Kasi Mukuzomerezga Kuti Yehova Waŵe Phande Linu?
“Lutilirani kupenja dankha ufumu na urunji wake, ndipo vinthu vinyake vyose ivi visazgikengeko kwa imwe.”—MAT. 6:33.
1, 2. (a) Kasi “Israyeli wa Ciuta” uyo wakuzunulika pa Ŵagalatiya 6:16 wakwimira anjani? (b) Pa Mateyu 19:28, kasi “mafuko khumi na ghaŵiri gha Israyeli” ŵakwimira anjani?
KASI nchivici cikwiza mu maghanoghano ghinu para mwaŵazga zina lakuti Israyeli mu Baibolo? Kasi mukughanaghana vya Yakobe mwana wa Yisake, uyo pamanyuma wakathyika kuti Israyeli? Panji mukughanaghanira za mphapu yake iyo yikaŵa mtundu wa Israyeli? Wuli pakuyowoya za Israyeli wauzimu? Nyengo zinyake zina lakuti Israyeli likwimira, “Israyeli wa Ciuta” panji kuti ŵa 144,000, awo ŵali kuphakazgika na mzimu utuŵa kuti ŵazakaŵe mathemba na ŵasofi kucanya. (Gal. 6:16; Uvu. 7:4; 21:12) Kweni pa Mateyu 19:28, pakuzunulika za mafuko 12 gha Israyeli. Israyeli uyu wakwimira ŵanthu ŵanyake.
2 Yesu wakati: “Mu kulengaso, para Mwana wa munthu wakhala pa cizumbe cake caucindami, imwe, mwaŵeneimwe mwanilondezga namweso muzamukhala pa vizumbe khumi na viŵiri, kweruzga mafuko khumi na ghaŵiri gha Israyeli.” Mu vesi ili, “mafuko khumi na ghaŵiri gha Israyeli” ghakwimira awo ŵazamweruzgika na ŵakuphakazgika ŵa Yesu, ndipo ŵakulindilira kuzakapokera umoyo wamuyirayira mu Paradiso pa caru capasi. Ŵazamusanga candulo na mulimo uwo ŵa 144,000 ŵazamucita.
3, 4. Cifukwa wuli ŵakuphakazgika nchakuwonerapo ciwemi?
3 Nga umo vikaŵira na ŵasofi ndiposo Ŵalevi, ŵakuphakazgika nawo ŵakuwona kuti uteŵeti wawo nchawanangwa. (Maŵa. 18:20) Ŵakuphakazgika ŵakukhazga kupika malo ghali ghose yayi pano pa caru capasi. Kweni ŵakulindilira kuzakaŵa mathemba na ŵasofi kucanya lumoza na Yesu Khristu. Ŵazamulutilira kuteŵetera Yehova pa mulimo uwu nga umo lemba Uvumbuzi 4:10, 11 likuyowoyera.—Ezek. 44:28.
4 Apo ŵacali pa caru capasi, ŵakuphakazgika ŵakulongora kuti Yehova ni phande lawo. Kuteŵetera Yehova ndico cinthu cakwamba mu umoyo wawo. Ŵakulongora cipulikano mu sembe yakuwombora ya Khristu ndipo ŵakulutilira kumulondezga, ntheura ‘kucemeka na kusoleka kwawo nkhwanadi.’ (2 Pet. 1:10) Ŵakuphakazgika ŵali na maluso ghakuyana yayi, kweniso ŵakusangana na masuzgo ghakupambana. Ndipouli, ŵakusangirapo mwaŵi yayi pa vinthu ivi kuti ŵaleke kucita vinandi mu uteŵeti wa Ciuta. M’malo mwake, ŵakuyezgayezga kuŵika uteŵeti pa malo ghakwamba. Ndipo nchakuwonerapo ciwemi ku awo ŵakulindilira kuzakakhala mu paradiso pa caru capasi.
5. Kasi Ŵakhristu wose ŵangacita wuli kuti Yehova waŵe phande lawo, ndipo cifukwa wuli ici nyengo zinyake cingaŵa cakusuzga?
