Kasi Sanda Iyo Yili ku Turin Ndiyo Ŵakavungamo Yesu Wati Wafwa?

Ivyo Baibolo likuyowoya

Sanda iyo yili ku Turin yikuzunulikapo yayi mu Baibolo. Ŵanandi ŵakughanaghana kuti sanda panji kuti salu iyi ndiyo ŵakavungamo Yesu Khristu wati wafwa. Ntheura, lekani ŵanyake ŵakughanaghana kuti salu iyi njakuzirwa chomene mu mbiri ya chisopa. Salu iyi ŵakuyisunga makora mu tchalitchi linyake ku Turin, Italy.

Kasi Baibolo likuti salu iyo yili ku Turin ndiyo ŵakavungamo nadi Yesu? Yayi.

Wonani vinthu vitatu ivyo Baibolo likuyowoya.

1. Sanda ya ku Turin njitali masentimita 442, mu ufupi na masentimita 113. Yili kubinyilika masentimita 8 mu utali.

   Ivyo Baibolo likuyowoya: Thupi la Yesu ŵakalivunga mu salu yimoza yayi. Mutu wake ŵakawuvunga na salu yinyake. Pamanyuma pakuti Yesu wawuskika, yumoza wa ŵapositole ŵake wakiza ku dindi ndipo “wakawona waka salu.” Baibolo likuyowoyaso kuti: “Salu iyo yikaŵa ku mutu wake yikaŵa pamoza na salu zinyake chara, yikapetekeka na kuŵikika payekha.”—Yohane 20:6, 7.

2. Sanda ya ku Turin yili na madontho gha ndopa gha chitanda chambura kugeziska.

   Ivyo Baibolo likuyowoya: Yesu wakati wafwa, ŵasambiri ŵakanozga thupi lake “nga umo Ŵayuda ŵakachitiranga pakusunga munthu.” (Yohane 19:39-42) Pambere ŵandasunge, muthetho wawo ukaŵa wakuti ŵakageziskanga chitanda na kuchiphaka mafuta kweniso vyakununkhira. (Mateyu 26:12; Milimo 9:37) Ntheura, ŵasambiri ŵa Yesu ŵakwenera kuti ŵakageziska dankha thupi lake pambere ŵandalivunge mu salu.

3. Sanda ya ku Turin yikulongora kuti pali chithuzi cha munthu uyo ŵakamugonekapo mu utali. Ndipo ŵakamugoneka pa hafu ya salu iyi, hafu yinyake yikulongora kuti ŵakamudikiska thupi lose, kwamba ku mutu mpaka ku malundi.”—Encyclopædia Britannica.

   Ivyo Baibolo likuyowoya: Ŵasambiri ŵa Yesu ŵakadumbiskana za nyifwa yake, dindi lambura kanthu, kweniso za ŵakaboni awo ŵakawona na maso ‘mboniwoni ya ŵangelo, awo ŵakati iyo ngwamoyo.’ (Luka 24:15-24) Sanda iyi yiŵenge nadi mu dindi la Yesu mphanyi ŵasambiri ŵakadumbiskana za chithuzi ichi. Kweni Baibolo likuyowoyapo chilichose yayi pa nkhani iyi.

Kasi sanda ya ku Turin tikwenera kuyisopa?

Yayi. Nanga yiŵenge kuti ndiyo ŵakavungamo nadi Yesu, kwate kuŵenge kubuda kuyisopa. Wonani vifukwa ivyo Baibolo likupeleka.

1. Ntchambura kwenelera. Yesu wakati: “Chiuta ni Mzimu, ndipo awo ŵakumusopa ŵakwenera kumusopa mu mzimu na mu unenesko.” (Yohane 4:24) Ŵakhristu ŵaunenesko ŵakugwiliskira ntchito vimanyikwiro yayi pakusopa.

2. Ntchakukanizgika. Malango 10 agho Chiuta wali kupeleka ghakukanizga kusopa vikozgo. (Dotoronome 5:6-10) Mwakuyana waka, Baibolo likuphalira Ŵakhristu kuti: “Kanani vikozgo.” (1 Yohane 5:21) Ŵanyake ŵangayowoya kuti kwa iwo sanda ya ku Turin ntchikozgo yayi kweni ntchimanyikwiro waka cha chigomezgo chawo. Kweni chimanyikwiro chingaŵa chikozgo para ukuchipa ntchindi.a Ntheura usange munthu wakukhumba kukondweska Chiuta wakwenera yayi kupeleka ntchindi ku chinthu chinyake chilichose, nanga yingaŵa sanda.