Kalata Yakufuma ku Wupu Wakulongozga
Ŵakutemweka Ŵakaboni Ŵanyithu,
Tili mu nyengo yakukondweska nadi ndipo tili ŵacimwemwe comene. Tikusangwa nadi kuteŵetera namwe lumoza ŵabali na ŵadumbu ŵakutemweka. Na “mtima umoza” tikucitira ukaboni ukuru Ŵadada ŵithu ŵakucanya, Yehova.—Zef. 3:9; Yoh. 14:12.
Nangauli tili na cimwemwe apo tikuteŵetera Yehova, kweni cikung’anamura kuti tikuleka kukumana na masuzgo yayi. Mu cilimika camara ca uteŵeti, ŵanji ŵa imwe ŵakasuzgika comene na vindindindi, kufuluka kwa maji, cimphepo cakunanga vinthu, na masoka ghanyake gha cilengiwa. (Mat. 24:7) Ŵanandi ŵakusuzgika zuŵa na zuŵa na matenda ghakuru ndiposo ucekuru. Tose tikwenera kulimbana na “masoka” agho ghakusazgikira comene sono kuluska kale. (Mat. 24:8) Mu vyaru vinandi, kusazgapo Armenia, Eritrea, ndiposo South Korea, ŵabali ŵithu ŵanandi ŵali mu jele cifukwa ca cipulikano cawo.—Mat. 24:9.
Nchivici catovwira kuti tilutilire kuŵa na cimwemwe nangauli tikukumana na masuzgo agha? Lemba la cilimika ca 2010 likatikumbuska fundo yakuzirwa yakuti: ‘Citemwa cikuzizipizga vinthu vyose. Citemwa cikutondeka cara.’ (1 Kor. 13:7, 8) Enya, tikuŵa na nkhongono zakuzizipizgira masuzgo cifukwa cakuti tikutemwana ndiposo tikutemwa Yehova.
Ŵanandi awo ŵakuti Mbakhristu ŵakuzizwa umo mulimo wa kupharazga ukukulira ndiposo umo ukwendera. Nangauli ŵangasuska vigomezgo ndiposo visambizgo vithu, kweni ŵanji ŵafika pakuyowoya kuti, “Mwa ŵanthu imwe mukucita nchito iyo mphanyi nase tikucita.” Nchivici ico cikupangiska Ŵakaboni ŵa Yehova kulutilira kupharazga zuŵa na zuŵa? Zgoro ndakutiso nchitemwa. Nga Mbadada ŵithu ŵakucanya, tikukhumba yayi kuti munyake waparanyike. (2 Pet. 3:9) Ciŵelengero ciphya ca ŵapharazgi cakukwana 7,508,050 ca mu cilimika camara ca uteŵeti, cikulongora kuti tikukhumba nadi kuti ŵanthu wose ŵafike pa kupera. Kasi cilipo cisopa cinyake ico cili na ŵanthu ŵanandi nthena awo ŵakujipeleka na mtima wose pa mulimo wa kupharazga?
Tikukhozgeka kuwona kuti ucimi uwo ukalembeka na Yesaya ukulutilira kufiskika. Wakalemba kuti: “Kwamkuti mu mazuŵa gha umaliro kuti lupiri lwa nyumba ya Yehova lwamkwimikika kughaluska mapiri ghose utali wake, na kukwezgeka kujumpha mitununtha; ndipo mitundu yose ya ŵanthu yamkuwungana kura.” (Yes. 2:2-4) Ŵanthu 294,368 awo ŵakabapatizika cilimika camara ca uteŵeti, mbamoza mwa ŵanthu ŵanandi comene awo ŵakukwelera ku nyumba ya Yehova. Tikuŵapokelera ŵanthu aŵa ku gulu lithu. Mphanyi citemwa catituma kuti tilutilire kuŵawovwira kuti ŵalimbane na masuzgo agho ghakwiza na mulwani withu Satana Dyabulosi.—1 Pet. 5:8, 9.
Ŵanthu ŵakukwana 18,706,895 awo ŵakiza pa Cikumbusko ico cikacitika pa Ciŵiri, Malici 30, 2010, nchilongolero cakuti pacali ŵanandi awo ŵakukhumba kuzakasopa nase Yehova. Tili ŵakukondwa comene kuti Yehova wacali wandaparanye mgonezi uheni uwu. Pa nyengo yasono, citemwa cikutovwira kulutilira kuzizipizga.—2 Tes. 3:5.
Maungano gha Cigaŵa gha mutu wakuti, “Skepelerani kwa Yehova!” agho ghanandi gha igho ghakacitika mu 2010, ghakakhozga ubwezi withu na Ŵadada ŵithu ŵakucanya, Yehova. Mazgu gha wamasalmo ngaunenesko nadi ghakuti: “Mbamwaŵi awo Ciuta wawo ndi Yehova!” (Sal. 144:15) Mwambura kupwelerako ivyo viŵengeko munthazi, tili na cigomezgo kuti para Yehova wali ku cigaŵa cithu, palije cilicose ico tiwopenge. (Sal. 23:4) Sonosono apa, Yehova watumenge Mwana wake kuti ‘waparanye milimo ya Dyabulosi.’ (1 Yoh. 3:8) Tikulindilira nadi kuti zuŵa ili lize. Kweni panyengo iyi, tili na mulimo unandi wakuti titangwanike nawo.—1 Kor. 15:58.
Manyani kuti nyengo zose tikumuzunurani mu malurombo ghithu “kwambura kuleka.” (Rom. 1:9) Mphanyi ‘mwajisungilira mu citemwa ca Ciuta, uku mukulindilira cisungusungu ca Fumu yithu Yesu Khristu ico cikulongozgera ku umoyo wamuyirayira.’—Yuda 21.
Tikumutemwani mose.
Ndise ŵabali ŵinu,
Wupu Wakulongozga wa Ŵakaboni ŵa Yehova