Kasi Ufumu wa Chiuta ni Vichi?

IVYO BAIBOLO LIKUYOWOYA

“Chiuta wakuchanya wazamwimika ufumu uwo kuti uzamuparanyika chara.”—Daniyeli 2:44, Mang’anamuliro gha Charu Chiphya.

‘Kwa ise kwapika mwana mwanalume; ufumu uŵenge pa chiŵegha chake.’—Yesaya 9:6.

VYANDULO IVYO MUNGASANGA CHIFUKWA CHA LAYIZGO ILI

• Boma liwemi ilo lingamovwirani sono.—Yesaya 48:17, 18.

• Mu charu chiphya, muzamuŵa na umoyo uwemi wambura masuzgo.—Chivumbuzi 21:3, 4.

KASI TINGAGOMEZGA NADI IVYO BAIBOLO LIKUYOWOYA?

Enya. Pali vifukwa vinandi, kweni tiyowoyengepo viŵiri:

• Ivyo Yesu wakachita vikulongora ivyo Ufumu wa Chiuta uzamuchita. Yesu wakasambizga ŵalondezgi ŵake kuti ŵalombenge kuti Ufumu wa Chiuta wize ndiposo kuti khumbo lake lichitike pano pasi. (Mateyu 6:9, 10) Yesu wakalongora umo Chiuta wazamuzgolera lurombo ulu.

  Apo wakaŵa pa charu chapasi, Yesu wakalyeska ŵanjara, kuchizga ŵalwari, na kuwuska ŵakufwa. (Mateyu 15:29-38; Yohane 11:38-44) Pakuŵa Fumu ya Ufumu wa Chiuta, Yesu wakalongora ivyo Ufumu uwu uzamuchitira ŵanthu para wamba kuwusa.—Chivumbuzi 11:15.

• Vinthu ivyo vikuchitika mu charu mazuŵa ghano, vikulongora kuti Ufumu wa Chiuta uli pafupi kwiza. Yesu wakati para kwakhala pachoko waka kuti Ufumu wize, pa charu chapasi pazamuŵa nkhondo, njara, na vindindindi.—Mateyu 24:3, 7.

  Ivi ndivyo tikuwona mazuŵa ghano. Ntheura tili na chigomezgo kuti Ufumu wa Chiuta uwuskengepo masuzgo ghose sonosono apa.