‘Vinthu Ivyo Wakacita Vili Kuluta Nayo’

THEODORE JARACZ, uyo wakaŵa mu Wupu Wakulongozga wa Ŵakaboni ŵa Yehova, pa Citatu, Juni 9, 2010 namulenji, wakamalizga uteŵeti wake pa caru capasi. Wakaŵa na vilimika 84 ndipo wali kuleka Melita, muwoli wake uyo wakhala nayo mu nthengwa kwa vilimika 53. Wali kulekaso mudumbu wake na ŵaphwa ŵake ŵatatu.

Mbali Jaracz wakababika pa Seputembala 28, 1925 ku Pike County, Kentucky, U.S.A. Wakalongora kuti wajipatulira kwa Yehova pa Ogasiti 10, 1941, apo wakaŵa na vilimika 15. Wati wakwaniska vilimika 17 wakamba upayiniya wanyengozose, ndipo wacita uteŵeti wanyengozose kwa vilimika pafupifupi 67.

Mu 1946, apo wakaŵa na vilimika 20, Mbali Jaracz wakaluta ku Sukulu ya Giliyadi, yakusambizga umishonale, kilasi la nambara 7. Wati wamalizga sukulu iyi, Mbali Jaracz wakapika uteŵeti wakwendakwenda ku Cleveland, Ohio, United States. Mu 1951, wakatumika kukateŵetera pa munthavi wa ku Australia, uko wakaŵa mulaŵiliri wa munthavi. Yearbook of Jehovah’s Witnesses ya 1983 yikati, Mbali Jaracz ‘wakakhuŵilizga comene ŵabali mu caru ici cifukwa ca mwamphu uwo wakaŵa nawo pa uteŵeti ndiposo cifukwa ca kulongozga makora mulimo wa kupharazga.’

Wati wawelera ku United States, Mbali Jaracz wakatora Melita Lasko pa Disembala 10, 1956. Ŵati ŵatorana waka ŵakamba uteŵeti wakwendakwenda, ndipo ŵakateŵeteranga mwamwamphu mu United States. Mu 1974, Mbali Jaracz wakacemeka kuti wakaŵe mu Wupu Wakulongozga wa Ŵakaboni ŵa Yehova.

Timuluwenge yayi Mbali Jaracz cifukwa wakaŵa wakujipeleka na wakugomezgeka, ndiposo cifukwa ca kuŵika mtima wake wose pa uteŵeti. Wakatemwanga na kupwelelera makora muwoli wake. Wakaŵaso munthu wakutemwa vinthu vyauzimu, uyo wakapenjanga vyake pera cara. (1 Kor. 13:4, 5) Wakalongora kuti wakapenjanga vyake pera cara, cifukwa wakakhuŵilizganga comene kuti munthu waliyose wacitilike lusungu ndiposo mwambura kutemwera. Mwamphu uwo wakaŵa nawo mu uteŵeti wa m’munda, nawo ukalongora kuti wakaghanaghaniranga comene ŵanthu.

Nangauli tili na citima comene cifukwa ca kutaya mbali wamwamphu, yumoza wa mbumba ya Beteli ndiposo mbumba Yacikhristu pa caru cose, kweni ndise ŵakukondwa cifukwa cakuti Mbali Jaracz wateŵetera Yehova mwakugomezgeka kwa vilimika vinandi. Tili na cigomezgo cose kuti ‘waŵa wakugomezgeka mpaka nyifwa, ndipo wapokera mphumphu ya umoyo.’ (Uvu. 2:10) Tiliso na cigomezgo kuti ‘vinthu ivyo wakacita vili kuluta nayo.’—Uvu. 14:13.