MAFUMBO GHAZGOLEKA

Kasi Baibolo ni Mazgu gha Ciuta nadi?

Baibolo ni Mazgu gha Ciuta ndipo ndapadera. Mabaibolo mabiliyoni ghali kupulintika mu viyowoyero vinandi comene. Fundo zavinjeru za mu Baibolo zili na nkhongono ya kovwira ŵanthu kuti waŵe na nkharo yiwemi.—Ŵazgani 1 Ŵatesalonika 2:13; 2 Timote 3:16.

Tikumanya kuti Baibolo ni buku lakufuma nadi kwa Ciuta, cifukwa likutiphalira ivyo vicitikenge munthazi. Palije munthu uyo wangamanyirathu vyamunthazi. Wonani ivyo vili mu buku la Yesaya. Ciphapha ca buku ili ico cikalembeka pambere Yesu wandize cikasangika mu mphanji pafupi na Nyanja ya Mcere. Pa ciphapha ici pakalembeka kuti mu msumba wa Babuloni muzamukhalaso ŵanthu yayi. Ucimi uwu ukafiskika kale comene Yesu wati waluta kucanya.—Ŵazgani Yesaya 13:19, 20; 2 Petrosi 1:20, 21.

Kasi Baibolo likalembeka wuli?

Pakatora vyaka 1,600 kuti Baibolo lilembeke. Ŵanthu pafupifupi 40 awo ŵakalembako Baibolo, ŵakalemba fundo zakukolerana. Cifukwa wuli? Nchifukwa cakuti ivyo ŵakalembanga vikafumanga kwa Ciuta.—Ŵazgani 2 Samuel 23:2.

Nyengo zinyake Ciuta wakayowoyanga nawo kwizira mu ŵangelo, maloto panji mboniwoni. Ciuta wakaŵaphaliranga waka fundo, ndipo iwo pakulemba ŵakasankha makora mazgu kuti uthenga wake upulikikwe.—Ŵazgani Uvumbuzi 1:1; 21:3-5.