5 Kwali tili na cilindizga ca kuluta kucanya panji ca kuzakakhala pa caru capasi, tikwenera ‘kujipata na kunyamura khuni lithu lakusuzgikirapo na kulondezga’ Khristu. (Mat. 16:24) Ŵanthu ŵanandi awo ŵakulindilira kuzakakhala mu Paradiso pa caru capasi, ŵakujipata pakusopa Ciuta na kulondezga Khristu. Ŵakukhorwa na vicoko waka yayi apo ŵakumanya kuti ŵangafiska vinandi. Ŵanandi ŵasintha vinthu vinyake pa umoyo wawo mwakuti ŵacite upayiniya. Ŵanji ŵakucita upayiniya mu myezi yinyake cilimika cilicose. Nangauli ŵanji mbapayiniya yayi, kweni ŵakufukafuka mu uteŵeti. Ŵakucita nga ni Mariya uyo wakapungulira Yesu mafuta ghakununkhira. Yesu wakati: “[Mariya] wacita mulimo uwemi kwa ine. . . . Wacita ico wakwaniska.” (Mrk. 14:6-8) Nyengo zinyake cikuŵa cipusu yayi kucita ivyo tingakwaniska, cifukwa tikukhala mu caru ico cikuwusika na Satana. Ndipouli, tikulimbalimba uku tikugomezga Yehova. Wonani umo tikucitira mu vigaŵa vinayi ivi.
Kupenja Dankha Ufumu wa Ciuta
6. (a) Kasi ŵanthu ŵa caru ŵakulongora wuli kuti phande lawo lili mu umoyo uno pera? (b) Cifukwa wuli nchiwemi kuwona vinthu nga ni Davide?
6 Yesu wakasambizga ŵalondezgi ŵake kuti ŵapenjenge dankha Ufumu wa Ciuta na urunji wa Ciuta. Ŵanthu ŵa caru ŵakutemwa kupenja dankha vyakukhumba vyawo cifukwa “phande lawo nda mu umoyo uno.” (Ŵazgani Salmo 17:1, 13-15.) Pakuti ŵakusulako Mlengi wawo, ŵanandi ŵakujipeleka pa kupenja umoyo uwemi, kutora panji kutengwa na kubaba ŵana, ndiposo kuleka viharo. Phande lawo nda umoyo uno pera. Davide wakakhumbisiska kuŵa na “lumbiri luwemi” panji kuti zina liwemi pamaso pa Yehova, nga umo pamasinda mwana wake Solomoni wakaciskira. (Muph. 7:1) Nga ni Asafu, Davide nayo wakawonanga kuti kuŵa paubwezi na Yehova nkhwakuzirwa comene. Wakakondwa kwenda na Ciuta. Mazuŵa ghano, Ŵakhristu ŵanandi ŵakuŵika vinthu vyauzimu pa malo ghakwamba m’malo mwa nchito yakulembeka.
7. Kasi mbali munyake wakatumbikika wuli cifukwa ca kuŵika vinthu vya Ufumu pakwamba?
7 Wonani ivyo wakacita Jean-Claude, wa ku Central African Republic. Ni mbali mulara uyo wali na ŵana ŵatatu. Mu caru ici nchito zikusoŵa comene, ndipo ŵanthu awo ŵali pa nchito ŵakucita cilicose kuti nchito yileke kuŵamalira. Zuŵa linyake, bwana wakaphalira Jean-Claude kuti wambe kugwira nchito yausiku kwamba 6:30 mise zuŵa lililose. Jean-Claude wakalongosora kuti padera pa kupwelelera mbumba yake mwakuthupi, wakuyipweleleraso mwauzimu. Wakayowoyaso kuti wali na mulimo wakovwira mpingo. Kasi bwana uyu wakati wuli? “Usange ukukhumba nchito, ukwenera kuluwako vinthu vinyake vyose, muwoli wako, ŵana ŵako, na masuzgo ghako. Ukwenera kujipeleka na umoyo wako wose ku nchito mbwenu, ku cinthu cinyakeso yayi. Usankhepo pakati pa cisopa cako na nchito.” Kasi muŵenge imwe mphanyi mukacita wuli? Jean-Claude wakamanya kuti para nchito yamumalira, Ciuta wamupwelelerenge. Wakamanya kuti wangacita vinandi mu mulimo wa Ciuta, ndipo Yehova wamovwirenge kupwelelera mbumba yake. Ntheura, wakaluta ku maungano gha mpingo. Zuŵa lakulondezgapo apo wakanozgekeranga kuluta ku nchito, uku wakumanya yayi ico camumucitikira, munyake wa ku nchito wakamwimbira foni kumuphalira kuti bwana nchito yamumalira. Kweni mbali withu wakalutilira na nchito yake.
