Yesu Khristu ni Mesiya Uyo Chiuta Wakalayizga

KUTI watovwire kuti timanye Mesiya, Yehova Chiuta wakawovwira ntchimi zinandi kuti zilembe vinthu vyakukhwaskana na uko wazamubabikira, ivyo wazamuchita, na umo wazamufwira. Mesiya uyu ndiyo Chiuta wakalayizga kuti wazamuwombora ŵanthu. Mauchimi ghose agha ghakafiskika pa Yesu Khristu. Ghakafiskika ndendende nga umo ghakalembekera. Tiyeni tiwone mauchimi ghachoko waka agho ghakayowoyerathu za umo Mesiya wazamubabikira kweniso umo wazamukulira.

Yesaya wakayowoyerathu kuti Mesiya wazamubabikira mu mphapu ya Fumu Davide. (Yesaya 9:7) Yesu wakababikira nadi mu mphapu ya Davide.​—Mateyu 1:1, 6-17.

Mika nayo wakayowoyerathu kuti Yesu kunthazi wazamuŵa Fumu kweniso wazamubabikira mu “Betelehemu Efurata.” (Mika 5:2) Apo Yesu wakababikanga, mu Israyeli mukaŵa matawuni ghaŵiri ghakuchemeka Betelehemu. Yinyake yikaŵa pafupi na Nazarete, ndipo yinyake yikaŵa mu Yuda, pafupi na Yerusalemu. Betelehemu uyo wakaŵa pafupi na Yerusalemu ndiyo kale wakachemekanga Efurata. Yesu wakababikira nadi mu tawuni iyi, nga umo uchimi ukayowoyera.​—Mateyu 2:1.

Uchimi unyakeso ukayowoyerathu kuti Mwana wa Chiuta wazamuchemeka kuti ‘wafume mu Eguputo.’ Apo Yesu wakaŵa mwana, ŵakaluta nayo ku Eguputo. Ŵakawerako nayo Herode wakati wafwa. Ntheura uchimi ukafiskika.​—Hoseya 11:1; Mateyu 2:15.

Malemba agho ghalembeka pasi pa kamutu kakuti “Uchimi”, pa tchati icho, ghakulongosora vinthu vyakukhwaskana na Mesiya. Ntheura yaniskani malemba agha na malemba agho ghalembeka pasi pa kamutu kakuti “Umo Ukafiskikira.” Para mwachita nthena, mukhozgenge chipulikano chinu ndipo mugomezgenge kuti Mazgu gha Chiuta ghakuneneska nadi.

Apo mukuŵerenga malemba agha, kumbukani kuti kufuma apo mauchimi agha ghakalembekera, pakajumpha vyaka vinandi kuti Yesu wababike. Yesu wakayowoya kuti: “Vinthu vyose ivyo vili kulembeka mu Dango la Mozesi na mu Ntchimi na Masalimo ivyo vikuyowoya vya ine, vikwenera kufiskika.” (Luka 24:44) Para mungawona mu Baibolo linu, muwonenge kuti mauchimi ghose ghakafiskika nadi ndendende.