Kuŵazga Baibolo Kwanikhozga pa Umoyo Wane Wose

Yikayowoyeka na Marceau Leroy

NKHAMBA kuŵazga Baibolo mwakubisilizga. Mazgu ghakwamba kuŵazga ghakaŵa ghakuti: “Pakudanga Ciuta wakata mtambo na caru.” Cifukwa wuli nkhaŵazganga mwakubisilizga? Adada ŵakagomezganga yayi kuti kuli Ciuta, nkhamanyanga kuti ŵangakondwa yayi kuniwona kuti nkhuŵazga Baibolo.

Nkhaŵa kuti nindaŵazgepo Baibolo, ndipo mazgu gha pa Genesis agha ghakanibenura kumaso. Nkhawona kuti buku ili, likulongosora vinthu vyakukhwaskana na cilengiwa ivyo vikanizizikanga nyengo zose. Pakuti likanikondweska comene, nkhaliŵazga kufuma 8 koloko usiku mpaka 4 koloko mulenji. Uku ndiko kukaŵa kwamba kwa cizgoŵi cakuŵazga Baibolo pa umoyo wane. Lekani nimulongosolerani umo kuŵazga Baibolo kwanikhozgera pa umoyo wane.

“Ukhumbikwirenge Kuliŵazga Zuŵa Lililose”

Nkhababika mu 1926, mu muzi wa Vermelles, uwo muli mgodi wa malasha. Muzi uwu uli ca kumpoto kwa France. Mu nyengo ya nkhondo yaciŵiri ya pa caru cose, boma likakhumbanga comene malasha. Pakuti nkhagwiranga nchito pa mgodi, nkhapona ku nchito ya usilikari. Kweni pakukhumba umoyo uwemi, nkhamba kusambira vya mawayilesi na magesi ivyo vikanisambizga fundo yinyake yakukhwaskana na cilengiwa. Apo nkhaŵa na vilimika 21, munyane ku sukulu wakanipa Baibolo, ndipo wakati, “Buku ili ndakwenelera kuliŵazga.” Nkhati namalizga kuliŵazga, nkhakhorwa kuti Baibolo ni Mazgu gha Ciuta, ndipo likuvumbulira ŵanthu vinthu vinandi.

Nkhapoka Mabaibolo 8 na cilato cakuti ghanyake nkhapeko ŵazengezgani ŵane. Nkhazizwa apo ŵanji ŵakamba kuniseka na kunisuska. Cifukwa ca ivyo ŵakagomezganga, ŵabali ŵane ŵakanicenjezga kuti, “Para wamba kuŵazga buku ili, ukhumbikwirenge kuliŵazga zuŵa lililose!” Nkhambapo kuliŵazga, ndipo nindawonepo suzgo lililose. Cikazgoka waka cizgoŵi ca umoyo wane wose.

Ŵazengezgani ŵanji ŵakati ŵawona umo nkhatemweranga Baibolo, ŵakamba kunipa mabuku gha Ŵakaboni ŵa Yehova. Limoza mwa mabuku agha likaŵa na mutu wakuti, Caru Cimoza, Boma Limoza (One World, One Government).a Mu buku ili nkhasambiramo cifukwa ico Baibolo likuti Ufumu wa Ciuta pera ndiwo ŵanthu ŵakwenera kugomezga. (Mat. 6:10) Nkhaŵikapo mtima comene kuti niphalireko ŵanji cigomezgo ici.

Mubwezi wane Noël ndiyo wakaŵa munthu wakwamba kupoka Baibolo kwa ine. Pakuti wakaŵa Mukatolika, wakaniphalira kuti tikakumane na mwanalume munyake uyo wakasambiranga vya usofi. Nkhacita wofi, kweni pakuti nkhaŵazgapo lemba la Salmo 115:4-8 na Mateyu 23:9, 10, nkhamanya kuti Ciuta wakuzomerezga yayi kugwiliskira nchito vikozgo pakumusopa nesi kuŵacema mazina ghapadera ŵalongozgi ŵa visopa. Ici cikanipa cikanga pakuvikilira cigomezgo cane ciphya. Paumaliro, Noël wakazomera unenesko ndipo ni Kaboni wakugomezgeka mpaka sono.

