Kukhozgera Mulimo wa Kupharazga wa pa Caru Cose

Baibolo likayowoyerathu kuti mu “mazuŵa ghaumaliro” ŵanthu ŵakumanenge na “nyengo zinonono na zakusuzga.” (2 Tim. 3:1-5; 2 Pet. 3:3-7) Suzgo la ndalama ilo likuhenipirahenipira pa caru cose nchilongolero cakuti tili mu mazuŵa ghaumaliro. Ntheura nchiwemi kuti tiwone umo tingalutilira kovwira pa mulimo wa kupharazga pa caru cose ndiposo kusanga nthowa zinyake izo tingapelekera vyawanangwa.

◼ Umo Gulu la Yehova Likusangira Ndalama: Gulu la Yehova ndisambazi yayi nga umo ŵanthu ŵakuyowoyera. Mu gulu ili muli ŵanthu awo mbasambazi comene yayi kweni mbacitemwa ndipo ŵakughanaghanira ŵanji. Ŵakupatura nyengo yawo na kupeleka ivyo ŵali navyo. Nyengo zinyake cingaŵa cakusuzga comene kusanga ndalama zakovwilira pa mulimo wa kusindikizga mabuku uwo ukukulirakulira, zakovwilira awo masoka ghaŵawira, zakuzengera Nyumba za Ufumu, ndiposo milimo yinyake iyo yikucitika pa caru cose. Ndimo vikaŵiraso pa nyengo iyo Nehemiya wakamba mulimo wa kuzengaso linga la Yerusalemu. Ukawonekanga kuti ni mulimo unonono comene. (Neh. 4:10) Kweni mulimo uwu ukacitika makora cifukwa cakuti mbumba zinandi zikajipeleka. Lero napo, waliyose wangasanga nthowa zakovwilira pa milimo yakupambanapambana iyo yikucitika pa caru cose.

◼ Waliyose Wali na Udindo wa Kukhozgera Ufumu: Pakuti Yehova wakumanya ivyo vili mu mtima withu ndiposo umo tikusangira, wakuwonga para tikumupa ivyo tingakwaniska, kwali ni vicoko panji vinandi. Pa nkhani iyi Yesu wakalongora makora umo Ŵawiske ŵaliri. Kumbukani nkhani ya mu Baibolo ya cokoro ico cikapeleka ndalama zicoko comene. Baibolo likuti: “[Yesu] wakati winuka, wakawona ŵasambazi ŵakuponya vyawanangwa vyawo mu vyakuponyamo vyakupeleka. Penepapo wakawona cokoro cinyake cakusoŵerwa cikuponyamo tundalama tuŵiri twakuzirwa pacoko nkhanira, ndipo wakati: ‘Nkhumuphalirani unenesko, Cokoro ici, nangauli nchikavu, caponyamo zinandi kuluska wose. Cifukwa wose aŵa ŵaponyamo vyawanangwa kufuma pa uzali wa usambazi wawo, kweni mwanakazi uyu, mu kusoŵerwa kwake, waponyamo vyake vyose ivyo wakenera kulereka navyo.’” (Luka 21:1-4) Yesu wakamanyanga umo mwanakazi yura wakaŵira. Wakamanyanga kuti wakaŵa cokoro ndiposo mukavu. Ntheura wakazirwiska comene cawanangwa ico wakapeleka ndipo wakamuwonga comene. Ndimo Yehova nayo wakuwongera.—Yoh. 14:9.

Kasi mazuŵa ghano tingapeleka wuli vyawanangwa? Mu kalata iyo mpositole Paulosi wakalembera Ŵakorinte, wakazunura nthowa zitatu zakupelekera vyawanangwa. (1) Apo wakalembanga vya kusonkha ndalama, Paulosi wakati: “Zuŵa lakwamba lililose la sabata, waliyose wa imwe ku nyumba yake waŵikenge kanthu padera.” (1 Kor. 16:2a) Ntheura tikwenera kunozgerathu ivyo tipelekenge ndipo tikwenera kupeleka nyengo zose. Kweniso munthu wakwenera kupeleka vyawanangwa mwacisisi ndiposo mwakujikhumbira yekha. (2) Paulosi wakalembaso kuti waliyose wakwenera kupeleka “mwakuyana na umo wakusangira.” (1 Kor. 16:2b) Panji tingati, munthu uyo wakukhumba kupeleka vyawanangwa wakwenera kucita nthena mwakuyana na ivyo wali navyo. Nanga ni para Mkhristu wakusanga ndalama zicoko, kweni Yehova wakuzirwiska kacoko ako wapeleka. (Luka 21:1-4) (3) Paulosi wakalembaso kuti: “Waliyose wacite umo wadumulira mu mtima wake, mwakukwenyelera cara panji mwakucicizgika, cifukwa Ciuta wakutemwa uyo wakupeleka mwakukondwa.” (2 Kor. 9:7) Ŵakhristu ŵakupeleka kufumira pasi pa mtima ndiposo mwakukondwa. Nchakuwongeka kuti ŵanji ŵacepeska ndalama izo ŵakumalira pa selufoni mwakuti ŵapelekenge mwakukwana vyawanangwa vyakukhozgera vinthu vya Ufumu.

◼ Tikwenera Kupwelelera “Kuti Paleke Kusakazika Kanthu”: Fundo yinyake iyo tikwenera kulondezga ni iyo Yesu wakayowoya pa Yohane 6:12. Nangauli Yesu wakaŵa na nkhongono zakucitira kuti vingwa viŵe vinandi, kweni ŵanthu ŵakati ŵarya wakati: “Wunjikani pamoza vimenyu ivyo vyakhalapo, ntheura kuti paleke kusakazika kanthu.” Kasi fundo iyi yingatovwira wuli pakukhwaskana na magazini ndiposo mabuku?

Pakuti tikumanya kuti mabuku ghithu ngakuzirwa ndiposo pakumalira ndalama zinandi kuti ghasindikizgike, ni mwawuli umo tingacitira kuti tileke kupeleka kwa ŵanthu ŵambura kuwonga? Nthowa yimoza nja kufumba munthu uyo tikumupharazgira para wamuŵazga nadi buku ilo. Ŵanyake ŵakucita soni kuphalira munthu uyo ŵakumupharazgira kuti mulimo withu ukovwirika na vyawanangwa, kweni nchiwemi kumuphalira. Cikovwiraso kumanya usange munthu uyo ngwakunweka nadi. Para tikuŵalongosolera umo mulimo withu ukwendera, tikulongora kuti tikuzirwiska mabuku ghithu ndiposo tikumanya kuti pakumalira ndalama zinandi kuti ghasindikizgike.

Ŵalara ŵakwenera kuwona unandi wa magazini agho mpingo ukucemeska mwezi uliwose. Ici ciwovwirenge kuti magazini ghaleke kunangika ndiposo kuwunjikana waka mu Nyumba ya Ufumu.