Abrahamu—Munthu Wacipulikano
Abrahamu wakimilira kuwaro nausiku. Apo wakalaŵiskanga nyenyezi kucanya, wakaghanaghaniranga za layizgo la Ciuta lakuti mphapu yake yizamwandana nga ni nyenyezi izi. (Genesis 15:5) Nyenyezi zikakumbuskanga Abrahamu layizgo la Yehova. Zikamusimikizgiranga kuti ivyo Yehova wakalayizga vizamufiskika. Usange Yehova wali na nkhongono zakulengera vinthu vyose ivyo vili kucanya, kasi wangatondeka kupangiska kuti Abrahamu na Sara ŵaŵe na mwana? Abrahamu wakaŵa na cipulikano canthena.
KASI CIPULIKANO NCHIVICI? Mwakuyana na Baibolo, “cipulikano” nkhugomezga vinthu ivyo undaviwone. Cigomezgo ici cikuŵapo cifukwa ca maukaboni ghankhongono. Munthu uyo wali na cipulikano mwa Yehova wakugomezga malayizgo gha Yehova, ndipo wakuwona nga kuti ghafiskika kale.
KASI ABRAHAMU WAKALONGORA WULI CIPULIKANO? Abrahamu wakalongora kuti wakagomezganga malayizgo gha Ciuta. Na cipulikano, Abrahamu wakafumako ku caru ico wakababikira, ndipo wakagomezganga kuti Yehova wazamufiska layizgo lake la kumulongora caru cinyake. Na cipulikano, Abrahamu wakendendekanga mu caru ca Kenani, ndipo wakagomezganga kuti mphapu yake yizamuhara caru ici. Na cipulikano, Abrahamu wakapulikira kuti wapeleke Yisake kuŵa sembe, wakagomezganga kuti usange nchakwenelera Yehova wazamumuwuska.—Ŵahebere 11:8, 9, 17-19.
Abrahamu wakaghanaghaniranga vyamunthazi m’malo mwa vyakumasinda. Nangauli Abrahamu na Sara ŵakwenera kuti ŵakakhalanga makora ku Uri kuluska ku Kenani, kweni “ŵakakumbukanga [yayi] malo agho ŵakafumako.” (Ŵahebere 11:15) Ŵakaghanaghaniranga umo Ciuta waŵatumbikirenge ndiposo umo wazamutumbikira mphapu yawo kunthazi.—Ŵahebere 11:16.
Kasi cipulikano ca Abrahamu cikawa pawaka? Cikawa pawaka yayi. Yehova wakafiska layizgo lake lililose. Mphapu ya Abrahamu yikandana na kuŵa mtundu wa Ŵaisrayeli. Nyengo yikati yajumphapo, Ŵaisrayeli ŵakazakakhala mu Kenani, caru ico Yehova wakalayizga Abrahamu.—Joshua 11:23.
KASI TIKUSAMBIRAPO VICI? Nase tingagomezga kuti Yehova wazamufiska malayizgo ghake. Nangauli mu maso gha ŵanthu, malayizgo ghanyake ghangawoneka kuti ghangafiskika yayi, kweni tikugomezga kuti “kwa Ciuta vinthu vyose ni vyamacitiko.”—Mateyu 19:26.
Nkhani ya Abrahamu yikutisambizgaso kuti tingaghanaghaniranga umo vinthu vikaŵira kumanyuma yayi, kweni vinthu ivyo tizamusangwa navyo munthazi. Ivi ndivyo mwanalume munyake zina lake Jason wakasambira. Wakulwara nthenda yakofya comene iyo yili kukoma viŵaro vyake vinandi. Jason wakuti: “Kuyowoya unenesko, nyengo zinyake nkhughanaghanira vyakumasinda.” Wakutiso: “Pali tunthu tucoko comene uto nkhudokera nga ningacita. Nkhudokera nga ningavumbatira muwoli wane, Amanda.”
Ndipouli, Jason wali na cipulikano kuti Yehova wazamufiska malayizgo ghake, kusazgapo layizgo lakuti wazamuzgora caru cose kuŵa paradiso, ndipo ŵanthu ŵakugomezgeka ŵazamuŵa na umoyo wamuyirayira, kwambura vyakuŵinya.a (Salmo 37:10, 11, 29; Yesaya 35:5, 6; Uvumbuzi 21:3, 4) Jason wakuti: “Nkhujikumbuska vinthu viwemi ivyo vizamucitika kunthazi. Nthenda yane iyi yizamumara, kusuzgika maghanoghano kuzamumara, kwenjerwa kuzamumara, kujipa mulandu kuzamumara. Vinthu vyose ivi vizamumalirathu.” Jason wakulongora ciyelezgero ciwemi pa nkhani ya cipulikano nga ncha Abrahamu.
[Mazgu ghamusi]
a Kuti mumanye vinandi vyakukhwaskana na umo caru cizamuŵira paradiso, wonani cipaturo 3, 7, na 8 mu buku la Kasi Baibolo Likusambizgaci Comenecomene? lakupharazgika na Ŵakaboni ŵa Yehova.