7 Kasi Ciuta Wapulikenge na Kuzgora Lurombo Lwithu?

ŴANTHU ŵanandi ŵakukhumba comene kuzgoreka fumbo ilo lili pacanya apa. Baibolo likulongora kuti Yehova wakupulika nadi malurombo mazuŵa ghano. Kweni vikuthemba pa ise kuti wapulike malurombo ghithu panji yayi.

Yesu wakacenya ŵalongozgi ŵa cisopa awo ŵakalombanga mwaupusikizgi kuti ŵajiwoneske waka ku ŵanthu kuti mbarunji. Wakati ŵanthu aŵa “ŵakupokerathu njombe yawo yose,” kung’anamura kuti ŵapokerenge waka nchindi izo ŵakukhumba comene ku ŵanthu, kweni Ciuta wazgorenge yayi malurombo ghawo. (Mateyu 6:5) Lero napo ŵanthu ŵanandi ŵakulomba mwakuyana na khumbo lawo, la Ciuta yayi. Ciuta wakupulika yayi malurombo ghawo cifukwa ŵakulondezga yayi fundo za mu Baibolo izo tadumbiskana.

Wuli pakuyowoya za imwe? Kasi Ciuta wapulikenge na kuzgora malurombo ghinu? Kuti wazgore vikuthemba pa fuko linu yayi, panji caru ico mukufumira, nesi ivyo muli navyo. Baibolo likutisimikizgira kuti: “Ciuta wakutemwera cara, kweni mu mtundu uliwose munthu uyo wakumopa na kucita urunji ngwakuzomerezgeka kwa iyo.” (Milimo 10:34, 35) Kasi imwe mukopa Ciuta? Para mukumopa, mumucindikenge comene na kopa kumukwiyiska. Para mukucita urunji, muyezgeyezgenge kucita ivyo Ciuta wakuti ni viwemi m’malo mwa kucita ivyo mukukhumba panji ivyo ŵanji ŵakukhumba. Kasi mukukhumba nadi kuti Ciuta wapulikenge malurombo ghinu? Baibolo likulongosora umo mungalombera kuti Ciuta wapulikenge malurombo ghinu.a

Kweni ŵanandi ŵakukhumba kuti Ciuta wazgorenge malurombo ghawo mwamunthondwe. Kweni nanga ni mu nyengo yakale, nkhanandi yayi apo Ciuta wakazgoranga malurombo mwamunthondwe. Para munthondwe unyake wacitika, nyengo zinyake pakajumphanga vilimika vinandi kuti unyakeso ucitike. Kweniso Baibolo likulongora kuti nyengo ya ŵapositole yikati yamara, minthondwe nayo yikamalira papo. (1 Ŵakorinte 13:8-10) Kweni kasi fundo iyi yikung’anamura kuti mazuŵa ghano Ciuta wakuzgora yayi malurombo? Ndimo viliri yayi. Wonani umo wakuzgolera malurombo.

Ciuta wakupeleka vinjeru. Yehova ndiyo ni mweneco wa vinjeru vyanadi. Iyo wakunora yayi vinjeru vyake, wakupeleka mwawanangwa kwa awo ŵakukhumba kulongozgeka na Iyo na kucita ivyo wakuŵaphalira.—Yakobe 1:5.

Ciuta wakupeleka mzimu wake utuŵa na vitumbiko vyose ivyo vikwiza cifukwa ca mzimu uwu. Mzimu utuŵa ni nkhongono yakugwira nchito ya Ciuta. Palije nkhongono yinyake yakujumpha iyi. Ungatovwira kuzizipizga viyezgo. Ungatovwira kuti tiŵe na mtende mu mtima para tikusuzgika. Ungatovwira kuti tiŵe na mikhaliro yiwemi ndiposo yakukondweska. (Ŵagalatiya 5:22, 23) Yesu wakasimikizgira ŵasambiri ŵake kuti Ciuta wakupeleka cawanangwa ici mwawanangwa.—Luka 11:13.

Ciuta wakovwira awo ŵakumupenja mwaunenesko kuti ŵamumanye. (Milimo 17:26, 27) Pa caru capasi pali ŵanthu ŵanyake awo ŵakukhumbisiska nadi kumanya unenesko. Ŵakukhumba kumanya Ciuta, zina lake, cilato cake kulazga ku caru capasi na ŵanthu, ndiposo ivyo ŵangacita kuti ŵasendelere kwa Iyo. (Yakobe 4:8) Ŵakaboni ŵa Yehova kanandi ŵakukumana na ŵanthu ŵanthena aŵa ndipo ŵakuzgora mafumbo ghawo mwakugwiliskira nchito Baibolo.

Kasi ndico cifukwa mwapokera magazini iyi? Kasi mukukhumba kumumanya makora Ciuta? Panji iyi ni nthowa iyo Ciuta wakuzgolera lurombo lwinu.