Kawezgerepo Dankha Mtende na Mubali Wako

Jitorani kuti mukaŵako ku Galileya pa nyengo iyo Yesu wakaŵa pa charu chapasi. Ndipo zuŵa linyake mwaluta ku Yerusalemu ku Chiphikiro cha Visakasa. Msumba wose wazura na ŵasopi ŵanyinu awo ŵafuma kutali. Mukukhumba kuti mupeleke chawanangwa chinu kwa Yehova. Ntheura mwanyamura mbuzi yinu, ndipo mukujumpha mu gulu la ŵanthu kuluta ku tempile. Mwati mwafika pa tempile, mukusanga pali ŵanthu ŵanandi awo nawo ŵakukhumba kupeleka sembe zawo. Mwati mwalindizga, nyengo yinu yakupelekera sembe yakwana. Pa nyengo iyi mukukumbuka kuti mubali winu, uyo wakwenera kuti wali mukatikati mu gulu la ŵanthu panji uko mwafuma wali namwe na kafukwa. Para vyaŵa nthena, Yesu wakalongosora ivyo mukwenera kuchita. (Ŵazgani Mateyu 5:24.) Kasi imwe na mubali winu mungachita wuli kuti muŵe pa mtende nga umo Yesu wakayowoyera? Pasi apa, chongani ilo ni zgoro lakwenelera.

MUKWENERA . . .

• kudumbiskana na mubali winu pekha para mukuwona kuti pali vifukwa vyakupulikikwa vyakuti wakhuŵalire

• kumuphalira mubali winu para mukuwona kuti wali na suzgo la kukhuŵara luŵiro panji para mukuwona kuti mose mukabudiska

• kutegherezga mwakuzikira para mubali winu wakulongosora, nanga ni para mundapulikiske, mukwenera kumuphepiska nipera chifukwa chakumukhuŵazga.

MUBALI WINU WAKWENERA . . .

• kuphalira ŵanyake mu mpingo kuti muli kumubudira na kuŵapempha kuti ŵamovwirani

• kukwiya na kulongosora kalikose ako muli kubudiska, ndipo imwe mukwenera kuzomera ubudi winu

• kumanya kuti pakukhumbikwa kujiyuyura na chikanga kuti imwe mukumane nayo na kumugowokera na mtima wose

Nangauli sono tikupeleka sembe za nyama yayi, kweni kasi ivyo Yesu wakasambizganga vikutovwira wuli kumanya kuti ubwezi withu na Chiuta ukukhwaskika para tili na kafukwa na mubali withu?