5 Kasi Tikwenera Kulomba Nyengo Wuli Ndipo Tikwenera Kulombera Nkhu?

MWAMBURA kukayika, mukuwona kuti visopa vinandi vikuŵika comene mtima pa kuzenga machalichi ghapacanya ghakulomberamo na kusankha nyengo zapadera zuŵa lililose zakuti ŵanthu ŵakalomberenge. Kasi Baibolo likusambizga kuti tikwenera kulombera pa malo ghanyake ndiposo panyengo yinyake yakuŵikika?

Baibolo likulongora kuti pali nyengo zakwenelera izo munthu wangalomba. Mwaciyelezgero, Yesu wakalomba na kuwonga Ciuta pambere wandarye na ŵasambiri ŵake. (Luka 22:17) Ndipo ŵasambiri ŵake ŵakalombera lumoza apo ŵakawungana kuti ŵasope. Ndipo kucita nthena kukalutilira kucitika mu masunagoge gha Ŵayuda ndiposo pa tempele ku Yerusalemu. Khumbo la Ciuta likaŵa lakuti tempele liŵe “nyumba ya lurombo ya mitundu yose.”—Mariko 11:17.

Para ŵateŵeti ŵa Ciuta ŵawungana na kulombera lumoza, malurombo ghawo ghangazgoreka. Para gulu la ŵanthu lawungana na mtima umoza kuti lirombe ndiposo para lurombo lwawo lukukolerana na fundo za mu Malemba, Ciuta wakukondwa. Lurombo lungamupangiska kuti wacite cinthu ico panji wate wacitenge yayi. (Ŵahebere 13:18, 19) Nyengo zose Ŵakaboni ŵa Yehova ŵakulomba pa maungano ghawo. Tikumucemani kuti mwize ku Nyumba ya Ufumu iyo muli nayo pafupi kuti muzakajipulikire mwekha malurombo agha.

Ndipouli, Baibolo lindaŵike nyengo iyo tikwenera kulombera nesi malo agho tikwenera kulomberapo. Baibolo likuyowoya za ŵateŵeti ŵa Ciuta awo ŵakalombanga pa nyengo zakupambana ndiposo pa malo ghakupambana. Yesu wakati: “Para ukulomba, njira mu cipinda cako ndipo para wajarako ku mulyango wako, lomba ku Ŵawuso awo ŵali kwakubisika; ndipo Ŵawuso awo ŵakulaŵiska kwakubisika ŵazamukupa njombe.”—Mateyu 6:6.

Kasi ici nchakukondweska yayi? Nyengo yiliyose mungalomba kwa Fumu yikuru ya cilengiwa cose, nanga ni para muli pamwekha, ndipo manyani kuti wakutegherezga. Ntheura nchakuzizika yayi kuti kanandi Yesu wakalutanga kwayekha kuti wakalombe. Zuŵa linyake wakachezera usiku wose kulomba kwa Ciuta, ndipo nchakuwonekerathu kuti wakalombanga Ciuta kuti wamovwire kuti wasankhe makora ico wangacita pa nkhani yinyake yakuzirwa comene.—Luka 6:12, 13.

Baibolo likuyowoya za ŵanalume na ŵanakazi ŵanandi awo ŵakalombanga kuti ŵasankhe makora vinthu vinyake panji para ŵali na masuzgo. Nyengo zinyake ŵakalombanga mwakukwezga mazgu, nyengo zinyake camumtima, ndipo ŵakalomberanga pagulu panji kwaŵekha. Kweni cakuzirwa nchakuti ŵakalombanga. Nakuti Ciuta wakuphalira ŵateŵeti ŵake kuti: “Lombani kwambura kuleka.” (1 Ŵatesalonika 5:17) Nyengo zose Ciuta ngwakunozgeka kutegherezga malurombo gha awo ŵakucita khumbo lake. Kasi ici cikulongora kuti Ciuta wakutitemwa yayi?

Kweni mu caru cambura cipulikano ici, ŵanandi ŵangakayikira usange lurombo lukovwira nadi. Panji mungafumba kuti, ‘Kasi lurombo lunganovwira nadi?’