Fumbo lakwamba: Kasi Cilato ca Umoyo Wane Nchakuti Wuli?
ROSALIND uyo wakakulira ku England wakakhumbanga kumanya cilato ca umoyo. Wakakhumbangaso kovwira ŵanthu. Wati wamalizga sukulu, wakagwiranga nchito yapacanya yakukhwaskana na kovwira ŵanthu awo ŵakaŵavya pakukhala na awo ŵali na suzgo lakusambira vinthu. Nangauli wakagwiranga nchito yiwemi ndiposo wakaŵa na vinthu vinandi vyakuthupi, iyo wakati: “Kwa vyaka vinandi nkhajifumbanga kuti, ‘Cifukwa wuli nili na umoyo? Ndipo ‘Kasi umoyo uli na candulo wuli?’”
Cifukwa wuli ŵanthu ŵakufumba fumbo ili?
Ŵanthu ŵali nga ni vinyama vyambura kughanaghana yayi. Taŵanthu tingasambirapo kanthu pa vinthu vyakumasinda, kucita mapulani gha munthazi, kweniso tingasanga cilato ca umoyo withu.
Kasi ŵanji ŵakuti wuli?
Ŵanandi ŵakughanaghana kuti cilato cikuru ca umoyo nchakuti ŵasambazge na kumanyikwa na kuŵa ŵakukondwa.
Kasi zgoro ili likulongoraci?
Likuvumbura ivyo tikuŵika pakwamba mu umoyo withu. Likuvumburaso kuti tikuwona vyakukhumba vithu kuŵa vyakuzirwa comene kuluska khumbo la Ciuta.
Kasi Baibolo likusambizgaci?
Themba Solomoni likaŵa lisambazi comene ndipo likakhumbanga kukondwa. Kweni likawona kuti vyose ivi vikaŵavya candulo ceneko. Solomoni wakayowoya ico cingawovwira kuti munthu wasange candulo ceneco mu umoyo. Wakati: “Tiyeni, tipulike umaliro wa makani ghose: Muwope Ciuta, na kusunga malango ghake, cifukwa ici ndico mulimo wose wa munthu.” (Mupharazgi 12:13) Kasi nchivici ico cikukhumbikwa kuti tisungilire malango gha Ciuta?
Ciuta wakukhumba kuti tikondwenge na umoyo. Solomoni wakati: “Kulije kawemi kakumwenelera munthu kwakuluska aka, kuti warye na kumwa na kusangwa mu milimo yake. Nkhawonaso ici kuti cikufumira kwa Ciuta.”—Mupharazgi 2:24.
Ciuta wakukhumbaso kuti titemwenge na kupwelelera mbumba yithu. Wonani ulongozgi wakupulikikwa makora uwo Ciuta wali kupeleka kwa waliyose mu mbumba.
“Ŵafumu ŵatemwenge ŵawoli ŵawo nga ni mathupi ghawo.”—Ŵaefeso 5:28.
“Muwoli nayo wacindikenge comene mfumu wake.”—Ŵaefeso 5:33.
“Mwaŵana, pulikirani ŵapapi ŵinu mu Fumu, pakuti uwu mburunji.”—Ŵaefeso 6:1.
Usange tikulondezga fundo za mu Baibolo izi, tiŵenge ŵakukondwa na ŵakukhorwa. Ndipouli, cinthu cakuzirwa comene ico tingacita nchakuti tisambire vinandi vya Mlengi withu, na kusendelera kwa iyo pakuŵa Mubwezi withu. Nakuti Baibolo likuticiska kuti ‘tisendelere kwa Ciuta.’ Ndipo likutiso, ‘Iyo wasendelerenge kwa ise.’ (Yakobe 4:8) Para mwazomera nchemo iyi, musangenge candulo ceneko mu umoyo winu.
Rosalind uyo wazunulika mu nkhani iyi, wakuti sono wakucimanya cilato ca umoyo. Pa peji 10 mu magazini iyi, muŵazgenge ivyo wakati vikamovwira kusintha kaghanaghaniro kake.