Yesu Wakutisambizga Kuromba

KASI ukuyowoya na Yehova Ciuta?— Iye wakukhumba kuti uyowoyenge nayo. Kuyowoya na Ciuta kukucemeka kuti kuromba. Yesu nyengo zinandi wakayowoyanga na Ŵawiske ŵakucanya. Nyengo zinyake wakakhumbanga kuŵa yekha para wakuyowoya na Ciuta. Baibolo likuyowoya kuti zuŵa linyake Yesu ‘Wakakwera mu lupiri kuya karomba payekha.’ Nangauli kukaŵa mise, wakaŵa yekha kwenekura.—Mateyu 14:23.

Ni nku uko ungaruta kuti ukarombe kwa Yehova pawekha?— Nyengo zinyake ungaromba kwa Yehova pawekha para ukukhumba kugona usiku. Yesu wakati: ‘Para ukuromba, unjire ku cipinda cako ca mukati, ndipo para wajarako ku muryango, urombenge ku Ŵawuso.’ (Mateyu 6:6) Kasi ukuromba kwa Yehova palipose para ukukhumba kugona usiku?— Ukwenera kucita nteura.

Yesu wakarombangaso para wali na ŵantu. Mubwezi wake Lazaro wakati wafwa, Yesu wakaromba na ŵantu awo wakaŵa nawo pa malo agho Lazaro wakaŵikika. (Yohane 11:41, 42) Wakarombangaso para wakakumananga na ŵasambiri ŵake. Kasi ukuruta ku maungano uko malurombo ghakuperekeka?— Ku maungano muntu murara kanandi ndiyo wakuromba. Ukwenera kutegherezga comene ku ivyo wakuyowoya cifukwa wakuyowoya na Ciuta mu malo mwako. Nteura ungayowoya kuti ‘Ameni’ paumaliro wa lurombo. Kasi ukumanya ico mazgu ghakuti ‘Ameni’ ghakung’anamura paumaliro wa lurombo?— Ghakung’anamura kuti lurombo ulo lwayowoyeka walitemwa. Ghakung’anamuraso kuti wakolerana nalo ndipo nawe ukukhumba kuti liŵe lurombo lwako.

Yesu wakarombangaso pa nyengo ya cakurya. Wakawonganga Yehova cifukwa ca cakurya. Kasi nyengo zose ukuromba pambere undayambe kurya?— Mbuweme kuwonga Yehova pambere tindayambe kurya. Muntu munyake wangaromba para mukurya pamoza. Kweni uli para ukurya wekha? Panji uli usange ukurya pamoza na ŵantu awo ŵakuwonga Yehova yayi?— Ukwenera kupereka lurombo lwa wekha.

Kasi ukwenera kuromba mwakucemerezga nyengo zose? Panji kasi Yehova wangapulika para ukuyowoya lurombo lwacisisi?— Ico cikacitikira Nehemiya cingatovwira kuti timanye zgoro la fumbo ili. Iye wakaŵa musopi wa Yehova uyo wakagwiranga ncito mu nyumba ya Aritakisasi, Themba la ku Peresiya. Zuŵa linyake Nehemiya wakaŵa wacitima comene cifukwa wakapulika kuti viriŵa vya Yerusalemu, msumba ukuru wa ŵantu ŵa kwake, vyabwanganduka.

Themba lati lamufumba Nehemiya cifukwa ico wakaŵira wacitima, cakwamba Nehemiya wakaromba danga lurombo lwacisisi. Pamanyuma pake Nehemiya wakaphalira themba cifukwa ico wakaŵira wacitima na kumupempa usange wangaruta ku Yerusalemu kuti wakazengeso viriŵa. Kasi ncivici ico cikacitika?—

Ciuta wakazgora lurombo lwa Nehemiya. Themba likamuphalira kuti wangaruta! Kusazgirapo pa kumuzomezga kuruta, themba likapaso Nehemiya makuni ghanandi kuti wakagwiriskire ncito pakuzenga viriŵa. Nteura Ciuta wakuzgora nadi malurombo ghithu, nanga ghangaŵa ghacisisi.—Nehemiya 1:2, 3; 2:4-8.

