Kalata Yakufuma ku Wupu Wakulongozga

Ŵakutemweka Ŵakaboni Ŵanyithu:

Ndise ŵakukondwa comene kumulemberani kalata ŵateŵeti ŵakugomezgeka ŵa Yehova ŵakujumpha 7 miliyoni. Para takumana na ŵabali ŵakufuma ku vyaru vinyake, tikumanyirathu kuti taŵanthu ise tikutemwana nadi. (Yoh. 13:34, 35) Mu Yearbook ya 2012, muli nkhani zakukondweska izo zikulongosora cipulikano na kugomezgeka kwa ŵabali na ŵadumbu mu vyaru vinandi. Usange mungaŵazga nkhani izi, mukhorwenge kuti taŵanthu ise tili ŵakukolerana nadi.

Malipoti ghakulongora kuti mwaŵabali ŵanandi mukuŵikapo mtima comene pa nkhani ya Kusopa kwa Mbumba. Imwe muli na ŵanici mukusanga nthowa zakusambizgira ŵana ŵinu kuti ŵaleke kuvuka pa sambiro. (Efe. 6:4) Awo mbakutorana, ubwezi wawo ukukura cifukwa ca ndondomeko ya Kusopa kwa Mbumba. (Efe. 5:28-33) Mbumba kweniso waliyose payekha wakwandula na ndondomeko iyi yakusambira Mazgu gha Ciuta.—Josh. 1:8, 9.

Citima cikatikora cifukwa cakuti ŵanji ŵa imwe mukasuzgika na masoka gha cilengiwa cilimika camara. Tikumuwongani mose imwe mukawovwirapo mwaluŵiro pa masuzgo agha. (Mil. 11:28-30; Gal. 6:9, 10) Kweniso mu mpingo uliwose ŵabali ŵanji ŵakovwira ŵakusoŵerwa mwacisisi. Ŵakucita nga ni Dorika uyo wakazara mu “milimo yiwemi na vyawanangwa vya cisungusungu.” (Mil. 9:36) Yehova wakuwona ivyo mukucita ndipo wazamuwezgerapo.—Mat. 6:3, 4.

Mu vyaru vinyake ŵakucindika yayi wanangwa withu wakusopa ndipo ŵakusinthira dala malango kuti ŵatitambuzge. (Sal. 94:20-22) Pakumanya kuti Yesu wakayowoya kuti titambuzgikenge, mukuzizipizga na kugomezga Yehova. (Yoh. 15:19, 20) Tikumuzunurani mu malumbo nyengo zose kuti mulutilire “kujivikilira panthazi pa waliyose uyo wakukhumba kumanya cifukwa ca cigomezgo ico cili mwa imwe.”—1 Pet. 3:13-15.

Mwaŵanandi mukulutilira kuŵa na nkharo yituŵa nyengo zose nangauli Satana wakulekapo yayi kuthandazga vinthu vyaunyankhasi mu nthowa zinandi. Tikumuwongani comene. Apo caru cikunangika na nkharo yaukazuzi, imwe ‘mukukhomeskeka mu Fumu na mu nkhongono zake zikuru.’ (Efe. 6:10) ‘Mwavwara vyankhondo vyose vyakufuma kwa Ciuta,’ lekani mukwimikana na ‘mauryarya gha Dyabulosi.’ (Efe. 6:11, 12) Ivyo Mukucita vikovwira Yehova kuzgora mautesi gha Satana!—Zinth. 27:11.

Tikakondwa kuti ŵanthu 19,374,737 ŵakiza ku cikumbusko ca nyifwa ya Yesu cilimika ca 2011. Ivi vikacitika cifukwa cakuti ŵanandi ŵa imwe mukacita upayiniya wakanyengo mu Epulero. Ŵanthu ŵanandi ŵakapulika apo Ŵakaboni ŵakalumba Yehova pa caru cose! (Rom. 10:18) Kwali mukaŵa yumoza wa ŵabali na ŵadumbu 2,657,377 awo ŵakacita upayiniya wakanyengo, panji mukasazgirako waka nyengo ya mu uteŵeti, tikakondwa comene cifukwa ca mwamphu winu na kuŵikapo mtima pa uteŵeti.—Sal. 110:3; Kol. 3:23.

Ŵanthu 263,131 ŵakabapatizika cilimika camara. Tikuwonga Yehova na imwe mose pakutovwira kuyowoya kuti: “‘Zanga!’ Ndipo waliyose uyo wakupulika wati: ‘Zanga!’ Ndipo waliyose uyo wali na nyota wize; waliyose uyo wakukhumba watore maji gha umoyo kwawanangwa.” (Uvu. 22:17) Cifukwa ca ivyo tikasambira pa ungano wa cigaŵa wa 2011 vyakukhwaskana na Ufumu wa Ciuta, tikuyowoya na mtima wose kuti “Ufumu wa Ciuta wize!” Pakukhwaskika na layizgo la Yesu lakuti “Nkhwiza mwaluŵiro,” nase tikukolerana na mpositole Yohane uyo wakati: “Ameni! Zaninge, Fumu Yesu.” (Uvu. 22:20)

Apo mukulindilira kwiza kwa Yesu, manyani kuti tikumutemwani mose ŵabali na ŵadumbu imwe mukutemwa Yehova “mu milimo na unenesko.”—1 Yoh. 3:18.

Ndise ŵabali ŵinu,

Wupu Wakulongozga wa Ŵakaboni ŵa Yehova