Edeni​—Kasi Munda wa Edeni Chikaŵa Chikaya cha Ŵanthu?

TIYELEZGERE kuti mukukhala ku malo ghanyake ghakutowa chomene. Ku malo agha kulije chiwawa cha mu tawuni panji chakutimbanizga chilichose. Malo agha ngakuru chomene ndipo mukukhala mwamtende. Mukufipa mtima na chilichose yayi, mukulwara yayi panji kupulika vyakuŵinya vilivyose. Mukukondwa na vinthu viwemi ivyo vyamuzungulirani.

Mukuwona mitundu yakupambanapambana ya maluŵa ghakutowa chomene, tumilonga, makuni ghakutikitira makora, utheka wakubiliŵira, zuŵa kweniso mfwiri. Kamphepo kakuputa makora ndipo mukupulika kasungu kawemi. Mukupulika mahamba ghakulira, chongo cha maji, kwimba na kulira kwa viyuni kweniso vibenene. Apo mukaghanaghanira vinthu vyose ivi, kasi mungatemwa kuti mukhale mu malo ghanthena agha?

Ŵanthu ŵanandi pa charu chapasi ŵakugomezga kuti ŵanthu ŵanyake ŵali kukhalapo mu malo ghakutowa ghanthena agha. Kwa vyaka vinandi, ŵa chisopa cha Chiyuda, Chikhristu kweniso Chisilamu, ŵali kusambirapo vya munda wa Edeni, malo agho Chiuta wakapeleka kwa Adamu na Eva kuti ŵakhalengemo. Baibolo likuti ŵanthu aŵa ŵakakhalanga mwamtende, kweniso ŵakakondwanga chomene. Iwo ŵakawa pa mtende na vinyama, kweniso Chiuta uyo wakaŵapa malo agha kuti ŵakhalengemo kwamuyirayira.—Genizesi 2:15-24.

Ŵahindu ŵakugomezga kuti kale kukaŵa paradiso. Ŵabuda ŵakugomezga kuti ŵalongozgi ŵalara ŵachisopa chawo ŵakaŵako kale chomene ndipo ŵakakhalanga mu charu chakutowa chomene nga umo wakaŵira paradiso. Visopa vinandi vya ku Africa vikusambizga nkhani izo zikuyowoya kuti Adamu na Eva ŵakakhalanga mu paradiso.

Visopa kweniso mitheto yinandi yikusambizga kuti kale kukaŵa paradiso. Munthu munyake wakalemba kuti: “Ŵanthu ŵanandi ŵakugomezga kuti paradiso wakaŵako nadi ndipo ŵanthu awo ŵakakhalanga mu malo agha ŵakaŵa ŵambura kwananga, ŵakaŵa na wanangwa, ŵakakhalanga mwamtende, mwakukondwa, ŵakaŵa na vinthu vinandi viwemi, pakaŵavya uyo wakachitanga kuŵachichizga kuti ŵachite vinthu vinyake, ŵanthu ŵakenjerwanga yayi, panji kutimbana. . . . Vigomezgo ivi vikutipa nkhongono kuti paradiso wakaŵako nadi ndipo tikugomezga kuti wazamuŵakoso.”

Kasi nkhani zose izi kweniso mitheto yakukhwaskana na paradiso vikafuma nkhu? Kasi vingachitika kuti ŵanthu wose ŵaghanaghane waka vyakuti kukaŵa paradiso kweni kukaŵavya? Kasi munda wa Edeni kweniso Adamu na Eva ŵakaŵako nadi?

Ŵanthu ŵanyake ŵakususka kuti munda wa Edeni ukaŵako nadi, ndipo ŵakugomezga kuti nkhani iyi ntchidokoni waka. Chifukwa cha kuluta panthazi kwa sayansi, ŵanthu ŵanandi ŵakughanaghana kuti nkhani izi ni vidokoni waka. Chakuzizika ntchakuti ŵalongozgi ŵavisopa nawo ŵakukayikira kuti munda wa Edeni ukaŵako. Iwo ŵakuti kukaŵavya malo ghakutowa nthena. Ŵakuti nkhani iyi ntchidokoni panji kuti ntharika waka.

Mbunenesko kuti mu Baibolo namo muli ntharika. Nakuti Yesu wakatemwanga chomene kuyowoya ntharika izo ŵanthu ŵakuzimanya makora. Kweni pakuyowoya vya munda wa Edeni, Baibolo likuti ukaŵako nadi ntchidokoni panji ntharika waka yayi. Usange munda wa Edeni ukaŵako nadi yayi, kasi tingagomezga wuli kuti vinyake ivyo Baibolo likuyowoya ni vyaunenesko? Tiyeni tiwone chifukwa icho ŵanyake ŵakukayikira kuti munda wa Edeni ukaŵako nadi, kweniso usange ivyo ŵakuyowoya ni vyakupulikikwa nadi. Paumaliro tiwonenge umo nkhani ya kuyowoya vya munda wa Edeni yikukhwaskira munthu waliyose payekha.