Bokosi la Fumbo

◼ Tingacitaci kuti tisungenge nyengo pa maungano gha mpingo?

Nyengo yikwenda luŵiro comene para tikuphalira ŵabwezi ŵithu vinthu viwemi. Ntheura, cingaŵa cakusuzga kumalizga pa nyengo yake nkhani iyo tapika. Ipo nchivici cingatovwira?

Yambani pa nyengo yake. Pa nyengo ya maungano, cingaŵa cakovwira kupempha ŵategherezgi kuti ŵakhale pasi para kwakhala miniti yimoza panji ghaŵiri mwakuti maungano ghambe pa nyengo yake. (Muph. 3:1) Maungano gha ŵanthu ŵacoko, nga ni ungano wa kunozgekera uteŵeti wa m’munda ghakwenera cara kwamba mwakucedwa cifukwa ca kulindilira awo ŵacedwa.

Nozgekerani mwakukwana. Kunozgekera makora kukovwira comene kuti tileke kurya nyengo. Manyani cilato ca nkhani yinu. Manyani fundo zikuru ndipo mukazididimizge. Lekani kusuŵilira na fundo zambura kuzirwa. Yowoyani mu nthowa yipusu. Para nkhani yinu yili na viyezgelero panji cigaŵa cakuti mufumbe ŵabali, yezgelerani mwakutendekera. Para nchamacitiko, yezgelerani kudumba nkhani yinu mwakukwezga, uku mwathyera nyengo.

Gaŵani nkhani yinu. Kwali nkhani yinu mwamuyowoya mwekha panji kudumbiskana na ŵategherezgi, nchakovwira kuyigaŵa. Gaŵani nyengo iyo mungamalira pa cigaŵa cilicose, ndipo yilembani mumphepete mwa autilayini. Ndipo apo mukudumba nkhani yinu, mulondezgenge nyengo iyo mwalemba. Para mukuyowoya nkhani yakudumbiskana na ŵabali, lekani kumalira nyengo yinandi pa ndime zakwambilira cifukwa nyengo yingamumalirani ndipo mungambalambazga waka ndime zakunthazi. Awo ŵakucitiska Sambiro la Gongwe la Mulinda ŵakwenera kusidako nyengo yakukwana ya kuweleramo bokosi ilo likuŵa paumaliro wa sambiro. Ŵakweneraso kupwelelera comene kuti ŵaleke kurya nyengo ya sumu yakujalira ndiposo lurombo.

Malizgani pa nyengo yake. Para ungano uli na vigaŵa vinandi, nga ni Ungano wa Uteŵeti, muyowoyi waliyose wakwenera kumanya apo nkhani yake yambirenge na apo yimalirenge. Kasi mukwenera kucitaci usange munyake warya nyengo? Mbali yumoza panji kujumpha apa wangawezgerapo nyengo iyo yaryeka mwa kuyowoya waka fundo zikuru na kuleka fundo zinyake. Kucita nthena nchilongolero cakuti ni msambizgi waluso.

Taŵategherezgi nase tingawovwira mbali uyo wakufumba mafumbo mwa kuzgora mwakudumura ndiposo mwakudunjika. Ntheura, tose tingawovwirapo kuti maungano ghacitikenge “mwakwenelera ndiposo mu ndondomeko.”—1 Kor. 14:40.