Kasi Mukaŵapo Mupayiniya Wanyengozose?
1. Ni uteŵeti wuli uwo ŵanandi ŵasangwa nawo, kweni ŵanji ŵakasankha kucitaci?
1 Ŵateŵeti ŵanyengozose ŵanandi ŵasangwa na mulimo wa “kusambizga na kupharazga makani ghawemi” kwa vilimika vinandi. (Mil. 5:42) Ndipouli, ŵanyake ŵakaleka dankha upayiniya pa vifukwa vyakupambanapambana. Para mukaŵapo mupayiniya wanyengozose, kasi mwasandaso umo vinthu viliri kwa imwe na kuwona usange mungaŵaso mupayiniya?
2. Cifukwa wuli awo ŵakacitapo upayiniya ŵakwenera kusandaso umo sono vinthu viliri kwa iwo?
2 Vinthu Vikusintha: Nyengo zinyake suzgo iyo yikamupangiskani kuti muleke upayiniya yili kumara. Mwaciyelezgero, para mukaleka upayiniya cifukwa cakuti mukatondekanga kufiska maora 90 agho ghakakhumbikwanga, kasi mungambiraso yayi sono cifukwa cakuti maora agho ghakukhumbikwa ni 70? Kasi nchito iyo mukugwira panji milimo ya pa mbumba vyacepako kufuma apo mukalekera upayiniya? Mudumbu munyake uyo wakaleka upayiniya cifukwa ulwari wakasankha kwambiraso apo wakaŵa na vilimika 89. Pakajumpha cilimika cimoza kufuma apo wakafumira mu cipatala ndipo mwakuyana na umo wakajipulikiranga wakawona kuti wangambiraso upayiniya.
3. Kasi ŵa mu mbumba ŵangakolerana wuli kuti ŵawovwire munyake kuti waŵe mupayiniya?
3 Mutepanji mundacitepo upayiniya, kweni munyake mu mbumba yinu wakaleka upayiniya kuti wapwelelere wa mu mbumba yake, nga ni mupapi uyo ni mucekuru. (1 Tim. 5:4, 8) Para ni nthena, kasi imwe panji ŵanji mu mbumba yinu mungacitapo kanthu yayi kuti movwire uyo wakaleka upayiniya? Mwalekeraci kudumbiskana pamoza nkhani iyi? (Zinth. 15:22) Para mbumba yakolerana mwakuti yumoza wangacita upayiniya, wose ŵangajipulika kuti ŵakovwirapo.
4. Kasi mukwenera kucitaci para pa nyengo ya sono mungambaso yayi upayiniya?
4 Mungagongowanga yayi usange mungakwaniska yayi kwambiraso upayiniya cifukwa ca umo vinthu viliri pasono. Yehova wakukondwa cifukwa ca khumbo linu ilo muli nalo. (2 Kor. 8:12) Gwiliskirani nchito maluso agho mukaŵa nagho apo mukacitanga upayiniya pa uteŵeti uwo mukucita sono. Muphalirani Ciuta khumbo linu, ndipo ŵani ŵakunozgeka kusintha vinthu vinyake para mpata wasangika. (1 Yoh. 5:14) Mukuluta kwa nyengo, Yehova wangamujulirani “mulyango ukuru wakulongozgera ku mulimo” mwakuti mungambaso kusangwa na upayiniya wanyengozose.—1 Kor. 16:9.