6 Kasi Lurombo Lungatovwira?

KASI kulomba kungatovwira? Baibolo likulongora kuti malurombo gha ŵateŵeti ŵakugomezgeka ŵa Ciuta ghakuŵawovwira. (Luka 22:40; Yakobe 5:13) Nakuti kulomba kungatovwira mwauzimu, mu maghanoghano, ndiposo mwakuthupi. Mwawuli?

Tiyelezgere kuti muli na mwana ndipo wapokera cawanangwa. Kasi mungamusambizga kuti kuwonga waka camumtima nkhwakukwana? Panji mungamusambizga kuti wayowoyenge kuti “Yewo”? Vinthu ivyo vili mu mtima withu vikuŵa vyankhongono ndiposo vyanadi usange taviyowoya. Kasi ndimo viliriso pakuyowoya na Ciuta? Nkhanira kwali. Wonani viyelezgero vinyake.

Malurombo gha kuwonga. Para tikuwonga Adada ŵithu ŵakucanya pa viwemi ivyo ŵakutipa, tikuŵika comene mahara pa vitumbiko ivyo tili navyo. Cifukwa ca kucita nthena, tikuŵa ŵakuwonga comene, ŵakukondwa, ndipo tikufipa mtima yayi.—Ŵafilipi 4:6.

Ciyelezgero: Yesu wakawonga Awiske cifukwa ca kupulika na kuzgora malurombo ghake.—Yohane 11:41.

Kulomba cigowokero. Para tikulomba Ciuta kuti watigowokere, tikukhozga njuŵi yithu, tikuzakawerezgaso bweka yayi ivyo tabuda, ndipo tikumanya makora kofya kwa kwananga. Kweniso tikupembuzgika para njuŵi yatisuzganga comene.

Ciyelezgero: Kuti walongore kuti wapera ndiposo kuti wali na citima, Davide wakalomba.—Salmo 51.

Kulomba ulongozgi na vinjeru. Kulomba Yehova kuti watilongozge panji kutipa vinjeru kuti tisankhe makora vinthu vinyake kungatovwira kuti tiŵe ŵakujiyuyura nadi. Kucita nthena kungatikumbuska kuti tili ŵakupeleŵera ndipo kungatovwira kuti tigomezgenge comene Adada ŵithu ŵakucanya.—Zintharika 3:5, 6.

Ciyelezgero: Mwakujiyuyura, Solomoni wakalomba ulongozgi na vinjeru kuti wawuse makora Israyeli.

Kulomba para tili na masuzgo. Para mu nyengo ya suzgo tikukhutulira Ciuta ivyo vili mu mtima withu, tipembuzgikenge ndipo tigomezgenge comene Yehova m’malo mwa kujigomezga tekha.—Salmo 62:8.

Ciyelezgero: Themba Asa likalomba apo gulu la ŵalwani ŵakofya likawukira caru cake.—2 Midauko 14:11.

Kulombera ŵanyithu awo ŵali mu suzgo. Malurombo ghanthena ghakutovwira kuti tileke kujighanaghanira tekha kweni tighanaghanirengeso ŵanji na kuŵacitira citima.

Ciyelezgero: Yesu wakalombera ŵasambiri ŵake.—Yohane 17:9-17.

Malurombo gha kulumba. Para tikulumba Yehova cifukwa ca milimo yake yakuzizwiska na mikhaliro yake yiwemi, tambenge kumucindika comene na kumutemwa. Malurombo gha mtundu uwu ghangatovwiraso kuti tiŵe paubwezi na Ciuta withu, uyoso ni Dada withu.

Ciyelezgero: Davide wakalumba Ciuta cifukwa ca ivyo wali kulenga.—Salmo 8.

Thumbiko linyake ilo tikusanga para talomba ni “mtende wa Ciuta uwo ukuluska ghanoghano lililose.” (Ŵafilipi 4:7) Ni thumbiko likuru nadi kuŵa na mtende wa mu mtima mu caru ciheni ici. Tikusangaso candulo mwakuthupi para tili na mtende uwu. (Zintharika 14:30) Kweni kasi mtende uwu tingawusanga patekha? Panji pali cinthu cinyake cakuzirwa ico cikukhumbikwaso?