Kasi Mukughanaghana Kuti Baibolo Ni Buku Wuli?

IVYO BAIBOLO LIKUYOWOYA

“Malemba ghose ngakupelekeka na Chiuta kwizira mwa mzimu.”—2 Timote 3:16, Mang’anamuliro gha Charu Chiphya.

VYANDULO IVYO MUNGASANGA PARA MUNGAGOMEZGA KUTI BAIBOLO NI MAZGU GHA CHIUTA

Musangenge mazgoro gha mafumbo ghakuzirwa.—Zintharika 2:1-5.

Musangenge ulongozgi uwo umovwiraninge pa umoyo wa zuŵa na zuŵa.—Salimo 119:105.

Muŵenge na chigomezgo chanadi.—Ŵaroma 15:4.

KASI TINGAGOMEZGA NADI IVYO BAIBOLO LIKUYOWOYA?

Enya. Pali vifukwa vinandi, kweni tiyowoyengepo vitatu:

• Ndakukolerana. Baibolo likatora vyaka vyakujumpha 1,600 kuti lilembeke. Likalembeka na ŵanthu 40. Ŵanandi mwa ŵanthu aŵa ŵakawonanapo yayi. Kweni likuyowoya vimoza kufuma pakwamba m’paka paumaliro. Lili na mutu ukuru umoza!

• Likuneneska pa nkhani ya mdauko. Kanandi ŵanthu awo ŵakulemba mdauko panji kuti mbiri yakale mu charu, ŵakubisa para mtundu panji charu chawo chathereskeka na ŵalwani. Kweni awo ŵakalemba Baibolo ŵakalembanga maubudi ghawo na gha mtundu wawo.—2 Midauko 36:15,16; Salimo 51:1-4

• Mauchimi ghake ghakufiskika. Baibolo likayowoyerathu kuti msumba wa Babuloni uzamubwangandulika. Likayowoya vyaka 200 pambere ivi vindachitike. (Yesaya 13:17-22) Likayowoya umo msumba wa Babuloni uzamuthereskekera. Likayowoyaso zina la uyo wazamuthereska.—Yesaya 45:1-3.

  Mu Baibolo muliso mauchimi ghanyake ghanandi agho ghakafiskika nkhanira ndendende umo Baibolo likayowoyera. Asi ndimo Mazgu gha Chiuta ghakwenera kuŵira?—2 Petrosi 1:21.