristu ŵanji ŵakacitira kuti ‘ŵachinthe pakwimikana na mauryarya gha Dyabulosi.’—Efe. 6:11-13.

Themba Lankhaza Likawukira Themba Lakopa Ciuta

Mu nyengo yakale, themba lankhaza Senakeribu likathereska mitundu yinandi mwa kulondezgana waka. Cifukwa ca kutonda uku, Senakeribu wakakhumbangaso kuthereska ŵanthu ŵa Yehova na kupoka msumba wawo wa Yerusalemu. Pa nyengo iyi Hezekiya, uyo wakaŵa munthu wakopa Ciuta ndiyo wakawusanga Yuda. (2 Mathe. 18:1-3, 13) Nchakuwonekerathu kuti Satana ndiyo wakakhuŵilizga Senakeribu na cilato cakuti wamazge kusopa kwaunenesko pa caru capasi.—Gen. 3:15.

Senakeribu wakatuma mathenga kuti ghakaphalire ŵanthu ŵa mu Yerusalemu kuti ŵathere ŵekha. Yumoza wa ŵanthu aŵa wakaŵa Rabsheke, uyo wakaŵa muyowoyeri mulara wa themba.a (2 Mathe. 18:17) Rabsheke wakakhumbanga kofya Ŵayuda na cilato cakuti ŵathere na mazgu pera. Kasi Rabsheke wakacita wuli kuti watenthemeske mitima ya Ŵayuda?

Ŵakagomezgeka Nangauli Ŵakaŵapatura

Rabsheke wakaphalira ŵanthu awo ŵakatumika na Hezekiya kuti: “Themba likuru, themba la [Asiriya], likuti ntheura, Nchigomezgo uli ico iwe ukugomezgamo? . . . Wona sono ukugomezga [Eguputo], mgonthero uwu wa thete lakusweka, ilo usange munthu wakweghamako tilinjire mu woko lake na kumulasa.” (2 Mathe. 18:19, 21) Ivyo Rabsheke wakayowoya vikaŵa vyautesi, cifukwa Hezekiya wakaŵa paubwezi na caru ca Eguputo yayi. Ndipouli, Rabsheke wakakhumbanga kuti Ŵayuda ŵaghanaghanenge kuti palije wakuti waŵawovwire. Ŵali ŵekha.

Mwakuyana waka, ŵakususka ŵakayezgapo kofya Ŵakhristu ŵaunenesko mwa kuŵapatura ku ŵanyawo kuti ŵawonenge nga ŵali ŵekha. Mudumbu munyake uyo ŵakamuponya mu gadi na kumupatura ku Ŵakhristu ŵanyake, pamasinda wakayowoya ico cikamovwira kuti waleke kopa. Wakati: “Lurombo lukanovwira comene kuŵa pafupi na Yehova . . . Nkhakumbukanga mazgu ghakukhozga agho ghali pa Yesaya 66:2 ghakuti Ciuta wakuwona ‘mweneuyo wajiyuyura, wa mtima wakuphyoka.’ Mazgu agha nyengo zose ghakanikhozganga na kunipembuzga.” Mbali munyake, uyo wakakakika na kuŵikika ku malo ghayekha kwa vilimika vinandi, nayo wakati: “Nkhamanyanga kuti nanga munthu wangaŵa ku malo ghayekha wangalutilira nipera kuŵa paubwezi na Ciuta.” Kuŵa paubwezi na Yehova kukawovwira Ŵakhristu ŵaŵiri aŵa kuzizipizga nangauli ŵakaŵa kwaŵekha. (Sal. 9:9, 10) Awo ŵakaŵayuzganga ŵakaŵapatura ku mbumba zawo, ŵabwezi ŵawo, ndiposo Ŵakhristu ŵanyawo, kweni Ŵakaboni aŵa ŵakamanyanga kuti palije uyo wangaŵapatura kwa Yehova.—Rom. 8:35-39.

