“Munthu wa Mtima wa Kupa Watumbikikenge”

ŴANTHU ŵakamba ni kale kupeleka sembe panji kuti vyawanangwa. Vinthu ivi ni vyakuzirwa chomene pa kusopa kwaunenesko. Ŵaisrayeli ŵakapelekanga sembe za nyama, ndipo Ŵakhristu ŵakupeleka “sembe ya malumbo.” Kweni pali sembe zinyake izo zikukondweska chomene Chiuta. (Heb. 13:15, 16) Tikutumbikika kweniso tikuŵa ŵakukondwa chifukwa cha sembe izi. Wonani umo ŵateŵeti ŵanyake ŵakatumbikikira.

Hana uyo wakaŵa muteŵeti wakugomezgeka, wakakhumbanga chomene mwana mwanalume kweni wakababanga yayi. Wakalomba kwa Yehova kuti para wangababa mwana mwanalume ‘wazamumupeleka kwa Yehova mazuŵa ghose gha umoyo wake.’ (1 Sam. 1:10, 11) Pakati pajumpha nyengo, Hana wakaŵa na nthumbo ndipo wakababa mwana mwanalume uyo wakamuthya Samuyeli. Wakati waleka bele, Hana wakamutora Samuyeli na kuluta nayo ku chihema nga umo wakalayizgira Yehova. Yehova wakamutumbika Hana chifukwa cha mzimu wakujipeleka. Wakababaso ŵana 5, ndipo Samuyeli wakaŵa ntchimi kweniso wakalembako Baibolo.—1 Sam. 2:21.

Nga ni Hana na Samuyeli, Ŵakhristu mazuŵa ghano ŵali na mwaŵi wa kuteŵetera Mlengi wawo. Kweniso Yesu wakalayizga kuti Yehova watitumbikenge pa chilichose icho tikuchita pa kumusopa.—Mrk. 10:28-30.

Mu nyengo ya Ŵakhristu ŵakwambilira, pakaŵa Mkhristu munyake zina lake Dorika. Iyo wakamanyikwanga chomene chifukwa “wakachitanga milimo yiwemi na kupeleka vyawanangwa” ku ŵanthu. Chachitima ntchakuti “wakalwara na kufwa,” ndipo mpingo wose ukaŵa na chitima. Ŵasambiri ŵati ŵamanya kuti Petrosi wali mu chigaŵa icho Dorika wakafwira, ŵakamupempha kuti walute ku nyumba iyo ŵakamugoneka. Ŵanthu ŵakakondwa chomene Petrosi wati wamuwuska Dorika. Iyi ni nkhani yakwamba mu Baibolo kuti mpositole wawuske munthu. (Mil. 9:36-41) Chiuta wakuluwa yayi ivyo Dorika wakachitanga. (Heb. 6:10) Dorika wakaŵa wakupa, ndipo nkhani yake yili kulembeka mu Baibolo kuti tisambireko na kuchita nga ndiyo.

Mpositole Paulosi nayo wakapeleka nyengo na nkhongono zake kuti wawovwire ŵabali, ndipo tingasambirako. Paulosi wakalembera Ŵakhristu ku Korinte kuti: “Ine nili wakunozgeka kutaya vyane vyose na kujipeleka nkhanira chifukwa cha umoyo winu.” (2 Kor. 12:15) Paulosi wakasambirapo kanthu pa ivyo vikamuchitikira. Wakasambira kuti para munthu wajipeleka kuti wawovwire ŵanyake, wakuŵa wakukondwa. Kweni chakuzirwa chomene ntchakuti Yehova wakumutumbika ndipo wakukondwa nayo.—Mil. 20:24, 35.

Yehova wakukondwa chomene para tikugwiliskira ntchito nyengo na nkhongono zithu kuti tilutiske panthazi vinthu vya Ufumu, na kovwira Ŵakhristu ŵanyithu. Kweni kasi pali vinyake ivyo tingachita kuti tovwirepo pa ntchito yakupharazga? Enya. Padera pa nyengo na nkhongono zithu, tingamuchindika Chiuta para tikupeleka vyawanangwa. Vyawanangwa ivyo tikupeleka vikovwira pa ntchito yakupharazga iyo yikuchitika pa charu chose, kovwira ŵamishonale, na awo ŵakuchita uteŵeti wapadera wanyengozose. Vyawanangwa vikovwiraso kuti tiŵe na mabuku na mavidiyo. Vikovwiraso para kwachitika masoka ghachilengiwa, kweniso pa ntchito yakuzenga Nyumba za Ufumu. Baibolo likutisimikizgira kuti “munthu wa mtima wa kupa watumbikikenge.” Kweniso tikuchindika Yehova para tikumupa vinthu vyakuzirwa.—Zinth. 3:9; 22:9.