Sono aghanaghanira ici. Kasi ukwenera kusindama pakuromba? Kasi ukwenera kujikama? Kasi ukutipo uli?— Nyengo zinyake Yesu wakajikamanga pakuromba. Nyengo zinyake wakimiliranga. Ndipo nyengo zinyake wakalaŵiskanga kucanya, nga ni apo wakacitira peneapo wakaromberanga Lazaro.

Kasi ici cikurongoraci?— Ici cikurongora kuti kimiro ncintu cakukhumbikwa comene yayi pakuromba. Nyengo zinyake cingaŵa ciweme kusindama na kusizimira maso ghako. Nyengo zinyake ungajikama nga ni umo Yesu wakacitira. Kweni, kumbukira kuti tingaromba kwa Ciuta nyengo yiliyose, na muhanya panji usiku, ndipo watipulikenge. Cintu cakukhumbikwa para tikuromba ncakuti tikwenera kugomezga nadi kuti Yehova wakutipulika. Kasi ukugomezga kuti Yehova wakupulika malurombo ghako?—

Kasi ni vici ivyo tikwenera kuyowoya mu malurombo ghithu kwa Yehova?— Niphalira: Para ukuromba, ni vici ivyo ukuyowoya kwa Ciuta?— Yehova wakutipa vintu vinandi comene, ndipo ncakwenerera kumuwonga cifukwa ca vintu ivi, asi ntena?— Tingamuwonga cifukwa ca cakurya ico tikurya. Kweni kasi uli kumuwongapo cifukwa ca mtambo, makuni, na maluŵa ghakutowa?— Ndiyo wakalenga vyose ivi.

Nyengo yimoza ŵasambiri ŵa Yesu ŵakamupempa kuti waŵasambizge umo ŵangarombera. Nteura Msambizgi Waluso wakaŵasambizga, ndipo wakaŵarongora ivyo vikaŵa vintu vyakukhumbikwa comene kuyowoya mu lurombo. Kasi vintu ivi ukuvimanya?— Tora Baibolo lako, ndipo ujure pa Mateyu cipaturo 6 mavesi 9 mupaka 13, tikusangapo ilo ŵantu ŵanandi ŵakuti Lurombo lwa Ŵadada Ŵithu panji lwa Fumu. Tiye tiŵazgire lumoza.

Apa tikusambirapo kuti Yesu wakatiphalira kuti tiromberenge zina la Ciuta. Wakati tirombenge kuti zina la Ciuta lituŵiskike, panji kutumbikika. Kasi zina la Ciuta ni njani?— Ni Yehova, ndipo tikwenera kulitemwa zina ili.

Caciŵiri, Yesu wakatisambizga kuti tirombenge kuti Ufumu wa Ciuta wize. Ufumu uwu ngwakukhumbikwa comene cifukwa wiziskenge mtende pa caru capasi na kucizgora paradiso.

Cacitatu, Msambizgi Waluso wakati tirombenge kuti khumbo la Ciuta licitike pano pasi nga nkucanya. Usange tikuromba kuti khumbo la Ciuta licitike, tikwenera kucita ivyo Ciuta wakukhumba.

Cacinayi, Yesu wakatisambizga kuti tiromberenge cakurya ca zuŵa na zuŵa. Wakayowoyaso kuti tikwenera kuphalira Ciuta kuti tiri ŵacitima para tacita vintu ivyo ni viheni. Ndipo tikwenera kuromba Ciuta kuti watigowokere. Kweni kuti watigowokere, tikwenera kugowokera ŵanyithu para ŵatinangira. Kasi ici ncipusu kwa iwe kucita?—

Paumaliro, Yesu wakati tikwenera kuromba Yehova Ciuta kuti watithaske ku muntu muheni, Satana Dyabulosi. Nteura vyose ivi ni vintu viweme kuromba kwa Yehova.

Tikwenera kugomezga kuti Yehova wakupulika malurombo ghithu. Kusazgirapo pakuromba wovwiri, tikweneraso kumuwonga. Wakukondwa comene para ivyo tikuromba vikufumira pasi pa mtima ndiposo para tikuromba vintu vyakwenerera. Ndipo iye watipenge vintu ivi. Kasi ukugomezga?—