NKHANI YA PA CHIKOPI | KASI UFUMU WA CHIUTA UZAMUMUCHITIRANI VICHI IMWE?

Kasi Ufumu Wa Chiuta Uzamumuchitirani Vichi Imwe?

Mu nkhani izo zajumpha mukwenera kuti mwamanya kuti Ufumu wa Chiuta ngwakuzirwa chomene ku Ŵakaboni ŵa Yehova. Apo mwaŵazganga nkhani izi, mukwenera kuti mwangukondwa chomene kumanya ivyo Ufumu wa Chiuta uzamuchita munthazi. Kweni panji mukukayika usange vinthu ivi vingazakachitika nadi.

Ntchiwemi kughanaghanirapo, m’malo mwakugomezga waka chilichose. (Zintharika 14:15) Ivyo mwachita vingayanako na ivyo ŵanthu ŵa ku Bereyaa ŵakachita. Ŵati ŵaphalirika kakwamba makani ghawemi gha Ufumu ŵakaghapokelera mwakunweka, kweni ŵakakhorwa waka na ivyo ŵakapulika yayi. M’malo mwake ŵakapenjerezga mu Malemba kuti ŵawone “usange vinthu ivi ndimo vikaŵira.” (Milimo 17:11) Iwo ŵakayaniskanga ivyo ŵaphalirika na ivyo Malemba ghakuyowoya. Pamasinda, ŵakakhorwa kuti makani ghawemi ngakufuma nadi mu Mazgu gha Chiuta.

Ŵakaboni ŵa Yehova ŵakumupemphani kuti ndimo namwe muchitirenge. Tikusambira na ŵanthu Baibolo kwambura kulipira. Ntheura ŵanthu ŵakuŵa na mwaŵi wakuyaniska ivyo Ŵakaboni ŵa Yehova ŵakuyowoya na ivyo Baibolo likusambizga.

Padera pakusambira na Ŵakaboni, para namwe musambirenge Baibolo pamwekha, limovwiraninge kuti musange mazgoro gha mafumbo agha:

Kasi taŵanthu tikaŵako wuli?
Kasi chilato cha umoyo ntchakuti wuli?
Chifukwa wuli Chiuta wazomerezga masuzgo?
Kasi chikuchitika ntchivichi para tafwa?
Kasi charu chizamuparanyika?
Kasi ntchivichi chingatovwira kuti tiŵe ŵakukondwa mu mbumba?

Para mukusambira Baibolo ‘musendelerenge kwa Chiuta.’ (Yakobe 4:8) Para muli paubwezi na Yehova, muwonenge kuti Ufumu wa Chiuta umuchitiraninge viwemi chomene, sono kweniso munthazi. Apo Yesu wakalombanga kwa Adada ŵake, wakati: “Kuti ŵaŵe na umoyo wamuyirayira, ŵakwenera kumumanyani imwe Chiuta waunenesko yekha, ndiposo Yesu Khristu, uyo mukamutuma.”—Yohane 17:3.

Ŵakaboni ŵa Yehova ŵangamovwirani na magazini yeneyiyi kuti mumanye vinandi kufuma mu Baibolo.

Kuti musambirenge Baibolo kwambura kulipira, phalirani Kaboni wa Yehova waliyose, panji lembani fomu iyo yili pa www.jw.org. (Wonani pa peji lakwambira pa mazgu ghakuti, PEMPHANI KUTI MUSAMBIRENGE BAIBOLO)

a Bereya ni tawuni iyo yikaŵa ku Makedoniya.

Chifukwa Wuli Folake Wakutemwa Ufumu wa Chiuta?

Folake ni msungwana wa vyaka 10. Sonosono apa ku sukulu kwawo ŵakaŵatuma kuti ŵalembe nkhani pa mutu wakuti, “Icho Nkhutemwa Chomene mu Charu Ichi.” Iyo wakasankha kulemba chifukwa icho wakutemwera kuphalirako ŵanji vya Ufumu wa Chiuta.

Wakamba kuti: “Ufumu wa Chiuta ni boma lanadi. Kweni tingaliwona yayi nanga tingavwara magilasi.”

Wakalembaso vitumbiko ivyo vizamuŵa mu Ufumu ivyo iyo wakulindilira. Wakazunurapo masuzgo agho ghazamumara mu Ufumu wa Chiuta. Wakati: “Chitima chikunikora kuwona ŵanthu awo ŵalije pakukhala ŵakwendendeka waka” kweniso “kuwona kuti ŵana ŵakufwa pa charu chose chifukwa cha njara.” Iyo wakatiso: “Kweni nkhukondwa para nkhuŵazga Yesaya 65:21.” Lemba ili likulayizga awo ŵazamuŵa mu Ufumu uwu kuti: ‘Ŵanthu ŵane ŵazamuzenga nyumba na kukhalamo, ŵazamupanda mpheska na kurya vipasi vyake.’

Folake wakayowoyaso kuti mu Ufumu wa Chiuta muzamuŵavya ulwari. Mu nkhani yake wakakora mazgu gha pa Uvumbuzi 21:4, apo pakuti Chiuta “wazamufyura sozi lililose ku maso ghawo, ndipo nyifwa yizamuŵakoso chara, nesi kutengera panji kutampha nesi vyakuŵinya vizamuŵakoso chara.” Iyo wakamalizga na fundo yakuti icho wakutemwa chomene nkhuphalirako ŵanji vya Yehova na Ufumu wake. Uwu mbukaboni wakuti kasungwana aka kakutemwa chomene Ufumu wa Chiuta.