Yesu wakunjira mu Yerusalemu uku wakwera pa mbunda

Kasi Mauchimi Ghakuyowoya vya Mesiya Ghakulongora Nadi Kuti Yesu Wakaŵa Mesiya?

Ivyo Baibolo likuyowoya

Enya. Apo Yesu wakaŵa pa charu chapasi, wakafiska mauchimi ghakuyowoya vya “Mesiya Mulongozgi,” uyo ni “Mponoski wa charu.” (Daniyeli 9:25; 1 Yohane 4:14) Nanga ni pamanyuma pakuti wafwa, Yesu wakalutilira kufiska mauchimi ghakuyowoya vya Mesiya.—Salimo 110:1; Milimo 2:34-36.

Kasi lizgu lakuti “Mesiya” likung’anamura vichi?

Lizgu la Chihebere lakuti Ma·shiʹach (Mesiya) na la Chigiriki lakuti Khri·stos (Khristu) ghakung’anamura “Wakuphakazgika.” Mazgu ghakuti “Yesu Khristu” ghakung’anamura “Yesu Wakuphakazgika,” panji “Yesu Mesiya.”

Mu nyengo yakale, para munthu ŵamupa udindo wapadera kanandi ŵakamupunguliranga mafuta pa mutu kulongora kuti ŵamuphakazga. (Levitiko 8:12; 1 Samuyeli 16:13) Chiuta wakasankha Yesu kuŵa Mesiya ndipo uwu ni udindo wapachanya chomene. (Milimo 2:36) Ndipouli, m’malo mwa kuphakazga Yesu na mafuta, Chiuta wakamuphakazga na mzimu utuŵa.—Mateyu 3:16.

Kasi ŵalipo ŵanthu ŵanyake awo mauchimi ghakuyowoya vya Mesiya ghakufiskika pa iwo?

Yayi. Nga umo vikuŵira kuti chidindo cha munwe chikwimira ŵanthu ŵaŵiri yayi, mauchimi ghakuyowoya vya Mesiya nagho ghakafiskika pa munthu yumoza, Mesiya panji kuti Khristu. Kweni Baibolo likuchenjezga kuti “ntchimi zitesi na ŵanthu ŵakujichema Khristu ŵazamuwuka ndipo ŵazamuchita vimanyikwiro vikuru na vyakuzizwiska, mwakuti usange ntchamachitiko ŵapuluske na ŵakusoleka wuwo.”—Mateyu 24:24.

Kasi Mesiya wazamuwoneka kunthazi?

Yayi. Baibolo likayowoyerathu kuti Mesiya wazamufuma mu mphapu ya Themba Davide la Israyeli. (Salimo 89:3, 4) Ndipouli, mipukutu ya Ŵayuda yakuyowoya vya mzere wa banja la Davide, yikwenera kuti yikasoŵa apo Ŵaroma ŵakaparanya Yerusalemu mu 70 C.E.a Kufuma pa nyengo iyi, ntchakusuzga kusanga ukaboni wakuti munthu munyake ngwakufuma nadi mu banja la Themba Davide. Kweni mu nyengo ya Yesu mipukutu iyi yikaŵako, ndipo pakaŵavya waliyose uyo wakasuska kuti Yesu wakafuma mu mphapu ya Themba Davide.—Mateyu 22:41-46.

Kasi mu Baibolo muli mauchimi ghalinga ghakuyowoya vya Mesiya?

Ntchakusuzga kumanya nambara yeneko ya mauchimi ghakuyowoya vya Mesiya. Mwachiyelezgero, nthowa za umo tingapendera mauchimi zingapambana nanga mpha nkhani iyo yikuyowoya mauchimi ghakupulikikwa makora. Nkhani iyo yili pa Yesaya 53:2-7 yikuzunura vinthu vinandi vyakukhwaskana na Mesiya. Ŵanyake ŵakuwona kuti ivyo vili pa lemba ili ni uchimi umoza, apo ŵanyake ŵakuwona kuti pali mauchimi ghanandi.

