Mafumbo Ghakufumira ku Ŵaŵazgi

Yesu wakaphalira ŵategherezgi ŵake kuti: “Muŵe ŵakufikapo, nga ni umo Ŵawiskemwe ŵa kucanya ŵaliri ŵakufikapo.” Kasi ŵanthu mazuŵa ghano ŵangaŵa wuli “ŵakufikapo”?—Mat. 5:48.

Kupulikiska umo mazgu ghakuti kuŵa “ŵakufikapo” ghakugwilira nchito mu Baibolo kovwirenge kusanga zgoro la fumbo ili. Ni vyose yayi ivyo Malemba ghakuti ni vyakufikapo ivyo ni vyakufikapo nkhanira. Kweni Yehova pera ndiyo ngwakufikapo nkhanira. Mbunenesko kuti nyengo zinyake ŵanthu panji vinthu vinyake vingayowoyeka kuti ni vyakufikapo kweni vikuŵa vyakufikapo nkhanira yayi. Mazgu Ghacihebere na Cigiriki agho mu Baibolo ghali kung’anamulika kuti ‘kufikapo’ kanandi ghakung’anamura umusuma, kukhoma, ndiposo kuŵavya kalema, mwakuyana na umo ŵamazaza ŵakuwonera.

Adamu na Eva ŵakalengeka ŵakufikapo mu vyose. Ŵakaŵa ŵakufikapo kuyana na mweso wa Mulengi wawo. Cifukwa ca kuleka kupulikira, ŵakaŵaso ŵakufikapo yayi ndipo ici cikapangiska kuti ŵana ŵawo nawo ŵaŵe ŵambura kufikapo. Ntheura, kwizira mwa Adamu, kwananga, kuwura kufikapo, na nyifwa vikambukira ŵanthu wose.—Rom. 5:12.

Kweni nga umo Yesu wakayowoyera mu Upharazgi wa pa Lupiri, ŵanthu ŵambura kufikapo ŵangaŵa ŵakufikapo mu nthowa yinyake. Mu upharazgi uwu wakayowoya kuti mweso wakupimira kuti munthu ngwakufikapo nchitemwa. Citemwa ici cikwenera kuyana na ico Ciuta wakulongora ŵanthu wose. Yesu wakati: “Lutilirani kutemwa ŵalwani ŵinu na kulombera awo ŵakumutambuzgani; mwakuti mujilongore mwaŵene kuŵa ŵana ŵa Ŵawiskemwe awo ŵali kucanya, pakuti iwo ŵakukwezgera dazi lawo pa ŵanthu ŵaheni na ŵawemi ndipo ŵakulokweska vula pa ŵanthu ŵarunji na ŵambura urunji.” (Mat. 5:44, 45) Kuti ŵaŵe ŵakufikapo nga ni Ciuta, ŵasambiri ŵa Yesu ŵakeneranga kulongora citemwa mwa nthowa iyi.

Ŵakaboni ŵa Yehova pa caru cose ŵakuyezgayezga kulongora citemwa canthena ku ŵanyawo. Ŵakukhumba kovwira ŵanthu ŵa mitundu yose kuti ŵamanye unenesko uwo uli mu Baibolo. Mu vyaru vyakukwana 236, Ŵakaboni ŵa Yehova ŵakucitiska masambiro gha Baibolo ghakujumpha 7,000,000.

Yesu wakafumba kuti: “Usange mukutemwa awo ŵakumutemwani, muli na njombe wuli? Asi awo ŵakusonkheska msonkho nawo ŵakucita ceneici? Ndipo usange mukutawuzga ŵabali ŵinu pera, nchinthu wuli capadera ico mukucita? Asi ŵanthu ŵa mitundu nawo ŵakucita ceneici?” (Mat. 5:46, 47) Ŵakhristu ŵaunenesko ŵakutemwera yayi. M’malo mwake ŵakovwira ŵakavu, ŵalwari, ŵana na ŵacekuru. Para Ŵakhristu ŵakucita nthena ŵakuyezga Yehova, ntheura ŵangaŵa ŵakufikapo nga umo Yesu wakayowoyera.

Kasi nase tizamuŵa ŵakufikapo nga umo Adamu wakaŵira pakwamba? Enya, kwizira mu sembe yakuwombora ya Yesu, ŵanthu ŵakupulikira ŵazamuŵa ŵakufikapo nkhanira mu Muwuso wa Khristu wa Vilimika Cikwi, apo ‘Mwana wa Ciuta wazamuparanya milimo ya Dyabulosi.’—1 Yoh. 3:8.