Ipo nchakuzirwa comene kuti nyengo zose tikhozgenge ubwezi withu na Yehova. (Yak. 4:8) Nyengo na nyengo tikwenera kujifumba kuti: ‘Kasi nkhumugomezga nadi Yehova? Kasi nkhuzomera kulongozgeka na mazgu ghake para nkhusankha cakucita cilicose?’ (Luka 16:10) Para tikufwilirapo kukhozga ubwezi withu na Ciuta, palije cifukwa cakopera. Pakuyowoya m’malo mwa Ŵayuda awo ŵakasuzgikanga, nchimi Yeremiya yikati: “Nkhacema pa zina linu, A Yehova, ndili mu zenje la pasi . . . Mwasendelera pafupi mu zuŵa ilo nkhamucemerani mukati, ‘Ungopanga!’”—Cit. 3:55-57.

Ŵakalutilira Kugomezgeka Nangauli Ŵakagongoweskeka

Rabsheke wakayezga fundo zauryarya kuti waŵagongoweske. Wakati: “Kasi asi [Yehova] ndiye mweneuyo Hezekiya wamuwuskirako malo ghake ghapacanya na majochero ghake? . . . Yehova wakati kwa Ine, Kwelera caru ici, uciparanye.” (2 Mathe. 18:22, 25) Rabsheke wakang’anamuranga kuti Yehova waŵalwerenge yayi ŵanthu ŵake cifukwa ŵamukwiyiska. Kweni uwu ukaŵa utesi. Yehova wakakondwa na ivyo Hezekiya na Ŵayuda awo ŵakambaso kusopa kwaunenesko ŵakacita.—2 Mathe. 18:3-7.

Mazuŵa ghano napo, awo ŵakuyuzga Ŵakhristu ŵangayowoya vinthu ivyo vingawoneka nga ni vyaunenesko na cilato cakuti ŵaŵe nga ŵali nase pamoza, kweni cilato cawo nchakuti ŵatigongoweske. Mwaciyelezgero, ŵabali na ŵadumbu awo ŵakaponyekapo mu gadi nyengo zinyake ŵakaphalirikanga kuti cingaŵa camahara kuti nawo ŵaleke unenesko cifukwa mulongozgi wawo waleka. Ndipouli, fundo zauryarya izi kanandi zatondeka kugongoweska Ŵakhristu awo ŵakughanaghana makora.

Wonani ivyo vikacitikira mudumbu munyake mu nyengo ya Nkhondo Yaciŵiri ya Caru Cose. Apo wakaŵa mu gadi ŵakamulongora mapepara agho pakalembeka mazgu ghakuti mbali uyo wakalongozganga waleka unenesko. Ŵakamufumba usange wakamugomezganga mbali uyu. Mudumbu uyu wakazgora kuti: “Nayo ni munthu wambura kufikapo.” Wakatiso Ciuta wakagwiliskiranga nchito mbali uyu cifukwa cakuti wakalondezganga fundo za mu Baibolo. “Kweni pakuti ivyo walemba apa vikukolerana yayi na fundo za mu Baibolo, wacaliso mbali wane yayi.” Mudumbu uyu wakalondezga ulongozgi wa mu Baibolo wakuti: “Leka kutamira ŵakaronga, panji mwana wa munthu; walije kumanya kovwira.”—Sal. 146:3.

