Mafumbo Ghakufumira ku Ŵaŵazgi

Kasi nchamacitiko kumanya ndendende unandi wa maucimi ghakuyowoya za Mesiya agho ghali mu Malemba Ghacihebere?

Para tikusanda Malemba Ghacihebere tikusanga maucimi ghanandi ghakuyowoya vya Yesu Khristu agho ghali kufiskika. Maucimi agha ghakayowoyerathu za kubabika kwa Mesiya, nyengo iyo wazamuwonekera, ivyo wazamucita, umo ŵanthu ŵazamucitira nayo, na mulimo uwo Yehova Ciuta wali kumupa. Ghakutovwira kumanya kuti Yesu ndiyo ni Mesiya. Kweni pa fundo ya unandi wa maucimi ghakuyowoya za Mesiya agho ghali mu Malemba Ghacihebere, tikwenera kuŵa maso.

Ni wose yayi awo ŵakumanya makora agho ni maucimi gheneco ghakuyowoya za Mesiya. Mwaciyelezgero, Alfred Edersheim mu buku lake wakati, pambere Yesu wandize, ŵarabi ŵakasora maucimi 456 gha mu Malemba Ghacihebere agho ŵakagomezganga kuti ghakuyowoya za Mesiya, kweni ghanandi mwa maucimi agha ghakuzunura Mesiya mwakudunjika yayi. (The Life and Times of Jesus the Messiah) Para tasanda maucimi 456 agha cikuŵa cakukayikiska usange ghanji ghakuyowoya nadi za Yesu Khristu. Mwaciyelezgero, Edersheim wakati Ŵayuda ŵakawonanga kuti lemba la Genesis 8:11 ni ucimi wakuyowoya za Mesiya. Ŵakaghanaghananga kuti ‘jani la maolive ilo likiza na nkhunda likafuma ku Phiri la Mesiya.’ Mulembi uyu wakazunuraso lemba la Exodus 12:42. Wakalongosora kuti Ŵayuda ŵakapulikiskanga yayi lemba ili, ŵakatenge ‘nga umo Mozesi wakafumira mu mapopa, Mesiya nayo wazamufumira mu Romu.’ Ŵanandi awo ŵakusanda Baibolo ŵangazomerezga yayi kuti malemba ghaŵiri agha ghakuyowoya za Yesu Khristu.

Nanga tingayezga kupenda maucimi ghakuyowoya vya Yesu Khristu agho ghali kufiskika, nchakusuzga nipera kusanga ciŵelengero ceneko. Mwaciyelezgero, cipaturo 53 ca buku la Yesaya, cili na maucimi ghanandi ghakuyowoya za Mesiya. Pa Yesaya 53:2-7 pali maucimi agha: “Walije kaŵiro . . . Wakayuyurika na kukanika na ŵanthu . . . Wayegha vyakuŵinya vithu . . . Wakalasika cifukwa ca zakwananga zithu . . . Wakatoreka kwiza naye nga ndi kanamberere kuyakakomeka.” Kasi maucimi agha ghakwenera kupendeka nga mbucimi umoza, panji uliwose ukwenera kupendeka pawekha?

Wonaniso pa Yesaya 11:1 apo pakuti: “Pamkufuma msisi pa cisinga ca Jese, ndipo munthavi wamkumera kufuma pa misisi yake.” Mu vesi 10, ucimi uwu ukusangikaso na mazgu ghakughana waka. Kasi mavesi ghaŵiri agha ghali na maucimi ghaŵiri panji umoza? Para tikusanda cipaturo 53 na cipaturo 11 ca buku la Yesaya, tikuwona makora kuti mphakusuzga kusanga ciŵelengero ceneko ca maucimi ghakuyowoya za Mesiya.

Ntheura, tingacita makora kuleka kutangwanika na unandi wa maucimi ghakuyowoya za Mesiya agho ghali mu Malemba Ghacihebere. Gulu la Yehova likutiphalira maucimi ghanandi ghakuyowoya za Yesu ndiposo umo ghakufiskikira.a Maucimi agha ghangatovwira comene na kutikhozga para tikucita sambiro la taŵene, la mbumba kweniso para tili mu upharazgi. Nangauli tingamanya yayi unandi weneco wa maucimi ghakuyowoya za Mesiya, kweni tili na ukaboni wakukwana wakuti Yesu ni Khristu panji kuti Mesiya.

[Mazgu ghamusi]