Mauchimi ghakuyowoya vya Mesiya agho Yesu wakafiska

Uchimi	Apo ukusangika	Umo ukafiskikira
Wazamufuma mu mphapu ya Abrahamu	Genizesi 22:17, 18	Mateyu 1:1
Wazamufuma mu mphapu ya Yisake mwana wa Abrahamu	Genizesi 17:19	Mateyu 1:2
Wazamubabikira mu fuko la Yuda	Genizesi 49:10	Mateyu 1:1, 3
Wazamufuma mu nyumba ya Themba Davide	Yesaya 9:7	Mateyu 1:1
Wazamubabika mwa mwali	Yesaya 7:14	Mateyu 1:18, 22, 23
Wazamubabikira ku Yerusalemu	Mika 5:2	Mateyu 2:1, 5, 6
Wazamuchemeka Emanuwelub	Yesaya 7:14	Mateyu 1:21-23
Wazamubabikira mu banja likavu	Yesaya 53:2	Luka 2:7
Ŵana ŵazamukomeka para wababika	Yeremiya 31:15	Mateyu 2:16-18
Wazamuchemeka kufuma mu Eguputo	Hoseya 11:1	Mateyu 2:13-15
Wazamuchemeka Munazaretec	Yesaya 11:1	Mateyu 2:23
Thenga lizamunozga nthowa yake	Malaki 3:1	Mateyu 11:7-10
Wazamuphakazgika kuŵa Mesiya mu 29 C.E.d	Daniyeli 9:25	Mateyu 3:13-17
Chiuta wazamupharazga kuti ni Mwana wake	Salimo 2:7	Milimo 13:33, 34
Wazamuŵa na mwamphu pa nyumba ya Chiuta	Salimo 69:9	Yohane 2:13-17
Wazamupharazga makani ghawemi	Yesaya 61:1	Luka 4:16-21
Wazamupharazga mu Galileya ndipo ungweru uzamuŵara	Yesaya 9:1, 2	Mateyu 4:13-16
Wazamuchita milimo yakuzizwiska nga Mozesi	Dotoronome 18:15	Milimo 2:22
Wazamuyowoya vyakufuma kwa Chiuta nga Mozesi	Dotoronome 18:18, 19	Yohane 12:49
Wazamuchizga ŵalwari	Yesaya 53:4	Mateyu 8:16, 17
Wazamukwesana na munthu chara	Yesaya 42:2	Mateyu 12:17, 19
Wazamulengera lusungu ŵakuyuyulika	Yesaya 42:3	Mateyu 12:9-20; Mariko 6:34
Wazamuvumbura urunji wa Chiuta	Yesaya 42:1, 4	Mateyu 12:17-20
Wazamuchemeka Wakupeleka Fundo Wakuzizwiska	Yesaya 9:6, 7	Yohane 6:68
Wazamupharazga zina la Yehova	Salimo 22:22	Yohane 17:6
Wazamuyowoya mu ntharika	Salimo 78:2	Mateyu 13:34, 35
Wazamuŵa Mulongozgi	Daniyeli 9:25	Mateyu 23:10
Ŵanandi ŵazamumugomezga yayi	Yesaya 53:1	Yohane 12:37, 38
Wazamuŵa nga ni libwe lakujitimbako	Yesaya 8:14, 15	Mateyu 21:42-44
Ŵanthu ŵazamumukana	Salimo 118:22, 23	Milimo 4:10, 11
Wazamutinkhika kwambura chifukwa	Salimo 69:4	Yohane 15:24, 25
Wazamunjira mu Yerusalemu uku wakwera pa mbunda	Zekariya 9:9	Mateyu 21:4-9
Ŵana ŵazamumulumba	Salimo 8:2	Mateyu 21:15, 16
Wazamwiza mu zina la Yehova	Salimo 118:26	Yohane 12:12, 13
Wazamupelekeka na mubwezi wake	Salimo 41:9	Yohane 13:18
Wazamupelekeka na ndalama 30 zasilivae	Zekariya 11:12, 13	Mateyu 26:14-16; 27:3-10
Ŵabwezi ŵake ŵazamumuchimbira	Zekariya 13:7	Mateyu 26:31, 56
Ŵazamumuyowoyera mautesi	Salimo 35:11	Mateyu 26:59-61
Wazamuŵazgora yayi	Yesaya 53:7	Mateyu 27:12-14
Ŵazamumuthunyira mata	Yesaya 50:6	Mateyu 26:67; 27:27, 30
Ŵazamumutimba pa mutu	Mika 5:1	Mariko 15:19
Ŵazamumuthyapura	Yesaya 50:6	Yohane 19:1
Wazamuŵeka yayi para ŵakumutimba	Yesaya 50:6	Yohane 18:22, 23
Mathemba gha charu ghazamumuwukira	Salimo 2:2	Luka 23:10-12
Ŵazamumukhoma pa khuni	Salimo 22:16	Mateyu 27:35; Yohane 20:25
Ŵazamuchita mphenduzga pa malaya ghake	Salimo 22:18	Yohane 19:23, 24
Wazamupayikika pamoza na ŵakwananga	Yesaya 53:12	Mateyu 27:38
Wazamuhoyeka na kuneneka	Salimo 22:7, 8	Mateyu 27:39-43
Wazamusuzgikira ŵakwananga	Yesaya 53:5, 6	1 Petrosi 2:23-25
Wazamuŵa nga wasidika na Chiuta	Salimo 22:1	Mariko 15:34
Ŵazamumumweska vinyo lakuŵaŵa	Salimo 69:21	Mateyu 27:34
Wazamuŵa na nyota pambere wandafwe	Salimo 22:15	Yohane 19:28, 29
Wazamuŵikizga mzimu wake kwa Chiuta	Salimo 31:5	Luka 23:46
Wazamufwa	Yesaya 53:12	Mariko 15:37
Wazamupeleka umoyo wake kuwombora ŵanadi	Yesaya 53:12	Mateyu 20:28
Viwangwa vyake ŵazamuviphyora yayi	Salimo 34:20	Yohane 19:31-33, 36
Ŵazamumugwaza	Zekariya 12:10	Yohane 19:33-35, 37
Wazamusungika na munthu musambazi	Yesaya 53:9	Mateyu 27:57-60
Wazamuwuka ku ŵakufwa	Salimo 16:10	Milimo 2:29-31
Msambiri munyake wazamunjira mu malo mwa uyo wakamupeleka	Salimo 109:8	Milimo 1:15-20
Wazamukhala ku woko lamalyero la Chiuta	Salimo 110:1	Milimo 2:34-36