8, 9. Kasi tingalondezga wuli Ŵalevi na ŵasofi pa nkhani ya kuwona Yehova kuŵa phande lithu?
8 Ŵanji awo nchito yawo yikuwoneka kuti yingamara nyengo yiliyose, ŵangajifumba kuti, ‘Kasi nifiskenge wuli mulimo wa kupwelelera mbumba?’ (1 Tim. 5:8) Kwali muli na suzgo lakuyanako panji yayi, kweni mukumanya kuti usange mukuŵika vinthu vya Ufumu pa malo ghakwamba na kuzomerezga Ciuta kuŵa phande linu, muzamukhuŵarapo yayi. Apo Yesu wakaphaliranga ŵasambiri ŵake kuti lutilirani kupenja dankha ufumu, wakaŵasimikizgira kuti “vinthu vinyake vyose ivi visazgikengeko kwa imwe” kung’anamura cakurya, vyakumwa, panji vyakuvwara.—Mat. 6:33.
9 Ghanaghanirani za Ŵalevi awo ŵakapokako yayi ciharo ca malo. Pakuti kuteŵetera Yehova kukaŵa pakwamba mu umoyo wa Ŵalevi, iwo ŵakagomezganga iyo kuti waŵapenge vinthu vyakuthupi, cifukwa wakaŵaphalira kuti: “Ndine phande lako.” (Maŵa. 18:20) Nangauli tikuteŵetera pa tempele lakuwoneka na maso yayi nga umo vikaŵira na ŵasofi ndiposo Ŵalevi, kweni tingalondezga mzimu wawo, kuŵa na cigomezgo cose kuti Yehova watipwelelerenge. Apo mazuŵa ghaumaliro ghali pafupi kumara, kuthemba Ciuta nkhwakuzirwa comene.—Uvu. 13:17.
Kupenja Dankha Urunji wa Ciuta
10, 11. Pa nkhani ya nchito, kasi ŵanji ŵalongora wuli kuti ŵakugomezga Yehova? Yowoyani ciyelezgero.
10 Yesu wakaciskaso ŵasambiri ŵake kuti ‘ŵalutilire kupenja dankha urunji wa Ciuta.’ (Mat. 6:33) Ici cikung’anamura kuti tikwenera kulongozgeka na fundo za Yehova m’malo mwa maghanoghano gha ŵanthu pa nkhani ya ciwemi na ciheni. (Ŵazgani Yesaya 55:8, 9.) Mungakumbuka kuti ŵanji kale, ŵakalimanga hona panji kuguliska, kusambizga ŵanji nkhondo, kunjira usilikari, kupanga vilwero vya nkhondo na kuguliska. Kweni ŵati ŵasambira unenesko, ŵanandi ŵali kuleka nchito zanthena ndipo ŵali kubapatizika.—Yes. 2:4; 2 Kor. 7:1; Gal. 5:14.
11 Ndivyo Andrew wakacita. Iyo pamoza na muwoli wake ŵakati ŵasambira za Yehova, ŵakasankha kumuteŵetera. Andrew wakaleka nchito iyo wakagwiranga, nangauli wakayitemwanga comene. Cifukwa wuli? Wupu uwo wakagwirangako nchito ukaŵa wa nkhondo, ntheura iyo wakasankha kupenja dankha urunji wa Ciuta. Apo Andrew wakalekanga nchito, wakaŵa kuti wali na ŵana ŵaŵiri, wakaŵavya pakusangira ndalama, ndipo wakaŵa na ndalama zakuti zingamovwira pa myezi yicoko waka. Mukawonero kawunthu, tingati wakaŵavya ‘ciharo.’ Wakamba kupenja nchito yinyake, uku wakugomezga kuti Ciuta wamovwirenge. Para iyo na mbumba yake ŵakukumbukira umo vinthu vikaŵira apo wakalekanga nchito, ŵakukhorwa kuti woko la Yehova ndifupi yayi. (Yes. 59:1) Cifukwa cakuŵa na umoyo wambura kukhumba vinandi, Andrew na muwoli wake ŵakamba uteŵeti wanyengozose. Iyo wakati: “Nyengo zinyake tikenjerwanga cifukwa ca kusoŵa ndalama, nyumba, kulwara, ndiposo ucekuru. Kweni nyengo zose Yehova wakaŵanga nase. . . . Na cigomezgo cose tingati kuteŵetera Yehova nchinthu cakuzirwa comene pa umoyo wa munthu.”a—Muph. 12:13.