Kumanya makora Mazgu gha Ciuta kweniso kulondezga ulongozgi wake kutovwirenge kuti tileke kupuluskika na fundo zautesi izo zingatitondeska kuzizipizga. (Efe. 4:13, 14; Heb. 6:19) Ntheura, kuŵazga Baibolo zuŵa lililose na kucita sambiro latekha kutovwirenge kuti tighanaghanenge makora para tasangana na vinthu ivyo vingananga ubwezi withu na Yehova. (Heb. 4:12) Iyi ni nyengo yakuti timanye makora Mazgu gha Ciuta na kukhozga cipulikano cithu. Mbali munyake uyo wakakhala mu gadi layekha kwa vilimika vinandi wakati: “Nkhukhumba kuciska waliyose kuti wamanye kuzirwa kwa cakurya cose cauzimu ico tikupokera, cifukwa kunthazi cizamutovwira.” Mbunenesko nadi, para tikusambira Mazgu gha Ciuta ndiposo mabuku ghakulongosora Baibolo agho muzga wakutipa, pa nyengo ya suzgo mzimu utuŵa ‘uzamutikumbuska’ ivyo tikusambira.—Yoh. 14:26.

Ŵakavikilirika ku Wofi

Rabsheke wakayezga kofya Ŵayuda. Wakati: “Mujinthirani sono na sekuru themba la [Asiriya], ndipo tindipeleke kwa iwe ŵakavalo vikwi viŵiri, usange ungamanya iwe wekha kukwezgapo ŵakweri pa iwo. Kasi ungamanya wuli kuzgora cisko ca kazembe yumoza wa ŵateŵeti ŵa sekuru wane?” (2 Mathe. 18:23, 24) Kuyana na kawonero ka wunthu, Hezekiya na ŵanthu ŵake ŵakaŵa ŵakuti ŵangimikana yayi na ŵasilikari ŵa Asiriya.

Awo ŵakuyuzga Ŵakhristu mazuŵa ghano, nawo ŵangawoneka kuŵa ŵankhongono nadi, comene para ŵakovwirika na boma. Ndimo vikaŵira apo ŵa Nazi ŵakayuzganga Ŵakhristu mu nyengo ya Nkhondo Yaciŵiri ya Caru Cose. Ŵakayezga kofya ŵateŵeti ŵanandi ŵa Ciuta. Mbali withu munyake uyo wakakhala vilimika vinandi mu gadi, pamasinda wakalongosora umo ŵakamofyeranga. Pa nyengo yinyake, wakafumbika kuti: “Wanguwona umo takomera munung’una wako? Wasambirapoci?” Wakazgora kuti: “Ndine kaboni wa Yehova ndipo nizamusinthapo yayi.” Ŵakamofya kuti: “Sono ndiwe ukomekenge.” Nangauli vikaŵa nthena kweni wakasunkhunyika yayi, ndipo ŵalwani ŵakaleka kumofya. Kasi nchivici cikamovwira kuti waleke kopa? Wakati: “Nkhagomezganga comene zina la Yehova.”—Zinth. 18:10.

Para tikugomezga comene Yehova, wativikilirenge ku mauryarya ghose gha Satana agho ghangananga umoyo withu wauzimu. (Efe. 6:16) Ntheura, tingacita makora kulomba Yehova kuti watovwire kukhozga cipulikano cithu. (Luka 17:5) Tikweneraso kulondezga ulongozgi uwo muzga wakugomezgeka wakutipa mwakuti tikhozge cipulikano cithu. Para awo ŵakutiyuzga ŵakutofya, tikukhozgeka para tikukumbuka mazgu agho Yehova wakaphalira nchimi Ezekiyeli, uyo wakapharazgiranga ŵanthu ŵanonono mtima. Yehova wakamuphalira kuti: “Ndakhozga cisko cako kwimikana na visko vyawo, na cene cako kucikhozga kwimikana na vyene vyawo. Nga ndi libwe ndinonono comene lakuluska sangarawe ndimo ndacitira cene cako.” (Ezek. 3:8, 9) Usange Yehova wawona kuti nchakwenelera, wangatovwira kuti tiŵe ŵakukhora nga ni libwe linonono nga umo wakacitira na Ezekiyeli.