a Buku la McClintock and Strong’s Cyclopedia likuti: “Tikukayika yayi kuti mipukutu yakuyowoya vya mabanja gha Ŵayuda yikasoŵa apo Yerusalemu wakaparanyika.”

b Zina la Chihebere lakuti Emanuwelu, likung’anamura “Chiuta Wali Nase,” ndipo likulongosora makora udindo wa Yesu kuti ni Mesiya. Apo Yesu wakaŵa pa charu chapasi kweniso ntchito izo wakachita mbukaboni wakuti Chiuta wali na ŵanthu awo ŵakumusopa.—Luka 2:27-32; 7:12-16.

c Lizgu lakuti “Munazarete” likwenera kuti likafuma ku lizgu la Chihebere ilo likung’anamura, “mphukira.”

d Kuti mumanye vinandi vyakukhwaskana na mauchimi agho ghakulongora kuti Mesiya wakawonekera mu 29 C.E., wonani nkhani yakuti “Umo Uchimi wa Daniyeli Ukayowoyerathu za Kwiza kwa Mesiya.”

e Uchimi uwu uli mu buku la Zekariya, kweni Mateyu wakati mazgu agha “ghakayowoyeka na ntchimi Yeremiya.” (Mateyu 27:9) Vikuŵa nga kuti buku la Yeremiya ndilo likaŵa pa chigaŵa chakwamba mu Malemba agho ghakuchemeka kuti “Ntchimi.” (Luka 24:44) Apo Mateyu wakazunura za “Yeremiya” wakwenera kuti wakang’anamuranga mabuku ghose agho ghali mu Ntchimi, kusazgapo Zekariya.