Bokosi la Fumbo

◼ Kasi waliyose wangawovwira wuli kuti tisangenge candulo na maungano gha mpingo? (Dute. 31:12)

Tose tikuciskika kuti tifikenge mwakutendekera pa maungano gha mpingo na kunozgeka kusambizgika na Yehova. Para tikucita nthena, tikulongora kuti tikucindika comene Yehova ndiposo maungano agho wakutinozgera. Nchiwemi comene kuti tikhalenge pa mipando yakunthazi para tafika waka, mwakuti awo ŵali na ŵana ndiposo awo nyengo zinyake ŵakwiza mwakucedwa ndiwo ŵakhalenge kumanyuma. Pambere maungano ghandambe, tikwenera kucuna foni zithu kuti zileke kutimbanizga ŵanji. Vyakutimbanizga vicepenge para tose tikuzirwiska maungano.—Muph. 5:1; Fil. 2:4.

Para ŵakunweka ŵamba kuwungana, uyo wakuŵamanya makora wangajipeleka kukhala nawo lumoza. Ici cingaŵa cakovwira comene para ŵali na ŵana ŵacoko. Mutepanji nkhakwamba kuti ŵasangike pa maungano ghithu. Usange ni nthena, ŵangatemwa kuti ŵakhale kumanyuma mwakuti ŵaleke kutimbanizga ŵanji para ŵakufuma kuti ŵakapwelelere ŵana ŵawo. (Zinth. 22:6, 15) Mbumba izo zili na ŵana ŵacokoŵacoko zikwenera yayi kukhala kuwaro kwambura cifukwa cakupulikikwa. Nchiwemi yayi kuti ŵana ŵakhalenge kuwaro na cilato cakuti ŵapangenge makora vyongo. Cikuŵa ciwemi comene kuti mupapi wacenye panji kovwira ŵana ŵake kuwaro kwa Nyumba ya Ufumu na kunjiraso nawo.

Ŵalinda ŵakovwira kuti pa malo ghakusoperapo paleke kuŵa vyakutimbanizga. Ŵakovwira mbumba ndiposo ŵanji awo nyengo zinyake ŵakwiza mwakucedwa kuti ŵasange malo ghakukhala. Ŵalinda ŵakumanya makora umo ŵangawovwilira ŵanji kuti ŵasange malo ghakukhala kwambura kutimbanizga ŵanyawo. Ŵakucita mwamahara usange pangaŵa cakutimbanizga cinyake. Usange mwana wamba kusuzga na kutimbanizga ŵanji, ŵalinda ŵangawovwirapo.

Waliyose uyo wiza pa maungano wangacitapo kanthu kuti ghatovwire kusambira vya Yehova ndiposo khumbo lake la kuzakapanga caru ciphya ca urunji.—Heb. 10:24, 25.