Ŵapharazgi Ŵakwenera Kulomba
1. Nchivici cikukhumbikwa kuti ticite makora uteŵeti withu?
1 Patekha tingacita yayi uteŵeti. Yehova wakutipa nkhongono zakuti ticitire mulimo wa kupharazga. (Fil. 4:13) Wakutuma ŵangelo ŵake kuti ŵatovwire kusanga ŵanthu ŵakwenelera. (Uvu. 14:6, 7) Ni Yehova uyo wakukuzga mbuto zaunenesko izo tapanda na kuthilira. (1 Kor. 3:6, 9) Ipo nchakuzirwa comene kuti ŵapharazgi ŵalombenge Dada wawo wakucanya, kulongora kuti ŵakumugomezga.
2. Kasi tingalomba vici?
2 Tijilomberenge: Tikwenera kulomba nyengo yiliyose para tamupharazga ndiposo para tili mu upharazgi. (Efe. 6:18) Kasi tingalomba vici? Tingalomba kuti tiŵe na mtima uwemi kuti tilutilire kupharazga mu cigaŵa cithu ndiposo kuti tiŵe na cikanga. (Mil. 4:29) Tingalomba Yehova kuti watilongozgere ku ŵanthu ŵakwenelera awo tingaŵasambizga Baibolo. Usange munthu watifumba fumbo, tingalomba mu mtima kuti Yehova watovwire kuzgora makora fumbo ilo tafumbika. (Neh. 2:4) Tingalombaso kuti watipe vinjeru mwakuti tiŵikenge uteŵeti pa malo ghakwamba. (Yak. 1:5) Kweniso, Yehova wakukondwa para tikumuwonga cifukwa cakuti ndise ŵateŵeti ŵake.—Kol. 3:15.
3. Kasi kulombera ŵanji kukovwira wuli kuti mulimo wa kupharazga ulute panthazi?
3 Kulombera Ŵanji: Tikweneraso “kulomberana,” ndipo usange nchakwenelera tingazunura na mazina gha ŵateŵeti ŵanyithu. (Yak. 5:16; Mil. 12:5) Kasi mukutondeka kucita mwakukwana mulimo wa kupharazga cifukwa ca ulwari? Para ni nthena, lomberani ŵanyinu awo ŵali makora. Lekani kudelera kuti lurombo lwinu lungawovwira ŵanji. Nchiwemiso kulombera ŵalongozgi ŵa caru kuti ŵaleke kujandizga mulimo wa kupharazga mwakuti ŵabali ŵithu ŵakhalenge “umoyo wa bata na wakufwasa.”—1 Tim. 2:1, 2.
4. Cifukwa wuli tikwenera kukosera mu lurombo?
4 Kupharazga makani ghawemi pa caru cose ni mulimo ukuru. Usange ‘tikukosera mu lurombo,’ Yehova watovwirenge kuti tifiske mulimo uwu.—Rom. 12:12.