Upharazgi Wapadera mu Novembala Wakuphalira Ŵanthu vya Ufumu wa Chiuta

Yesu wakapharazganga “makani ghawemi gha Ufumu wa Chiuta.” (Lu 4:43) Wakasambizgaso ŵanthu kuti ŵalombenge vya Ufumu uwu. (Mt 6:9, 10) Mu mwezi wa Novembala, tiŵikengepo mtima chomene kuphalirako ŵanthu vya Ufumu wa Chiuta. (Mt 24:14) Nozgani makora ndondomeko yinu mwakuti muzakachiteko mwakukwana upharazgi uwu. Wose awo ŵakukhumba kuzakachitako upayiniya wakanyengo, ŵangasankha wa maora 30 panji 50 mu mwezi uwu.

Muzakayezgeyezge chomene kuphalirako ŵanthu ŵanandi lemba ilo likuyowoya vya Ufumu wa Chiuta mu chigaŵa chinu. Para mukusankha lemba lakuti muŵazge, ghanaghaniraniso vya chisopa cha munthu uyo mukumupharazgira. Para munthu munyake walongora kunweka paulendo wakwamba, mupani Gongwe la Mulinda la Na. 2 2020. Pamanyuma muzakawelereko mwaluŵiro kwa munthu uyo, ndipo muzakayezgeyezge kwambiska sambiro la Baibolo mwakugwiliskira ntchito mabuku agho tikusambizgira ŵanthu Baibolo. Sonosono apa, Ufumu wa Chiuta uparanyenge maboma ghose agho ghakususkana nawo. (Da 2:44; 1Ko 15:24, 25) Ntheura, tiyeni tigwiliskire ntchito mwaŵi uwu kuti tilongore kuti ndise ŵakugomezgeka kwa Yehova na Ufumu wake.