Kasi Mukughanaghana Kuti Vinthu Viŵenge Wuli Kunthazi?

IVYO BAIBOLO LIKUYOWOYA

“Chiuta . . . wazamufyura masozi ghose ku maso ghawo, ndipo nyifwa yizamuŵakoso yayi. Kuzamuŵavya kutengera panji kulira, kutampha nesi vyakuŵinya. Vinthu vyakale vyafumapo.”—Chivumbuzi 21:3, 4, Mang’anamuliro gha Charu Chiphya.

VYANDULO IVYO MUZAMUSANGA CHIFUKWA CHA LAYIZGO ILI

Ntchito yiwemi kweniso yakukhorweska.—Yesaya 65:21-23.

Umoyo wambura kulwara panji suzgo linyake lililose.—Yesaya 25:8; 33:24.

Umoyo wamuyirayira na kukondwa na mbumba yinu na ŵabwezi ŵinu.—Salimo 37:11, 29.

KASI TINGAGOMEZGA NADI IVYO BAIBOLO LIKUYOWOYA?

Enya. Pali vifukwa vinandi, kweni tiyowoyengepo viŵiri:

• Chiuta wali na nkhongono kuchita ivyo walayizga. Mu Baibolo, ni Yehova Chiuta pera uyo wakuchemeka “Wankhongonozose,” chifukwa wali na nkhongono zambura chigoti. (Chivumbuzi 15:3) Mwantheura, wangachita ivyo walayizga. Wasinthenge charu kuti chiŵe chiwemi. Nga umo Baibolo likuyowoyera, “kwa Chiuta vinthu vyose ni vyamachitiko.”—Mateyu 19:26.

• Chiuta ngwakukhumbisiska kufiska ivyo walayizga. Mwachiyelezgero, Yehova ‘ngwakunweka’ kuwuska ŵanthu awo ŵali kufwa.—Yobu 14:14, 15.

  Baibolo likuyowoyaso kuti Yesu wakachizganga ŵalwari. Chifukwa wuli wakachitanga nthena? Chifukwa wakakhumbanga. (Mariko 1:40, 41) Yesu wakatolera nkhanira ndendende wunthu wa Awiske. Nayo wakakhumbisiskanga kovwira awo ŵakusuzgika.—Yohane 14:9.

  Mwantheura, tikukayika yayi kuti Yehova na Yesu ŵakukhumba kutovwira kuti tizakaŵe na umoyo uwemi kunthazi!—Salimo 72:12-14; 145:16; 2 Petrosi 3:9.