Mafumbo Ghakufumira ku Ŵaŵazgi

Kasi tikwenera kulipulikiska wuli lipoti la cilimika ca uteŵeti?

Cilimika cilicose, tikunweka kuwona lipoti la cilimika ca uteŵeti ilo likuŵa mu Uteŵeti Withu wa Ufumu. Nchakukondweska kuwona ivyo ŵanthu ŵa Yehova ŵakufiska pa mulimo wa kupharazga makani ghawemi na kusambizga pa caru cose. Kweni kuti tisange candulo comene na lipoti ili, tikwenera kupulikiska makora umo likulembekera. Wonani vigaŵa vinyake ivi:

Cilimika ca uteŵeti. Cikwamba mu Seputembala mpaka mu Ogasiti cilimika cinyake. Para cilimika ici camara, lipoti lake likulembeka mu Uteŵeti Withu wa Ufumu. Mwaciyelezgero, Uteŵeti Withu wa Ufumu wa Epulero 2011 uli na lipoti la cilimika ca uteŵeti ca 2010, ico cikamba pa Seputembala 1, 2009, mpaka Ogasiti 31, 2010.

Ciŵelengero capacanya ca ŵapharazgi na avireji ya ŵapharazgi. “Ŵapharazgi,” Mbakaboni ŵakubapatizika na ŵambura kubapatizika awo ŵakupharazga. “Ciŵelengero capacanya ca ŵapharazgi” cikutoleka pa mwezi uwo ŵapharazgi ŵanandi ŵapeleka malipoti mu cilimika ico kusazgapo na awo ŵakacedwa kupeleka myezi ghakumasinda. Apa ŵapharazgi ŵanyake ŵangapendeka kaŵiri. Ndipouli, ŵapharazgi awo ŵaluwa kupeleka malipoti ghawo ŵakuŵa pa ciŵelengero ici yayi. Ipo nchakuzirwa kuti mupharazgi waliyose wapelekenge luŵiro malipoti gha mwezi uliwose. “Avireji ya ŵapharazgi” nchiŵelengero ca ŵapharazgi awo mwezi uliwose ŵakupeleka malipoti.

Ciŵelengero cose ca maora. Kuyana na Uteŵeti Withu wa Ufumu wa Epulero 2011, Ŵakaboni ŵa Yehova ŵakamalira maora ghakujumpha 1.6 biliyoni mu uteŵeti wa mu munda. Maora agha kuti ghakusazgapo gha maulendo ghauliska yayi, nesi agho tikuŵa pa maungano, kucita sambiro latekha na kulanguruka.

Ndalama izo zagwiliskika nchito. Mu cilimika ca uteŵeti ca 2010, Ŵakaboni ŵa Yehova ŵakagwiliskira nchito ndalama zakujumpha $155 miliyoni pakupwelelera ŵapayiniya ŵapadera, ŵamishonale na ŵalaŵiliri ŵakwendakwenda. Ndalama izi kuti zikusazgapo izo zikagwira nchito pakusindikizga mabuku yayi, nesi izo zikagwira nchito pakupwelelera ŵabali na ŵadumbu ŵakujumpha 20,000 awo ŵakuteŵetera pa Beteli pa caru cose.

Awo ŵakarya pa Cikumbusko. Ici nchiŵelengero ca ŵapharazgi ŵakubapatizika pa caru cose awo ŵakarya vimanyikwiro vya pa Cikumbusko. Kasi ciŵelengero ici cikulongora unandi wa Ŵakhristu ŵakuphakazgika awo ŵacali pa caru capasi? Viŵi yayi. Pali vifukwa vinandi ivyo vingapangiska ŵanji kughanaghana mwakubudika kuti mbakucanya. Munthu wangarya vimanyikwiro ivi cifukwa ca cigomezgo ca cisopa ico wakaŵamo kale, vifusi, panji cifukwa ca suzgo la maghanoghano. Lekani nchakusuzga kumanya ciŵelengero ceneko ca ŵakuphakazgika awo ŵali pa caru capasi, nakuti nchakwenelera yayi kuti timanye. Wupu Wakulongozga kuti uli na mazina gha wose awo ŵakurya yayi.a

Ico tikumanya nchakuti ŵanji mwa “ŵazga ŵa Ciuta withu” ŵazamuŵa kuti ŵacali pa caru capasi apo mphepo zakuparanya caru zizamulekezgeka. (Uvu. 7:1-3) Mpaka pa nyengo iyo, ŵakuphakazgika ŵalutilirenge kulongozga mulimo ukuru wa kupharazga na kusambizga uwo ukuŵa mu lipoti la cilimika ca uteŵeti.

[Mazgu ghamusi]