Kasi Imwe ‘Mukunthumbwa’ na Vici?
1. Kasi tikwenera kuthumbwa na vici paumaliro wa mwezi?
1 Kasi imwe ‘mukuthumbwa’ na vici para mukupeleka lipoti la uteŵeti wa m’munda paumaliro wa mwezi? (Gal. 6:4) Kwali ndise ŵapayiniya ŵapadera awo ŵakupeleka maora 130, kwali ndise ŵapharazgi awo komiti ya mpingo yili kutizomerezga kuti tipelekenge maminiti 15, tose tikwenera kuthumbwa panji kukondwa para tikuteŵetera Yehova na mtima wose.—Sal. 100:2.
2. Cifukwa wuli tikwenera kulimbikira pakuteŵetera Yehova?
2 Cifukwa cakuti Yehova ni fumu yikuru, tikwenera kumupa ivyo tingakwaniska. (Mal. 1:6) Tili kujipeleka kucita khumbo la Yehova cifukwa tikumutemwa. Mwantheura, para kuumaliro wa mwezi tikukhorwa kuti tapeleka “vipasi vyakwamba kuca” vya nyengo yithu, maluso, na nkhongono zithu pakuteŵetera Yehova, mbwenu tili na cifukwa cakuthumbwira. (Zinth. 3:9) Kweni usange njuŵi yithu yikutisuska, tikwenera kughanaghanirapo kuti tinozge apo tikuleka kucita makora.—Rom. 2:15.
3. Cifukwa wuli nchambura mahara kujiyaniska na ŵanji?
3 “Kwambura Kujiyaniska Na Munthu Munyake”: Nchambura mahara kujiyaniska na ŵanyithu panji ivyo tikacitanga kale apo tikaŵa na nkhongono. Vinthu vikusintha. Maluso nagho tikupambana. Para tikujiyaniska na ŵanji tingamba kuphalizgana panji kujiwona nga ndise wambura nchito. (Gal. 5:26; 6:4) Yesu wakayaniskanga milimo ya ŵasambiri ŵake yayi. Kweni wakawonganga ivyo waliyose wakakwaniska kucita.—Mrk. 14:6-9.
4. Kasi tikusambirapo vici pa ntharika ya Yesu ya matalente?
4 Mu ntharika ya matalente iyo Yesu wakayowoya, waliyose wakapokera matalente “mwakuyana na maluso ghake.” (Mat. 25:15) Fumu yawo yati yiza na kuŵafumba ivyo ŵakacita, awo ŵakacita kuyana na maluso ghawo ndiposo umo vinthu vikaŵira pa umoyo wawo, ŵakawongeka ndipo ŵakakondwa pamoza na fumu yawo. (Mat. 25:21, 23) Usange nase tikutangwanika na mulimo wakupharazga, tiŵenge na cifukwa cakuthumbwira ndipo tikondweskenge Yehova.