Ŵaŵazgi Ŵithu Ŵakufumba Kuti . . .

Kasi Ŵabonda Ŵakwenera Kubapatizika?

▪ Victoria wakati: “Nkhacita wofi comene kuti mudumbu wane John wamusuzgika ku malo ghanyake. Cifukwa wuli wakaŵa na wofi? Iyo wakati: “John wakafwa pambere wandabapatizike ndipo wasembe wa Katolika wakati pa cifukwa ici, John walutenge yayi kucanya kweni wakhalilirenge pa malo ghanyake na kusuzgika kwamuyirayira.” Fundo iyi njakofya nadi, kweni kasi njakufuma mu Baibolo? Kasi Baibolo likusambizga kuti ŵana awo ŵafwa kwambura kubapatizika ŵakukakhala ku malo ghanyake na kusuzgika?

Baibolo likusambizga nadi kuti Ŵakhristu ŵakwenera kubapatizika. Yesu wakaphalira ŵalondezgi ŵake kuti: “Mukazgore ŵanthu ŵa mitundu yose kuŵa ŵasambiri, kuŵabapatiza mu zina la Ŵadada na la Mwana na la mzimu utuŵa, kuŵasambizga kusungilira vinthu vyose ivyo namulangulirani.” (Mateyu 28:19, 20) Wonani kuti awo ŵakubapatizika ŵakwenera kuŵa ŵasambiri ŵa Yesu. Ici cikung’anamura kuti ŵakwenera kusambira za Yesu na kusankha kumulondezga. Kasi bonda wangacita ivi?

Ndipouli, ŵanandi ŵakukosera kuti Yesu wakalangura kuti ŵana nawo ŵakwenera kubapatizika. Muliska wa Chalichi la Lutheran, Richard P. Bucher wakati: “Waliyose wakwenera kubapatizika, kusazgapo na ŵana wuwo.” Wakatiso: “Para tikuŵakanira kubapatizika ndikuti tikuŵakanira kuti ŵaleke kugowokereka ndipo para ŵafwa ŵakukasuzgika ku malo ghanyake.” Kweni fundo iyi yikukolerana yayi na visambizgo vya Yesu mu nthowa zitatu.

Yakwamba, Yesu wakasambizgapo yayi kuti ŵana ŵakwenera kubapatizika. Cifukwa wuli fundo iyi njakuzirwa? Yesu wakafwilirapo comene kusambizga ŵasambiri ŵake za ivyo Ciuta wakukhumba. Nyengo zinyake wakawerezgangapo visambizgo vyakuzirwa. Cifukwa wuli? Wakakhumbanga kuti ŵasambiri ŵake ŵapulikiske visambizgo ivyo. (Mateyu 24:42; 25:13; Mariko 9:34-37; 10:35-45) Kweni nanga ni zuŵa limoza wakasambizgapo yayi kuti ŵabonda ŵakwenera kubapatizika. Kasi ndikuti Yesu wakaluwa kuyowoya? Vingacitika yayi. Usange ŵabonda ŵakwenera kubapatizika, mphanyi Yesu wakayowoya.

Yaciŵiri, Yesu wakasambizgapo yayi kuti para munthu wafwa wakukasuzgika. Wakagomezganga fundo yakupulikikwa makora ya mu Malemba yakuti: “Ŵamoyo ŵakumanya kuti ŵafwenge, kweni ŵakufwa kuti ŵakumanya kanthu cara.” (Mupharazgi 9:5) Yesu wakamanyanga kuti para munthu wafwa wakukayuzgika ku malo ghanyake yayi, nesi kukaphya kucanya. Kweni wakasambizga kuti para munthu wafwa wakumanya cilicose yayi, wakuŵa nga wali mu tulo.—Yohane 11:1-14.

Yacitatu, Yesu wakasambizga kuti “wose awo ŵali mu malaro gha cikumbusko” ŵazamuwuka. (Yohane 5:28, 29) Mwambura kukayika, pa ŵanthu awo ŵazamuwuka, pazamuŵaso ŵanthu ŵanandi awo ŵakabapatizika yayi. Para ŵazakawuskika, ŵazamusambizgika ivyo Ciuta wakukhumba na kuzakakhala na umoyo wamuyirayira mu Paradiso pa caru capasi.a—Salmo 37:29.

Nchakuwonekerathu kuti Baibolo likusambizgapo yayi kuti ŵabonda ŵakwenera kubapatizika.

[Mazgu ghamusi]