Cifukwa Wuli Tikwenera Kulondezga Fundo za mu Baibolo?
Kasi ivyo Baibolo likuyowoya pa nkhani ya kugonana ni vyacikale ndiposo vikupangiska ŵanthu kuti ŵaleke kufwatuka? Yayi. Ivyo Baibolo likuyowoya pa nkhani ya kugonana vingatovwira kuti tigege vinthu ivi:
▪ Matenda ghakupilana pa kugonana
▪ Nthumbo zapathengere
▪ Masuzgo agho ghakuŵapo cifukwa ca kumara kwa nthengwa
▪ Njuŵi yiheni
▪ Kujiwona wawakawaka
Yehova Ciutaa uyo ni Mlengi withu, wakukhumba kuti tisangwenge na kusanga candulo pakugwiliskira nchito makora vyawanangwa ivyo watipa. Ciuta ndiyo “wakumusambizgani kuti muwone candulo.” (Yesaya 48:17) Munthu uyo wakulondezga ivyo Baibolo likusambizga pa nkhani ya kugonana wakusanga vyandulo ivi:
▪ Wakutemweka na Ciuta
▪ Wakuŵa na mtende wa mu mtima
▪ Nthengwa yake yikukhora
▪ Wakuŵa na lumbiri luwemi
▪ Wakucindikika
Kweni wuli usange mukulondezga yayi fundo za mu Baibolo pa nkhani iyi? Kasi vingacitika kuti musinthe umoyo winu? Kasi Ciuta wamupaninge mulandu pa nkharo iyo mukacitanga kumanyuma?
Ghanaghanirani fundo iyi: Ŵanji awo ŵakaŵa mu mpingo wakwambilira Wacikhristu pakwamba ŵakaŵa ŵazaghali, ŵaleŵi, ndiposo ŵakagonananga ŵanalume pera panji ŵanakazi pera. Kweni ŵakasankha kusintha umoyo wawo, ndipo ŵakasanga vyandulo vinandi. (1 Ŵakorinte 6:9-11) Mazuŵa ghano, ŵanthu ŵanandi pa caru cose capasi ŵacita nthena. Ŵaleka umoyo wa kugonana na ŵanthu ŵakupambanapambana ndipo ŵasanga vyandulo vinandi pakuŵa na nkharo iyo yikukolerana na fundo za mu Baibolo. Mwaciyelezgero, wonani ivyo wakacita Sarah uyo tamuzunura mu nkhani yakwamba.
“Mwaluŵiro Nkhongono Zikaweleramo”
Sarah wakawona kuti nkharo iyo wakacitanga yikamovwira yayi kuŵa wakukhorwa nesi kumupa wanangwa uwo wakakhumbanga. Iyo wakuti: “Nkhawona kuti njuŵi yane yikanisuzganga. Soni zikanikoranga comene ndipo nkhafipanga mtima kuti panji nitorenge nthumbo panji matenda ghakofya comene. Kweni nkhaleka yayi kugomezga kuti Ciuta waliko, ndipo nkhamanya kuti ivyo nkhacitanga vikamukwiyiskanga. Nkhajiwona kuŵa wakubinkhiskika, ndipo vikaniŵinyanga comene.”
Pamanyuma, Sarah wakasanga nkhongono zakusinthira umoyo wake. Wakapenja wovwiri ku ŵapapi ŵake, awo ŵakaŵa Ŵakaboni ŵa Yehova. Wakapemphaso wovwiri ku ŵalara Ŵacikhristu mu mpingo wa kukwawo. Sarah wakuti: “Nkhazizwa comene na lusungu ndiposo citemwa ico ŵapapi ŵane na ŵalara ŵa mpingo ŵakanilongora. Mwaluŵiro nkhongono zikaweleramo.”
Pasono, Sarah wakulera yekha ŵana ŵake ŵaŵiri. Iyo wakuti: “Nkhuŵabisa yayi ŵana ŵane ivyo nkhasankha. Nkhukhumba kuti ŵamanye umo nkhasuzgikira cifukwa ca kuleka kulondezga fundo za mu Baibolo. Cilato cane nchakuŵawovwira kuti ŵamanye kuti munthu wakusanga vyandulo vinandi para wakulondezga ivyo Baibolo likuyowoya pa nkhani ya kugonana. Namanya kuti Ciuta wakutipa malango gha umo tingakhalira cifukwa cakuti wakukhumba yayi kuti tiwe mu masuzgo.”
Namwe mungasanga vyandulo para mungalondezga ulongozgi wa Ciuta. Baibolo likulayizga kuti: “Vilayizgo vya Yehova nvyakunyoloka, vikusekereska mtima; languro la Yehova ndakutowa, likungweruska maso. . . . Ndipo mu [kulisunga] muli njombe yikuru.”—Salmo 19:8, 11.b
[Mazgu ghamusi]
a Baibolo likuyowoya kuti Ciuta zina lake ni Yehova.
b Kuti musambire vinandi vyakukhwaskana na ivyo Baibolo likusambizga, kumanani na Ŵakaboni ŵa Yehova ŵa mu cigaŵa cinu. Panji lemberani kalata pa adiresi yakwenelera pa peji 4 panji lutani pa Intaneti pa adiresi iyi: www.jw.org.
[Mazgu Ghakukhozgera pa peji 8]
Awo ŵakusulako fundo za mu Baibolo kanandi ŵakupwetekeska ŵanyawo mtima
[Mazgu Ghakukhozgera pa peji 9]
Awo ŵakulondezga fundo za mu Baibolo ŵakuŵa na njuŵi yituŵa ndipo nthengwa zawo zikukhora