Kutonda Viyezgo

Para ŵakususka ŵawona kuti njomba zawo zose zatondeka, nyengo zinyake ŵakuyezga kulayizga vinthu vinyake ivyo vingananga umoyo wauzimu. Rabsheke nayo wakayezga nthowa iyi. Wakaphalira awo ŵakaŵa mu Yerusalemu kuti: “Themba la [Asiriya] likuti ntheura, Citani phangano na ine, mufumire kwa ine . . . ndisuke ndize kumutolerani ku caru cakukozgana na caru cinu, caru ca vyakurya na vinyo, caru ca vingwa na minda ya mpheska, caru ca mafuta gha maolive na uci; mwakuti mukaghume, kufwa cara.” (2 Mathe. 18:31, 32) Layizgo la vyakurya na vinyo likaŵa lakukondweska comene ku ŵanthu awo ŵakakhalanga mu msumba wa Yerusalemu.

Mishonale munyake uyo wakaponyeka mu gadi nayo wakayezgekapo na layizgo lanthena. Ŵakamuphalira kuti wamukhala ku malo ghawemi kwa myezi yinkhondi na umoza mwakuti wakaghanaghanirepo makora. Ndipouli, mbali uyu wakalutilira kuŵa maso mwauzimu ndipo wakathera yayi. Nchivici cikamovwira? Wakalongosora kuti: “Nyengo zose nkhawonanga kuti wanangwa weneko wizenge na Ufumu. . . . Kumanya makora ufumu wa Ciuta, na kuŵa na cigomezgo cose kuti wizenge nadi, vikanovwira kuti nileke kusunkhunyika.”

Kasi ise Ufumu wa Ciuta tikuwuwona wuli? Abrahamu, mpositole Paulosi, ndiposo Yesu, wose ŵakazizipizga masuzgo cifukwa ca kumanya kuti Ufumu uliko nadi. (Fil. 3:13, 14; Heb. 11:8-10; 12:2) Usange tilutilirenge kuŵika Ufumu pakwamba na kukumbuka vitumbiko vyamuyirayira ivyo wizenge navyo, nase tingatonda ciyezgo cakuti tisange wanangwa wa kanyengo kacoko waka.—2 Kor. 4:16-18.

Yehova Watitayenge Yayi

Hezekiya pamoza na Ŵayuda ŵakalutilira kugomezga Yehova nangauli Rabsheke wakayezga kuŵawofya. (2 Mathe. 19:15, 19; Yes. 37:5-7) Pamasinda Yehova wakazgora malurombo ghawo, mwa kutuma mungelo uyo wakakoma ŵasilikari ŵa Asiriya ŵakukwana 185,000 mu usiku umoza. Kukati kwaca, Senakeribu soni zikamukora comene, ndipo wakawelera ku msumba wake wa Nineve pamoza na ŵasilikari ŵake ŵacoko waka awo ŵakapona.—2 Mathe. 19:35, 36.

Nchakuwonekerathu kuti Yehova wakaŵataya yayi ŵanthu awo ŵakamugomezga. Mazuŵa ghano napo, ŵabali na ŵadumbu ŵithu awo ŵalutilira kugomezgeka mu nyengo ya viyezgo ŵalongora kuti Yehova wandasinthe. Ipo Ŵadada ŵithu ŵa kucanya ŵakuneneska para ŵakutiphalira kuti: “Ine Yehova Ciuta wako, ndakukora ku woko lako la malyero; ndine nkhuti kwa iwe, ‘Ungopanga, ndine tindikovwire.’”—Yes. 41:13.

[Mazgu ghamusi]

[Mazgu Ghakukhozgera pa peji  13]

M’malo ghakujumpha 30 mu Baibolo, Yehova wakusimikizgira ŵateŵeti ŵake kuti: “Ungopanga”

[Cithuzithuzi pa peji 12]

Kasi mauryarya gha Rabsheke ghakuyana wuli na gha ŵalwani ŵa ŵanthu ŵa Ciuta mazuŵa ghano?

[Vithuzithuzi pa peji 15]

Kuŵa paubwezi na Yehova kukutovwira kuti tilutilire kugomezgeka para tikuyezgeka