Nkhapharazgiraso mudumbu wane. Mfumu wake wakaŵa na mabuku gha vyamizimu, ndipo viŵanda vikamusuzganga comene. Nangauli pakwamba nkhajiwona kuti nilije nkhongono, kweni lemba la Ŵahebere 1:14 likanisimikizgira kuti ŵangelo ŵa Yehova ŵanovwirenge. Mulamu wane wakati wamba kulondezga ulongozgi wa mu Baibolo na kuleka cilicose cakukhwaskana na mizimu, viŵanda vikamuleka. Wose iyo na mudumbu wane wakazgoka Ŵakaboni ŵamwamphu.

Mu 1947, Kaboni munyake wa ku America, zina lake Arthur Emiot, wakiza pa nyumba yane. Nkhakondwa ndipo nkhamufumba uko Ŵakaboni ŵakawungananga. Wakaniphalira za kagulu ako kakaŵa ku Liévin, uwo ukaŵa mtunda wa makilomita 10. Pa nyengo iyi cikaŵa cipusu yayi kugura njinga, ntheura kwa myezi yinandi nkhendanga pasi pakuluta ku maungano. Mulimo wa Ŵakaboni ŵa Yehova ukakanizgika kwa vilimika vinkhondi na vitatu mu France. Mu caru ici mukaŵa waka Ŵakaboni 2,380, ndipo ŵanandi ŵakaŵa ŵakufuma ku Poland. Pa Seputembala 1, 1947, tikazomerezgekaso mwa dango mu France. Ofesi ya munthavi yikajulikaso mu Paris ku Villa Guibert. Pakuti mu France mukaŵavya mupayiniya nanga njumoza, Uteŵeti Withu wa Ufumu wa Disembala 1947 ukaŵa na pempho lakuti awo ŵangafiska kupeleka maora ghakukwana 150 pa mwezi, ŵalembeske upayiniya wanyengozose. Mu 1949, maora agha ghakacepeskekako kufika pa 100. Nati nakhorwa kuti ‘mazgu gha Ciuta mbunenesko’ nga umo Yesu wakayowoyera pa Yohane 17:17, mu 1948 nkhabapatizika, ndipo mu Disembala 1949 nkhamba upayiniya.

Kufuma mu Jele na Kuweleraso ku Dunkerque

Kakwamba nkhatumika kukateŵetera ku Agen, kumwera kwa France, uko nkhakhalako nyengo yicoko waka. Pakuti nkhaleka nchito ya pa mgodi wa malasha, mwakuyana na dango nkheneranga kunjira usilikari. Nkhakana, ntheura nkhajalirika mu jele. Nangauli nkhakanizgika kuŵa na Baibolo, kweni nkhaŵa na mapeji ghacoko waka gha buku la Masalmo. Nkhakhozgekanga apo nkhaŵazganga. Nkhati nafumiskika, nkheneranga kusankha cakucita, pakati pa uteŵeti wanyengozose na kukhazikika pa nyumba. Apa napo Baibolo likanovwira. Nkhaghanaghanirapo mazgu gha Paulosi gha pa Ŵafilipi 4:11-13, ghakuti: “Mu vinthu vyose, nili na nkhongono mwa uyo wakunipa nkhongono.” Nkhasankha kulutilira kucita upayiniya. Mu 1950, nkhapika mulimo unyake. Nkhatumikaso ku Dunkerque, msumba uwo nkhapharazgangako pakwamba.

Apo nkhafikanga ku malo agha nkhaŵavya kalikose. Msumba uwu ukanangika comene na nkhondo yaciŵiri, ndipo cikaŵa cakusuzga comene kusanga nyumba yakukhalamo. Nkhaluta kukawona mbumba yinyake iyo nkhatemwanga kuyipharazgira, ndipo mwanakazi wamumbumba iyi wakakondwa comene, ndipo wakati: “Aa, a Leroy, ŵamufumiskani! Mfumu wane wakuti ŵanthu ŵanandi ŵaŵenge nga ndimwe, mphanyi nkhondo kulije.” Ŵakaŵa na nyumba ya bizinesi yakugonamo ŵalendo, ntheura ŵakati nikhalengemo mpaka apo malonda ghambirengeso. Zuŵa lenelili, mukuru wa Arthur Emiot, zina lake Evans wakanilemba nchito.b Wakang’anamuliranga viyowoyero pa dowoko, ndipo wakakhumbanga munthu wakuti walindenge sitima usiku. Evans wakaphalira bwana mulara vya umoyo wane. Nkhaŵa wakughanda comene pakuti nkhaŵa kuti nafuma waka mu jele. Evans wakati wamulongosolera cifukwa ico nkhuwonekera wakughanda, bwana uyu wakati nitoremo cakurya mu furiji. Pa zuŵa limoza, nkhasanga nyumba, nchito, na cakurya. Nkhamba kugomezga comene mazgu gha Yesu gha pa Mateyu 6:25-33.