12. Kasi nchivici cingatovwira kulondezga fundo za Ciuta? Yowoyani viyelezgero vya ku cigaŵa cinu.
12 Yesu wakaphalira ŵasambiri ŵake kuti: “Usange mungaŵa na cipulikano [nga ni] ukuru wa njere ya sinapi, muyowoyenge ku lupiri ulu, ‘Wukapo pano uye para,’ ndipo luwukengepo, ndipo palije ico ciŵenge cambura macitiko kwa imwe.” (Mat. 17:20) Kasi imwe mungalondezga fundo za Ciuta nanga nipara mukuwona kuti vinthu vinyake vimwenderaninge makora yayi? Usange mukukayika, yowoyani na Ŵakhristu ŵanyinu mu mpingo. Apo ŵakulongosora ivyo iwo vikaŵacitikirapo mukhozgekenge comene mwauzimu.
Kuzirwiska Vinthu Vyauzimu
13. Kasi umoyo withu wauzimu uŵenge wuli para tikulimbikira kuteŵetera Yehova?
13 Para mukuzirwiska uteŵeti winu, mungaŵa na cigomezgo cakuti Yehova wamovwiraninge mwakuthupi ndiposo mwauzimu nga umo wakacitira na Ŵalevi. Ghanaghanirani za Davide. Nangauli wakaŵa ku mphanji, kweni wakagomezganga kuti Yehova ni phande lake. Nase tigomezgenge Yehova nanga tingakumana na suzgo wuli. Kumbukani kuti Asafu wakasanga nkhongono zauzimu wati wanjira “mu malo ghakupatulika gha Ciuta.” (Sal. 73:17) Nase tikwenera kulaŵiska kwa uyo nchisimi cithu cauzimu. Para tingacita nthena, tilongorenge kuti tikuzirwiska mulimo uwo Ciuta watipa nanga tingasangana na masuzgo wuli. Ivi vikulongora kuti tikuzomerezga Yehova kuŵa phande lithu.
14, 15. Kasi tikwenera kucita wuli para ungweru waŵalira pa fundo zinyake za mu malemba, ndipo cifukwa wuli?
14 Kasi mukucita wuli para ungweru waŵalira pa “vinthu vyakunyang’amira vya Ciuta” ivyo vili mu Baibolo? (1 Kor. 2:10-13) Tikwenera kucita nga umo wakacitira Petrosi apo Yesu wakaphalira ŵategherezgi ŵake kuti: “Kwambura kuti mwarya thupi la Mwana wa munthu na kumwa ndopa zake, mulije umoyo mwa imwe mwaŵene.” Cifukwa ca kuleka kupulikiska ivyo wakang’anamuranga, ŵasambiri ŵanandi ŵakati: “Mazgu agha ghakuzizika; ni njani wangaghapulikizga?” Pa cifukwa ici “ŵakawelera ku vinthu vya kumanyuma.” Kweni Petrosi wakati: “Fumu, tilute tiye kwa njani? Imwe muli na mazgu gha umoyo wamuyirayira.”—Yoh. 6:53, 60, 66, 68.
15 Petrosi nayo wakapulikiska yayi ico Yesu wakang’anamuranga apo wakayowoyanga za kurya thupi lake na kumwa ndopa zake. Kweni Petrosi wakagomezga Ciuta kuti wapelekenge ungweru wauzimu. Para paŵa kusintha cifukwa cakuti ungweru wauzimu waŵalira pa nkhani zinyake, kasi mukupulikiska cifukwa cake? (Zinth. 4:18) Ŵanthu ŵa ku Bereya ŵakapokera mazgu “na kunweka kukuru, kusanda Malemba mwakupwelelera zuŵa na zuŵa.” (Mil. 17:11) Para tingacita nga Mbabereya, mbwenu tizirwiskenge mwaŵi wakuteŵetera Yehova, ndipo timuwonenge kuti ni phande lithu nadi.