Umo Ŵanyake Ŵakupelekera Vyawanangwa Vya Mulimo Wa Pa Charu Chose

Nga ni mu nyengo ya mpositole Paulosi, ŵanandi mazuŵa ghano ‘ŵakuŵika kanthu padera,’ panji kupangirathu bajeti ya ndalama zakuti ŵakaponye mu bokosi la, “Vyakupeleka vya Mulimo wa pa Charu Chose.” (1 Kor. 16:2) Mwezi uliwose, mipingo yikutumizga vyakupeleka ivi ku ofesi ya Ŵakaboni ŵa Yehova ya mu charu chawo. Kweniso mungatuma mwekha vyawanangwa vinu ku wupu wakuzomerezgeka na dango wa Ŵakaboni ŵa Yehova mu charu chinu. Kuti mumanye zina la wupu uwo Ŵakaboni ŵa Yehova mu charu chinu ŵakugwiliskira ntchito, fumbani ofesi ya munthavi. Adiresi ya ofesi mungayisanga pa www.jw.org. Kuyana na uko mukukhala, vyawanangwa ivyo mungatumizga mwekha ni ivi:

VYAWANANGWA IVYO VIKUWEZGEKA YAYI

Mungapeleka vyawanangwa ivi kwizira ku banki, kweniso debit card, panji credit card. Ku maofesi ghanyake gha Ŵakaboni ŵa Yehova, mungapeleka vyawanangwa pa jw.org, panji pa webusayiti yinyake.
Mungapelekaso ndalama, majuda, panji katundu munyake. Pakupeleka vinthu ivi, lembani kalata yakulongosora kuti vyawanangwa ivi kuzakaniwezgera yayi.

VYAWANANGWA IVYO VIKUWEZGEKA PARA MWENEKO WAVIKHUMBA

Ni ndalama izo zikupelekeka ndipo zingawezgeka usange mweneko wazikhumba.
Pakupeleka ndalama izi mulembe kalata yakulongosora kuti mungazakazikhumba nyengo yinyake.

VYAWANANGWA VINYAKE IVYO MUNGAPELEKA

Padera pa kupeleka ndalama na katundu munyake, paliso nthowa zinyake izo mungawovwilirapo pa ntchito ya Ufumu ya pa charu chose. Nthowa izi zili pasi apa. Pa nthowa yiliyose iyo mungatemwa kupelekera vyawanangwa vinu, chakwamba fumbani ofesi ya munthavi iyo yikulaŵilira mulimo mu charu chinu kuti mumanye nthowa izo zilipo mu charu chinu. Pakuti charu chilichose chili na malango ghake gha misonkho, ntchakuzirwa kuti mufumbe dankha awo ŵakumanya malango gha misonkho na gha charu pambere mundasankhe nthowa yakupelekera vyawanangwa iyo njiwemi kwa imwe.

Inshuwalansi: Mungalembeska kuti wupu uwo Ŵakaboni ŵa Yehova ŵakugwiliskira ntchito ndiwo uzakapike ndalama zinu za inshuwalansi panji za penshoni.

Maakaunti gha ku Banki: Mungalembeska kuti wupu uwo Ŵakaboni ŵa Yehova ŵakugwiliskira ntchito ndiwo uzakatore ndalama izo muli kusungiska ku banki. Pakuchita ivi, mukwenera kulondezga malango gha mabanki gha mu charu chinu.

Masheya: Mungapeleka masheya agho muli nagho ku kampani nga ntchawanangwa ku wupu uwo Ŵakaboni ŵa Yehova ŵakugwiliskira ntchito. Kweniso mungalemba kuti para mwafwa wupu uwu ndiwo uzakatore masheya ghinu.

Malo na Nyumba: Mungapeleka malo panji nyumba nga ntchawanangwa ku wupu uwo Ŵakaboni ŵa Yehova ŵakugwiliskira ntchito. Vinthu ivi viŵe vyakuti vingaguliskika. Usange ni nyumba iyo mukukhalamo, mungalutilira kukhalamo apo muchali ŵamoyo.

Chuma Icho Chikhalenge Para Mwafwa: Mungalemba wilu yakuzomerezgeka na boma kuti wupu uwo Ŵakaboni ŵa Yehova ŵakugwiliskira ntchito uzakapike katundu panji ndalama zinu para mwafwa. Para wilu yinu mwalemba kuti wupu wa chisopa ndiwo uzakapokere chuma chinu, mukulipira msonkho ukuru yayi.

Mazgu ghakuti “vyawanangwa vinyake ivyo mungapeleka,” ghakulongora kuti uyo wapelekenge vyawanangwa ivi wakunozgekera. Awo ŵakukhumba kupeleka vyawanangwa ivi ku mulimo wa pa charu chose wa Ŵakaboni ŵa Yehova, ŵaŵazge burosha la mutu wakuti, Charitable Planning to Benefit Kingdom Service Worldwide. Burosha ili lili mu Chingelezi na Chisipanishi. Ndipo likulongosora umo ŵanthu ŵangapelekera vyawanangwa mu nthowa zakupambanapambana, kwali apo ŵachali ŵamoyo panji kuti vizakapelekeke para ŵafwa. Nyengo zinyake, fundo izo zili mu burosha ili zingayana viŵi yayi na umo vinthu viliri mu charu chinu chifukwa malango gha misonkho ndiposo malango ghanyake ghakupambana. Mwakugwiliskira ntchito nthowa izi, ŵanandi ŵawovwirapo pa mulimo withu kweniso wakovwira ŵanthu ŵakusoŵerwa pa charu chose ndipo ŵachepeskako msonkho uwo ŵakuŵadumura. Usange mu charu chinu burosha ili lilimo, mungapempha kwa mulembi wa mpingo winu.

Kuti mumanye vinandi, mungalemba kalata panji kwimba telefoni ku ofesi ya munthavi ya mu charu chinu.