Kwambura Kuthilira, Mbuto Zingakura Yayi
1. Nchivici cikukhumbikwira kuthilira kuti cikure?
1 Para tapanda mbuto, tikuthilira kuti zikure. Vikuyana waka na mbuto za unenesko izo tikupanda mu mitima ya ŵanthu uko tikupharazga. (1 Kor. 3:6) Tikwenera kuwelerako kuti tikathilire mbuto izi na Mazgu gha Ciuta mwakuti zijinthe misisi, zikure na kutikitira.
2. Kasi tingacita wuli kuti tizakawelereko makora kwa munthu?
2 Mulekerani Fumbo: Para mukunozgekera upharazgi, nchiwemi kughanaghanira fumbo ilo mungamulekera munthu kuti muzakazgore para mwazakawelerako. Paumaliro wa cidumbirano, fumbani fumbo, ndipo panganani zuŵa na nyengo iyo mwamuweraso. Ŵanyake ŵakuwona kuti nchakovwira kumulekera fumbo lakufuma mu buku la Baibolo Likusambizgaci? mwakuti ŵazakamulongore umo sambiro la Baibolo likuŵira.
3. Kasi mungalemba vinthu wuli para mwayowoya na munthu wakunweka?
3 Lembani Ivyo Vyacitika: Para mwamara waka kuyowoya na munthu, lembani ivyo vyacitika. Lembani zina na adiresi yake. Kweniso nchiwemi kulemba deti na nyengo iyo mwayowoyera nayo, ivyo mwayowoyanga, kweniso magazini panji buku ilo mwamupa. Kasi wayowoyapo kuti wakusopa? Kasi wali na mbumba? Kasi wayowoyapo ivyo vili ku mtima wake? Ivi vimovwiraninge kuti mumanye nkhani iyo mungazakadumbirana para mwawelerako. Kweniso lembani nyengo iyo mwapangana kuti mukawereso, na fumbo ilo muzamuzgora.
4. Cifukwa wuli tikwenera kugongowa yayi kuwelera ku ŵakunweka?
4 Kugongowa Yayi: Satana wakukaŵa yayi ‘kwiza na kutora mazgu agho ghaseŵeka’ mu mtima wa munthu. (Mrk. 4:14, 15) Ntheura mungagongowanga yayi usange mwabundurwa pa nyumba ya wakunweka. Panji mungalemba waka kakalata na kufyatika pa mulyango. Mudumbu yumoza, uyo ni mupayiniya, wakamba kusambira na mama munyake. Kweni wakati wawelerako, wakabundurwa, ntheura wakamutumira kalata. Paumaliro mudumbu wakamusanga mama uyu, ndipo wakamuwonga mudumbu cifukwa ca citemwa ico wakalongora. Peneapo tikuthilira mbuto za unenesko, tikondwenge comene kuwona kuti zikumera, kukura na “kupambika vipambi makumi ghatatu, makumi ghankhondi na limoza kweniso makumi khumi.”—Mrk. 4:20.