“Makhaliro Ghake Ghambura Kuwoneka Ghakuwoneka Makora Comene”

Kasi mukugomezga kuti Ciuta waliko? Usange mukugomezga, kasi mungapeleka ukaboni? Ukaboni wakuti kuli Mlengi uyo ngwavinjeru, nkhongono, kweniso citemwa uli palipose. Kasi ukaboni uwu ni vici, ndipo tingawugomezga wuli? Kuti tisange zgoro, tiyeni tiwone ivyo Paulosi wakalembera Ŵakhristu ŵa ku Romu.

Paulosi wakati: “Pakuti makhaliro ghake [Ciuta] ghambura kuwoneka ghakuwoneka makora comene kwamba pa kulenga caru kuya munthazi, cifukwa ghakumanyikwa kwizira mu vinthu vyakulengeka, ndiko kuti, nkhongono yake yamuyirayira na Uciuta wake, ntheura ŵalije pakugwenthera.” (Ŵaroma 1:20) Apa fundo ya Paulosi njakuti cilengiwa cikupeleka ukaboni wakuti Mlengi waliko. Tiyeni tisande mazgu agho Paulosi wakayowoya.

Paulosi wakati mikhaliro ya Ciuta yikuwoneka “kwamba pa kulenga caru kuya munthazi.” Mu nkhani iyi, lizgu la Cigiriki ilo lang’anamurika kuti “caru,” likung’anamura caru ceneko yayi, kweni ŵanthu.a Ntheura, Paulosi wakang’anamuranga kuti kufuma pa nyengo iyo ŵanthu ŵakalengekera, ŵakuwona mikhaliro ya Ciuta mu vinthu ivyo wali kulenga.

Ukaboni uwu, uli palipose. Ndipo ‘ukuwoneka makora’ mu ivyo Ciuta wali kulenga. Vilengiwa vyose, vicoko na vikuru vikuvumbura kuti kuli Mlengi uyo ngwapadera comene. Umo Ciuta wali kulengera vinthu, vikuvumbura vinjeru vyake. Nyenyezi na majigha gha mu nyanja vikuvumburaso nkhongono zake. Vyakurya vyakupambanapambana kweniso zuŵa, vikulongora kuti Ciuta wakutemwa ŵanthu.—Salmo 104:24; Yesaya 40:26.

Kasi ukaboni ukuwoneka makora munthowa wuli? Ukaboni uwu ukuwoneka makora comene mwakuti awo ŵakuleka kuwuwona panji awo ŵakukana kuti Ciuta waliko “ŵalije pakugwenthera.” Nkhwantha yinyake yikati: Yelezgerani kuti dilayivala wazerezga cikhwangwani ico pali mazgu ghakuti, “Palije Nthowa, Yendani Kumazere.” Ndipo wapolisi wakumuyimiska na kumupa mulandu. Kweni dilayivala uyu wakuwukana ndipo wakuti wanguciwona yayi cikhwangwani. Cingaŵa cakusuzga kuti wapolisi wagomezge ivyo wakuyowoya, cifukwa cikhwangwani cili pakweru kweniso walije suzgo la maso. Nakuti dilayivala wakwenera kuwona na kulondezga ivyo vili pa vikhwangwani. Ndimoso viliri na ukaboni wa mu cilengiwa. Nawo uli nga “nchikhwangwani” ico cili pakweru. Pakuti ndise vilengiwa ivyo vili na mahara, tikwenera kuwuwona ukaboni uwu. Tilije pakugwenthera.

Cilengiwa cikuvumbura vinandi vya Mlengi withu. Kweniso pali cinthu cinyake ico cikuvumbura vinandi vya iyo. Cinthu ici ni Baibolo. Mu buku ili tingasangamo zgoro la fumbo lakuzirwa ili: Kasi khumbo la Ciuta pakulenga caru na ŵanthu, ndakuti wuli? Para tingamanya zgoro la fumbo ili tiŵenge paubwezi na Ciuta uyo “makhaliro ghake ghambura kuwoneka ghakuwoneka makora comene” mu cilengiwa.