Bokosi la Fumbo
◼ Kasi tikwenera kucita wuli para mu uteŵeti tasangana na munthu uyo ni mwanalume panji mwanakazi munyithu yayi, panji tenda na mudumbu panji mubali uyo ni mfumu panji muwoli withu yayi?
Tikugomezga kuti ŵabali na ŵadumbu ŵithu ŵakusungilira mikhaliro yiwemi. Ndipouli, tikukhala mu caru cikazuzi ico cikuzomerezga vinthu viheni. Nangauli tingaŵa na vilato viwemi, kweni tikwenera kucenjera kuti tileke kutukiska zina la Yehova.
Kanandi para tili mu uteŵeti, tikusanga ŵanthu ŵakunweka awo mbanalume panji mbanakazi ŵanyithu yayi. Para tili tekha, ndipo tasanga munthu uyo ni mwanalume panji mwanakazi munyithu yayi, nchiwemi kudumbiskana nayo pawaro kuluska kunjira munyumba. Para ngwakunweka, tingapangana nayo kuti tikizeso na munyithu panji para ŵamumbumba yake ŵalipo. Kweni para vingacitika yayi, nchiwemi kuti tilekere munthu uyo ni mwanalume panji mwanakazi munyake. Ndimo tikweneraso kucitira para tikusambira Baibolo na munthu uyo ni mwanalume panji mwanakazi munyithu yayi.—Mat. 10:16.
Kweniso, tikwenera kucenjera para tikusankha munthu wakuti tende nayo mu uteŵeti. Nangauli nyengo zinyake ŵapharazgi ŵangendera lumoza na mubali panji mudumbu uyo ni muwoli panji mfumu wawo yayi, kweni ŵakwenera kucita nthena para mphagulu. Nchiwemi yayi kupharazga kwatekha na munthu uyo ni mfumu panji muwoli withu yayi. Ntheura mubali uyo wakugaŵa ŵapharazgi wakwenera kucita mwamahara. Wakweneraso kucita nthena para wakugaŵa ŵawukirano.
Para nyengo zose tikucita vinthu mwamahara, tizamuŵa “cakukhuŵazga cara mu nthowa yiliyose,” ku ŵabali na ŵanji.—2 Kor. 6:3.