Malonda ghakati ghambaso mu nyumba iyi, ine na Simon Apolinarski tikamba kupenja nyumba yinyake, kweni tikasimikizga mtima kuti tilutilirenge na uteŵeti. Tikanjira mu nyumba ya mahaci, ndipo tikagonanga pa matiresi ghakucita kupanga waka. Namuhanya tikatandalanga mu uteŵeti. Tikapharazgira mweneko wa nyumba iyi, ndipo wakaŵa yumoza mwa ŵanthu ŵanandi awo ŵakazomera unenesko. Pakajumpha nyengo yitali yayi, nyuzipepara yinyake yikati ŵanthu ŵa mu Dunkerque ŵacenjere na Ŵakaboni ŵa Yehova. Kweni mu Dunkerque mukaŵa ine na Simon na Ŵakaboni ŵanyake ŵacoko waka. Mu nyengo za masuzgo, tikakhozgekanga cifukwa tikaghanaghaniranga za cigomezgo ico Taŵakhristu tili naco ndiposo kuwona umo Yehova wakatipweleleranga. Mu 1952, uteŵeti wane ukasintha, ndipo pa nyengo iyi mu Dunkerque mukaŵa ŵapharazgi 30 ŵakukhazikika.

Nkhakhozgeka na Milimo Yinyake

Nkhati nakhala nyengo yicoko waka mu msumba wa Amiens, nkhatumika ku Boulogne-Billancourt nga mupayiniya wapadera. Nkhaŵa na masambiro ghanandi gha Baibolo, ndipo ŵanji pamasinda ŵakamba upayiniya, na umishonale. Muwukirano munyake, zina lake Guy Mabilat wakazomera kusambira Baibolo, mwakuti wakazakaŵa mulaŵiliri wa dera ndipo pamasinda wakaŵa mulaŵiliri wa cigaŵa. Nyengo yikati yajumphapo wakalaŵiliranga mulimo wa kuŵika makina ghakusindikizgira mabuku pa Beteli iyo yili mu Louvier. Pakuti kanandi nkhudumbiskana na ŵanthu Baibolo, vyanovwira kuti Mazgu gha Ciuta ghasindikizgike mu maghanoghano ghane, niŵe wacimwemwe kweniso kuti luso lwane lwa kusambizga lisazgikireko.

Mwamabuci, mu 1953 nkhimikika kuŵa mulaŵiliri wa dera ku Alsace-Lorraine, cigaŵa ico kaŵiri kose cikawusikapo na Germany, mu vilimika vyapakati pa 1871 na 1945. Ntheura, nkhakhumbikwiranga kumanyako mazgu ghanyake gha Cijeremani. Apo nkhambanga uteŵeti wakwendakwenda, mbanthu ŵacoko waka mu cigaŵa ici awo ŵakaŵa na galimoto, TV, na tayipilayita, nakuti kukaŵavya munthu uyo wakaŵa na wayilesi yakwenda nayo panji kompyuta. Kweni nkhaŵa wacitima yayi panji kuwoneka wapasi. Nakuti nyengo iyi nkhaŵa munthu wakukondwa comene. Mwakukolerana na ulongozgi wa mu Baibolo wa kuŵa na ‘jiso lakulata pa cimoza,’ pa nyengo iyi kukaŵavya vyakutimbanizga vinandi pakuteŵetera Yehova nga umo viliri sono.—Mat. 6:19-22.

Mu 1955, ku Paris kukacitika ungano, uwo ngwambura kuluwika kwa ine, ukaŵa na mutu wakuti “Ufumu uwo Ukutonda.” Ndiko nkhakumana na Irène Kolanski uyo pamasinda tikatorana. Iyo wakamba uteŵeti wanyengozose cilimika cimoza pambere ine nindambe. Ŵapapi ŵake ŵakaŵa ŵa ku Poland, ndipo ŵakaŵa Ŵakaboni ŵa mwamphu kwa nyengo yitali. Ŵakati ŵafika mu France, ku nyumba kwawo kukiza Adolf Weber. Adolf pakwamba wakagwiranga nchito yakupwelelera maluŵa kwa Mbali Russell ndipo wakiza ku Europe kuti wazakapharazge makani ghawemi. Tikatorana na Irène mu 1956, ndipo tikamba kwendera lumoza mu uteŵeti wa dera. Kufuma apo tili kutolerana, wanovwira comene.

