Tikusanga Usambazi Para Tikuteŵetera Yehova
1 Lemba la Zintharika 10:22 likuti: “Thumbiko la Yehova likusambazga, ndipo kuti wakusazgako citima cara.” Kasi usambazi wauzimu uwo ŵateŵeti ŵa Yehova ŵakusangwa nawo mazuŵa ghano ni thumbiko lakukondweska yayi? Tiyeni tidumbiskane vitumbiko vinyake vyauzimu ivyo tili navyo na kuwona ivyo vikung’anamura kwa ise, waliyose payekha.
2 Tikumanya makora ivyo Baibolo likusambizga: Visopa vyautesi vinandi vikuti vikugomezga Baibolo. Kweni vikutondeka kukolerana cimoza pa ivyo likusambizga. Nanga ni ŵanthu ŵa cisopa cimoza kanandi ŵakupambana maghanoghano pa ivyo Malemba ghakusambizga nadi. Vikupambana comene na umo ŵateŵeti ŵa Yehova ŵaliri. Nangauli tikupambana vyaru, mitheto, panji kakuliro, kweni tikusopa Ciuta uyo zina lake tikulimanya. Iyo mbaciuta ŵatatu mwa ciuta yumoza yayi. (Dute. 6:4; Sal. 83:18; Mrk. 12:29) Kweniso tikumanya kuti nkhani yikuru yakukhwaskana na muwuso wa Ciuta yili pafupi kumara ndipo waliyose wa ise wakuzgorako nkhani iyi mwa kukhalilira wakugomezgeka kwa iyo. Tikumanya unenesko pakuyowoya za ŵakufwa ndipo tikutenthema yayi na Ciuta uyo ŵanthu ŵakuti wakocha ŵanthu ku moto.—Muph. 9:5, 10.
3 Tafwatuka ku vizgoŵi na maluso ghakupweteka: Ŵanthu ŵakucenjezgeka kwizira mu mawayilesi, TV, manyuzipepara, na magazini za uheni wa kukhweŵa hona, kumwa comene moŵa, na uzaghali. Kweni ŵakupulika yayi. Nchivici cikucitika para munthu wa mtima waunenesko wasambira kuti Ciuta wakutinkha vinthu ivi nakuti ŵanthu awo ŵakuvicita ŵakumukwiyiska? Para wamanya, wakuvilekerathu vinthu ivi. (Yes. 63:10; 1 Kor. 6:9, 10; 2 Kor. 7:1; Efe. 4:30) Nangauli cifukwa cikuru ico wakuvilekera nchakuti wakondweske Yehova Ciuta, kweni wakusanga vyandulo vinyake cifukwa ca kucita ntheura. Wakugega matenda ndipo wakuŵa na mtende mu mtima.
4 Tikuŵa ŵakukondwa mu mbumba: Mu vyaru vinandi, umoyo wa mbumba ukunjira pasi. Nthengwa zinandi zikumara, ndipo kanandi ŵana ŵakusuzgika comene. Mu vyaru vinyake ku Europe, mbumba pafupifupi 20 pa handiredi yiliyose, muli mupapi yumoza. Kasi Yehova watovwira wuli kwenda mu kunyoloka pa nkhani iyi? Ŵazgani Ŵaefeso 5:22–6:4, na kuwona ulongozgi uwemi uwo Mazgu gha Ciuta ghakupeleka ku ŵafumu, ŵawoli, na ŵana. Nthengwa zikukhora usange tikulondezga ulongozgi wa pa lemba ili na Malemba ghanyake, nakuti ŵapapi ŵangalera makora ŵana, na kupangiska kuti umoyo mu mbumba uŵe wakukondweska. Kasi ili ni thumbiko ilo tikwenera kukondwa nalo yayi?
5 Tili na masambiro ghawemi ndiposo ghakovwira: Gerhard ni mulara mu mpingo wa Ŵakaboni ŵa Yehova. Iyo wakukumbukira nyengo iyo wakaŵa muwukirano ndipo wakuti: “Apo nkhaŵa muwukirano, nkhaŵa na suzgo pakuyowoya. Para cinyake cabudika panji vinthu vyanisuzga, nkhatondekanga kuyowoya ndipo nkhacitanga cimama. Nkhajiwonanga wambura kuzirwa ndipo nkhasuzgikanga maghanoghano. Ŵapapi ŵane ŵakanitumizga ku sukulu ya kusambizga kuyowoya kweni ŵakaphyoka pawaka. Suzgo lane likaŵa lulimi yayi kweni maghanoghano. Kweni nkhawovwirika na cinthu cinyake capacanya ico Yehova wali kunozga. Cinthu ici ni Sukulu ya Uteŵeti wa Ciuta. Sukulu iyi yikanovwira kuti niŵe na cikanga. Nkhayezgayezganga comene kulondezga ivyo nkhasambira. Ndipo ici cikanovwira! Nkhayamba kuyowoya makora, suzgo la maghanoghano likamara, ndipo nkhayamba kuŵa na cikanga comene mu uteŵeti. Pa nyengo yasono, nkhuyowoya nanga ni nkhani zacisanisani. Nkhuwonga comene Yehova, uyo wakasintha umoyo wane kwizira mu sukulu iyi.” Kasi tikwenera kukondwa yayi na umo Yehova wakutisambizgira umo tingacitira nchito yake?
6 Tili paubwezi na Yehova ndipo tikovwirana na ŵabali ŵithu pa caru cose: Katrin, uyo wakukhala ku Germany, wakafipa mtima comene apo wakapulika kuti ku southeast Asia kwacitika cindindindi cikuru ico cikacitiska tsunami iyo yikakoma ŵanthu ŵanandi. Mwana wake mwanakazi wakaŵa ku Thailand, caru ico cikakhwaskika na soka ili. Kwa maora 32, mama uyu wakamanya yayi usange mwana wake ngwamoyo panji wali mu gulu la ŵanthu awo ŵapwetekeka panji kufwa. Ghanaghanani waka umo mtima wa Katrin ukwenera ukakhalira pasi apo wakapokera telefoni yakumumanyiska kuti mwana wake wali makora!
7 Nchivici cikawovwira Katrin mu nyengo yose iyo wakenjerwanga? Iyo wakalemba kuti: “Nyengo yose iyi nkhakhaliranga waka kulomba kwa Yehova. Nkhawonanga kuti nyengo yiliyose para nalomba, nkhongono zikizangamo ndipo nkhaŵanga na mtende mu mtima. Kusazgaso apa, ŵabali ŵane mwauzimu ŵakizanga kuzakaniwona ndipo ŵakanikhozganga.” (Fil. 4:6, 7) Waŵenge yekha pa nyengo yakusuzga yira kwambura kulomba kwa Yehova na kovwirika na ŵabali na ŵadumbu ŵake mwauzimu mphanyi vinthu vikahenipa comene. Ubwezi withu na Yehova na Mwana wake ndiposo na ŵabali ŵithu Ŵacikhristu ni thumbiko lapadera comene ilo tikwenera kuliwona mwakupepuka yayi.