‘Mungopanga’
1. Kasi ni masuzgo wuli agho tingakumana nagho ghakuyana na gha Yeremiya?
1 Pakwamba Yeremiya wakajiwonanga kuti ngwakwenelera yayi apo wakapika mulimo wakuti waŵe nchimi. Kweni Yehova wakamuphalira kuti: “Ungopanga,” ndipo wakamukhozga kuti wafiske mulimo wake. (Yer. 1:6-10) Mazuŵa ghano, tingatondeka kupharazga makora cifukwa ca kucita soni panji kujikayikira. Nyengo zinyake tingatondeka kupharazga cifukwa ca kopa umo ŵanthu ŵatizgolerenge panji umo ŵatiwonerenge. Kasi tingamazga wuli wofi uwu, ndipo tisangenge vitumbiko wuli?
2. Kasi kunozgekera kuzamutovwira wuli kuti timazge wofi para tili mu uteŵeti?
2 Nozgekeranithu: Kunozgekera mwakukwana kungatovwira kuti ticepeske wofi. Mwaciyelezgero, para tikusandirathu ivyo ŵakwimiska cidumbirano ŵangayowoya, tinozgekerenge umo tingakaŵazgolera. (Zinth. 15:28) Mwalekeraci kuti pa Nyengo Yakusopera ya Mbumba munozgekerenge umo mungacitira na masuzgo ghakupambanapambana agho mungakumana nagho ku sukulu ndiposo mu uteŵeti?—1 Pet. 3:15.
3. Kasi kugomezga Yehova kukutovwira wuli kuti timazge wofi?
3 Gomezgani Yehova: Kugomezga Yehova kukutovwira kuti timazge wofi. Yehova wakutisimikizgira kuti watovwirenge. (Yes. 41:10-13) Ici nchivikiliro cikuru comene ico tingaŵa naco. Kweniso, Yesu wakatisimikizgira kuti nanga tingakumana na masuzgo mwamabuci, mzimu utuŵa wa Ciuta utovwirenge kuti tipharazge mu nthowa yiwemi. (Mrk. 13:11) Ntheura, nyengo zose lombani Yehova kuti wamupani mzimu utuŵa.—Luka 11:13.
4. Kasi tikusanga vitumbiko wuli para tikukosera mu uteŵeti nangauli tingakumana na masuzgo?
4 Vitumbiko: Para tikukosera mu uteŵeti nangauli tingakumana na masuzgo, tikuŵa na nkhongono zakutondera viyezgo ivyo tingakumana navyo munthazi. Tikuŵa ŵakukhwima mtima ndiposo ŵacikanga, ico nchimanyikwiro ca awo ŵali na mzimu utuŵa. (Mil. 4:31) Kweniso, apo Yehova wakutovwira kuti timazge wofi, cipulikano cithu cikuŵa cakukhora ndiposo tikugomezga kuti watithaskenge na woko lake. (Yes. 33:2) Tikuŵaso ŵacimwemwe ndiposo ŵakukhorwa pakumanya kuti tikukondweska Ŵadada ŵithu ŵakucanya. (1 Pet. 4:13, 14) Ntheura, tingopanga yayi kupharazga uthenga wa Ufumu na cikanga, nyengo zose tigomezge Yehova kuti watovwirenge.