Vilimika viŵiri vikati vyajumphapo, mwamabuci nkhimikika kuŵa mulaŵiliri wa cigaŵa. Pakuti ŵalaŵiliri ŵa dera ŵakaŵa ŵacoko, nyengo zinyake nkhacezgerangaso mipingo nga mulaŵiliri wa dera. Pa nyengo iyi, nkhatangwanikanga comene. Padera pa kupharazga maora 100 pa mwezi, sabata yiliyose nkhadumbanga nkhani, kwendera magulu ghatatu gha sambiro la buku, kuwona mafayelo gha mpingo, na kulemba lipoti. Kasi nkheneranga kucita wuli kuti nisange nyengo yakuŵazgira Mazgu gha Ciuta? Nkhawona nthowa yimoza yakuti yinganovwira. Nkhakhucura mapeji ghanyake mu Baibolo lakumara ndipo nkhendanga nagho. Para nkhulindilira munthu uyo tapangana vinthu vinyake, nkhaŵazgangapo mapepara gha. Ivyo nkhaŵazganga pa nyengo iyi, vikanovwira kuti nilutilire kucita uteŵeti uwu.

Mu 1967, ine na Irène tikacemeka kukateŵetera pa Beteli ya ku Boulgne-Billancourt. Nkhamba kuteŵetera ku Dipatimenti Yakulaŵilira Uteŵeti, uko nakhalako vilimika vyakujumpha 40, ndipo ndiko nicali kuteŵetera. Nkhukondwa comene na mulimo wa kuzgora makalata gha ŵanthu awo ŵakukhumba kumanya ivyo Baibolo likusambizga. Nkhusangwa comene kusanda Mazgu gha Ciuta mwa kunyang’amira kuti ‘nikhozgere makani ghawemi.’ (Fil. 1:7) Nkhulongozgaso lemba la zuŵa pambere tindambe kurya cakurya ca mulenji. Mu 1976, nkhimikika kuŵa mu Komiti ya Munthavi ku France.

Nthowa Yiwemi ya Umoyo

Nangauli kumanyuma kose uku takumananga na masuzgo, kweni sono suzgo likuru ilo tili nalo mbucekuru na kulwaralwara, ivyo vikutitondeska kucita vinandi. Ndipouli, kuŵazga Mazgu gha Ciuta kukutovwira kuti tilutilire kuŵa na cigomezgo. Tikuŵa ŵakukondwa kukwera basi kukapharazga ku cigaŵa ca mpingo withu. Ine pamoza na muwoli wane para tasazga pamoza vilimika ivyo tacitira uteŵeti wanyengozose vikujumpha 120, ndipo na mtima wose tikuciska wose awo ŵakukhumba umoyo wakukondweska kuti nawo ŵacite nthena. Apo Themba Davide likalembanga mazgu gha pa Salmo 37:25, likaŵa ‘licekuru,’ ndipo nane “ndilije kuwona murunji kuti wasidika.”

Yehova wanikhozga mu umoyo wane wose kwizira mu Mazgu ghake. Vilimika vyakujumpha 60 ivyo vyajumpha, ŵabali ŵane ŵakati umoyo wane wose nikhalirenge waka kuŵazga Baibolo. Ŵakaneneskanga, ndipo nindawonepo suzgo lililose cifukwa ca kuŵazga Baibolo.

[Mazgu ghamusi]

[Cithuzithuzi pa peji 5]

Ine na Simon

[Cithuzithuzi pa peji 5]

Apo nkhaŵa mulaŵiliri wa cigaŵa

[Cithuzithuzi pa peji 5]

Baibolo lakukozgana na ilo nkhapokera pakwamba

[Cithuzithuzi pa peji 6]

Pa zuŵa la ukwati withu

[Cithuzithuzi pa peji 6]

Ine na Irène tikuŵazga na kusambira Mazgu gha Ciuta pamoza