Cindikani Yehova na Mphango Zinu—Cigaŵa 3

1. Kasi bokosi lacitatu likucemeka vici?

¹ Bokosi lacitatu ilo tidumbiskanenge likucemeka “Mulimo wa Kuzenga Nyumba za Ufumu pa Caru Cose.” Kasi nchito ya ndalama izo tikuŵika mu bokosi ili njakuti wuli?

2. Cifukwa wuli Nyumba za Ufumu zikukhumbikwa mu Malaŵi cilimika cilicose?

² Mulimo wa Kuzenga Nyumba za Ufumu pa Caru Cose: Nangauli Nyumba za Ufumu zinandi zazengeka mu Malaŵi mu vilimika vyasonosono, kweni pacali mipingo yinyake iyo yilije Nyumba ya Ufumu. Cilimika cilicose, mipingo yiphya yikupangika. Yinyake mwa mipingo iyi yikuwungana na mpingo unyake mu Nyumba ya Ufumu yimoza. Ku malo uko mipingo yinandi yingawungana yayi mu Nyumba ya Ufumu yimoza, Nyumba za Ufumu ziphya zikukhumbikwa. Cifukwa ca kusazgikira uku, Nyumba za Ufumu zakujumpha 30 zikukhumbikwa kuti zizengeke mu Malaŵi cilimika cilicose.

3. Kasi ndalama za mu bokosi ili zikugwira nchito wuli?

³ Kuti tovwire mipingo iyo yilije Nyumba ya Ufumu, tingaŵika vyakupeleka mu bokosi lakucemeka “Mulimo wa Kuzenga Nyumba za Ufumu pa Caru Cose.” Para ndalama izi zatumizgika ku ofesi ya munthavi zikovwira mipingo pa mulimo uwu.

4. (a) Kasi nkhani ya vigaŵa vitatu iyi yatovwira wuli? (b) Mwakudumura yowoyani nchito ya bokosi lililose.

⁴ Nkhani ya vigaŵa vitatu iyi yatovwira kumanya kuti bokosi lililose la vyakupeleka lili na nchito yake. Nchito ya mabokosi agha yikuyana yayi. Tikawona kuti ndalama za mu bokosi lakucemeka, “Vyakupeleka vya Mulimo wa pa Caru Cose—Mateyu 24:14” ni zakovwilira pa mulimo wa kupharazga wa pa caru cose. Tikuŵikaso vyakupeleka mu bokosi ili para tikukhumba kulongora kuti tikuwonga mabuku ghithu. Bokosi lakucemeka, “Vyakupeleka Vyakovwira Mpingo Withu” nchito yake njakovwira mpingo withu, ndiposo kulipira mabilu gha magesi, maji, kunozgera Nyumba ya Ufumu, kupeleka inshuransi, kovwilira mulaŵiliri wa dera para wakucezgera mpingo withu, kweniso kovwira dera para nchakukhumbikwa. Para tikukhumba kulongora kuti tikuwonga cifukwa ca kuŵa na Nyumba ya Ufumu, tikuŵika ndalama mu bokosi ili, mwakukolerana na cilapo cithu, ndipo paumaliro wa mwezi uliwose ndalama izi zikutumizgika ku ofesi ya munthavi. Paumaliro, tili na bokosi lakucemeka, “Mulimo wa Kuzenga Nyumba za Ufumu pa Caru Cose” nga umo ndime 2 na 3 zalongosolera.

5. Kasi lemba la Zintharika 11:25 likutisimikizgira vici?

⁵ Ntheura, waliyose waghanaghanire ico wangacita kuti wakhozgere kusopa kwaunenesko mwa kuŵika vyakupeleka mu mabokosi ghatatu agha. Mwambura kukayika, para tikovwirapo pa mulimo uwu, mwakuyana na umo tikusangira, Yehova watitumbikenge. Ŵazgani Zintharika 11:25. Tiyeni tose ticindike Yehova na mphango zithu.