Maliferensi gha Uteŵeti na Umoyo Wachikhristu—Kabuku ka Maungano
EPULERO 3-9
MAZGU GHA CHIUTA MBUSAMBAZI | YEREMIYA 17-21
“Zomerezgani Kuti Yehova Wamuwumbani”
it-2-E 776 ¶4
Kulapa
Muwuvi wangasintha chiŵiya icho wawumbanga na kwamba kuwumba chinyake usange icho wawumbanga ‘chanangika mu woko lake.” (Yer 18:3, 4) Yehova wali nga ni muwuvi yayi uyo wangananga icho wawumbanga, kweni fundo njakuti wali na mazaza pa mtundu wa ŵanthu. Wali na mazaza kusintha ivyo wakhumbanga kuchita na kuŵalongora lusungu ŵanthu mwakuyana na umo ŵachitira. (Yaniskani na Yes 45:9; Ro 9:19-21.) Ntheura ‘wakusintha maghanoghano pa soka ilo wakhumbanga kuchitira’ mtundu panji ‘kusintha maghanoghano pa uwemi uwo wakhumbanga kuwuchitira.’ Kweni vyose ivi vikuthemba pa umo ŵanthu ŵachitira. (Yer 18:5-10) Ntheura, Muwuvi Mukuru Yehova wakubudiska yayi, kweni ivyo ŵanthu ŵachita ndiyo vikovwira Yehova kuwona kuti waŵachitire lusungu panji yayi.
EPULERO 24-30
MAZGU GHA CHIUTA MBUSAMBAZI | YEREMIYA 29-31
“Yehova Wakayowoyerathu za Phangano Liphya”
it-1-E 524 ¶3-4
Phangano
Phangano Liphya. Yehova wakayowoyerathu za phangano liphya kwizira mwa ntchimi Yeremiya mu m’ma 600 B.C.E., ndipo wakati phangano ili lizamuyana yayi na phangano la Dango ilo Ŵaisrayeli ŵakaswa. (Yer 31:31-34) Yesu wakati phangano liphya likugwira ntchito chifukwa cha sembe iyo wakapeleka. Wakayowoya ivi pa usiku wakuti machero wafwenge, pa Nisani 14, 33 C.E., apo wakambiska Mugonero wa Fumu. (Lu 22:20) Pati pajumpha mazuŵa 10 wati waluta kuchanya, wakapungulira mzimu utuŵa pa ŵasambiri ŵake awo ŵakawungana mu chipinda cha muchanya ku Yerusalemu.—Mil 2:1-4, 17, 33; 2Ko 3:6, 8, 9; Heb 2:3, 4.
Phangano liphya ili ndapakati pa Yehova na “Israyeli wa Chiuta,” panji kuti ŵakuphakazgika awo ŵakupanga mpingo wake. (Heb 8:10; 12:22-24; Ga 6:15, 16; 3:26-28; Ro 2:28, 29) Phangano liphya likugwira ntchito chifukwa cha ndopa za Yesu. (Mt 26:28) Usange Chiuta wasankha munthu kuti wakawuse kuchanya (Heb 3:1), wakunjira mu phangano ili kwizira mu ndopa za Yesu. (Sal 50:5; Heb 9:14, 15, 26) Yesu ndiyo ni Mukhalapakati wa phangano liphya (Heb 8:6; 9:15) ndiposo ndiyo ni Mphapu yakwamba ya Abrahamu. (Ga 3:16) Yesu uyo ni mukhalapakati wa phangano liphya ndiyo wakovwira awo ŵali mu phangano ili kuŵa chigaŵa cha mphapu ya Abrahamu (Heb 2:16; Ga 3:29) para ŵagowokereka zakwananga zawo. Ntheura Yehova wakuŵawona kuti mbarunji.—Ro 5:1, 2; 8:33; Heb 10:16, 17.