Yehova Wakutisambizga Kucita Mulimo Uwu
1. Para Yehova wakutuma ŵanthu mulimo, kasi wakucitaso vici?
1 Para Yehova wakutuma ŵanthu mulimo, wakuŵawovwira kuti ŵawufiske. Mwaciyelezgero, apo Yehova wakatuma Nowa kuti wazenge cingalaŵa, mulimo uwo Nowa wakaŵa kuti wandawucitepo, wakamuphalira umo wangazengera. (Gen. 6:14-16) Apo Mozesi wakatumika kukakumana na ŵanalume ŵalara ŵa Israyeli na Faro, Yehova wakamukhwimiska, wakati: “Ine tindiŵenge na mulomo wako na kukusambizga ivyo wamkuviyowoya.” (Ex. 4:12) Mwakuyana waka, pa mulimo wa kupharazga makani ghawemi, Yehova wakutileka tekha yayi. Wakutisambizga mulimo uwu kwizira mu Sukulu ya Uteŵeti wa Ciuta kweniso Ungano wa Uteŵeti. Kasi tingasanga wuli candulo na masambiro agha?
2. Kasi tingacita wuli kuti tisange candulo na Sukulu ya Uteŵeti wa Ciuta?
2 Sukulu ya Uteŵeti wa Ciuta: Sambirani ivyo vyamuyowoyeka pa ungano uliwose. Para mukuwona umo ŵasambiri ŵakuyowoyera nkhani, mukusambirako umo mungasambizgira. (Zinth. 27:17) Muyeghenge buku linu la Sukulu ya Uteŵeti kuti mulembengemo fundo izo zingamovwirani. Para mulaŵiliri wa sukulu wakuyowoyapo fundo kufuma mu buku ili paumaliro wa nkhani ya msambiri waliyose, gwarani mzere pa fundo izo zingamovwirani na kulemba fundo zinyake mumphepete. Nthowa yiwemi comene iyo tingasangira candulo na sukulu iyi njakuti tiyowoyengeko nkhani. Kasi muli kulembeska mu Sukulu ya Uteŵeti wa Ciuta? Para mwapika nkhani, nozgekerani makora na kulondezga ulongozgi uwo mwapika. Para muli mu uteŵeti wa m’munda, citani ivyo mwasambira.
3. Nchivici cingatovwira kuti tisange candulo na Ungano wa Uteŵeti?
3 Ungano wa Uteŵeti: Tingakumbuka makora fundo izo zamuyowoyeka ku ungano uwu para taŵazgirathu nkhani zose na kunozgekera kukazgorapo. Usange tikuzgora mwakudumura, ŵanandi ŵakuzgorapo. Woneseskani umo viyezgelero vikucitikira, na kulondezga sacizgo lililose ilo lingamovwirani mu uteŵeti. Para mu Uteŵeti Withu wa Ufumu muli nkhani izo zingamovwirani m’munda, ipo zisungani.
4. Cifukwa wuli tikwenera kulondezga ivyo Yehova wakutisambizga?
4 Mulimo uwo Yehova wakatuma Nowa na Mozesi ukaŵa upusu yayi. Ndimoso uliri mulimo wa kupharazga makani ghawemi pa caru cose. (Mat. 24:14) Tingapharazga makora comene usange tikugomezga Yehova, Msambizgi withu Mukuru, na kulondezga ivyo wakutisambizga.—Yes. 30:20.