Kutora Panji Kutengwa mu Fumu Pera
16. Kasi Ciuta wangaŵa wuli phande lithu mwakukolerana na languro ilo lili pa 1 Ŵakorinte 7:39?
16 Ŵakhristu ŵakweneraso kukumbuka fundo za Ciuta pa nkhani ya kutora panji kutengwa “mu Fumu pera.” (1 Kor. 7:39) Ŵanandi ŵasankha kukhala ŵambura kutora panji kutengwa m’malo mwa kuyuyura ulongozgi wa Ciuta uwu. Ciuta wakuŵapwelelera awo ŵakupulikira. Kasi Davide wakacitanga wuli para wawona kuti wali yekha kwambura movwiri? Wakati: ‘Nkhapungulira pamaso pa Ciuta kunyunyuta kwane, na kukonkhoska pakweru lwavyo lwane [masuzgo ghane]. Para lwathika lusoko mukati mu mzimu wane.’ (Sal. 142:1-3) Yeremiya nayo wakwenera kuti wakaŵanga na phukwa cifukwa wakateŵetera Ciuta mwakugomezgeka kwa vilimika vinandi kwambura kutora. Panji mungatemwa kuŵazga nkhani yake mu cipaturo 8, mu buku lakuti Gods Word for Us Through Jeremiah (Mazgu gha Ciuta kwa Ise Kwizira mwa Yeremiya).
17. Kasi mudumbu munyake wambura kutengwa wakutonda wuli suzgo la phukwa?
17 Mudumbu munyake wa ku United States wakati: “Khumbo lane ndakuti nileke kutengwa yayi. Nili wakunozgeka kutengwa cikuru nasanga munthu wakwenelera wakutorana nayo. Amama ŵane awo Mbakaboni yayi ŵakanicicizganga kuti nitengwe waka kwa waliyose uyo wanganisonga. Nkhaŵafumba usange mbakunozgeka kunyamura mphingo iyo yingaŵapo usange nthengwa yane yakatondeka kwenda makora. Kanyengo kakati kajumphapo, ŵakaleka kunicicizga ŵati ŵawona kuti nasanga nchito yakukhazikika, nkhujipwelelera nekha, ndiposo nkhukondwa.” Mudumbu uyu nyengo zinyake wakucita phukwa. Ndipo wakati: “Pa nyengo izi, nkhugomezga Yehova. Wandanijoworepo.” Kasi nchivici cikumovwira kuti wagomezgenge Yehova? Iyo wakati: “Lurombo lukunovwira kuwona kuti Ciuta ngwanadi kwa ine ndiposo kuti nili nekha yayi. Wapacanya Nkhanira wakunitegherezga, ntheura nkhuwona kuti palije cifukwa cakujiwonera kuti ndine wakuyuyuka na wambura cimwemwe.” Kweniso cifukwa ca kumanya kuti “muli kukondwa kukuru mu kupeleka kuluska mu kupokera,” mudumbu uyu wakati: “Nkhuyezgayezga kujipeleka kuti novwire ŵanji, ndipo nkhukhazga kupokera kalikose yayi. Nkhuŵa na cimwemwe ca mu mtima para nkhughanaghanira umo ningawovwilira ŵanji.” (Mil. 20:35) Mudumbu uyu wakuwona Yehova kuŵa phande lake, ndipo wakusangwa na mwaŵi wakumuteŵetera.
18. Kasi Yehova wangaŵa phande linu mu nthowa wuli?
18 Namwe mungazomerezga Yehova kuti waŵe phande linu, nanga musangane na suzgo wuli. Para mukucita nthena, muŵenge pa gulu la ŵanthu awo mbakukondwa. (2 Kor. 6:16, 17) Namwe Yehova waŵenge phande linu, nga umo vikaŵira na ŵanji kumasinda uku. (Ŵazgani Duteronome 32:9, 10.) Nga umo Ciuta wakaŵira phande la Israyeli, namwe wangaŵa phande linu ndipo wangamupwelelerani mwacitemwa.—Sal. 17:8.
[Mazgu ghamusi]
a Wonani Galamukani! ya Novembala 2009, peji 12-14.
Kasi Mungazgora Wuli?
Kasi mungazomerezga wuli Yehova kuŵa phande linu
• para mukupenja dankha Ufumu na urunji wake?
• para mukuzirwiska cakurya cauzimu?
• para mukupulikira dango lake lakutora panji kutengwa mu Fumu pera?
[Mazgu Ghakukhozgera pa peji 13]
Yehova wakuŵa phande lithu para tikuŵika uteŵeti wake pakwamba
[Cithuzithuzi pa peji 15]
Ivyo Yeremiya wakacita vikutikhozga