Maliferensi gha Uteŵeti na Umoyo Wachikhristu—Kabuku ka Maungano

Maliferensi gha Uteŵeti na Umoyo Wachikhristu—Kabuku ka Maungano

JANYUWALE 1-7

MAZGU GHA CHIUTA MBUSAMBAZI | YOBU 32-33

Pembuzgani Awo Ŵakusuzgika Maghanoghano

it-1-E 710

Elihu

Elihu wakatemweranga yayi, kweniso wakamyamyatikanga waliyose yayi panji kuti kumbumbulika. Wakamanyanga kuti iyo nga ni Yobu, wose ŵakapangika kufuma ku fuvu, ndipo wakamanyangaso kuti Wankhongonozose ndiyo ni Mlengi wake. Elihu wakaŵavya maghanoghano ghakumofya Yobu apo wakayowoyanga nayo, kweni wakayowoya nayo nga mubwezi uyo wakamutemwanga. Apo wakayowoyanga nayo wakamuzunura zina lake, mwakupambanako na ivyo ŵakachita ŵapusikizgi ŵatatu ŵara Elifazi, Bilidadi, na Zofari.—Yob 32:21, 22; 33:1, 6.

JANYUWALE 15-21

Ivyo Tasambira

it-1-E 492

Uthenga

Mu nyengo yakale ŵanthu ŵakatumizganga mauthenga munthowa zakupambanapambana. Kanandi para ŵakukhumba kuyowoya uthenga mu chigaŵa chawo panji mu vigaŵa vyakutali ŵakachitanga kutuma munthu kuti wakayowoye pa mulomo. (2Sa 3:17, 19; Yob 37:20) Ŵanthu awo ŵakaŵanga paulendo nawo ŵakapelekanga uthenga mu malo ghakupambanapambana, para ŵayima kuti ŵasange chakurya, maji panji kugura vinthu vinyake mu misumba kweniso mu malo ghanyake umo ŵakendanga. Charu cha Palestina chikaŵa pa malo ghawemi mwakuti awo ŵakendanga kufuma ku Asia, Africa, na Europe ŵakajumphanga penepapo para ŵakuluta panji kuwera. Ntheura chikaŵa chipusu kuti ŵanthu awo ŵakakhalanga mu Palestina ŵapokere uthenga wakuzirwa wa mu vyaru vinyake. Nkhani zose, za mu charu chawo panji za mu charu chinyake kanandi ŵakazipulikiranga mu msumba na mu misika.

JANYUWALE 22-28

Ivyo Tasambira

it-2-E 222

Mupi wa Dango

Yehova Ni Mupi wa Dango. Yehova ndiyo ni Mupi wa Dango mu chilengiwa chose. Ndiyo wali kuyika malango agho ghakulongozga vinthu vyambura umoyo (Yob 38:4-38; Sa 104:5-19), na vyamoyo vyose. (Yob 39:1-30) Pakuti munthu nayo ntchilengiwa cha Yehova, wakwenera kulondezga malango agho Yehova wali kuŵika mu chilengiwa. Kweniso chifukwa chakuti munthu wali na mahara, wakughanaghana, wangamusopa Chiuta, lekani wakweneraso kulondezga malango gha kakhaliro agho Yehova wali kuŵika. (Ro 12:1; 1Ko 2:14-16) Mwakusazgirapo, Yehova wali kupelekaso malango ku vilengiwa vyake vyauzimu nga ŵangelo.—Sa 103:20; 2Pe 2:4, 11.

Munthu wangaswa yayi malango gha Yehova agho ghakulongozga chilengiwa. (Yer 33:20, 21) Malango agho Yehova wali kuŵika mu chilengiwa ghakusinthasintha yayi kweniso ngakugomezgeka. Ndipo ŵasayansi awo ŵakumanya makora umo malango agha ghakwendera, ghakuŵawovwira kuti ŵawone umo mwezi ukwendera, mapulaneti, vipingausiku kweniso vinthu vinyake vyakuchanya, ndipo ŵangamanya umo vikwendera kwambura kubudiska. Para munyake wangachita vinthu kwambura kulondezga malango agho ghakulongozga chilengiwa nyengo yeneyiyo wangasangana na masuzgo. Mwakuyana waka, usange munthu wangaleka kulondezga malango gha kakhaliro gha Chiuta wangasangana na masuzgo ghakuru. Munthu wangasangana na masuzgo nga umo vikuŵira para waswa malango ghakulongozga chilengiwa, nangauli masuzgo agha ghangiza nyengo yeneyiyo yayi. “Chiuta wakupusikika yayi. Chifukwa icho munthu wakuseŵa, ndicho wakuvuna.”—Ga 6:7; 1Ti 5:24.

JANYUWALE 29–FEBULUWALE 4

Ivyo Tasambira

it-2-E 808

Kunyozeka

Yobu wakaŵa murunji ndipo wakalutilira kuŵa wambura kafukwa nangauli ŵanji ŵakamunyozanga. Kweni wakamba kuwona vinthu mwambura kwenelera ndipo wakabudiska, ivyo vikapangiska kuti wawovwirike. Ndipo Elihu wakati: “Kasi ni munthu nju wakuyana na Yobu, mweneuyo wakumwa muyuyuro nga ni maji?” (Yob 34:7) Yobu wakamba kujighanaghanira chomene iyomwene m’malo mwa Chiuta, ndipo wakamba kujiwona kuti iyo ni murunji chomene kuluska Chiuta. (Yob 35:2; 36:24) Apo ŵabwezi ŵake ŵatatu “ŵapusikizgi” ŵakamunyozanga chomene, Yobu wakajiwonanga nga kuti ŵakanyozanga waka iyo m’malo mwa kuwona kuti ŵakanyozanga Chiuta. Apa Yobu wakaŵa nga ni munthu uyo wakumwa muyuyuro na kunyozeka nga ni maji agho wakamwanga kuti wakusangwa nagho. Paumaliro Chiuta wakamulongosolera Yobu kuti mautesi agho ŵakamuyowoyeranga iyo ŵakayowoyeranga iyo yayi, kweni ŵakayowoyeranga Chiuta. (Yob 42:7) Mwakuyana waka, apo Ŵaisrayeli ŵakakhumbanga themba, Yehova wakaphalira ntchimi Samuyeli kuti: “Ŵakana iwe chara, kweni ŵakana ine kuŵa themba lawo.” (1Sa 8:7) Ndipo Yesu wakaphalira ŵasambiri ŵake kuti: “Muzamutinkhika na mitundu yose [chifukwa cha zina linu yayi, kweni] chifukwa cha zina lane.” (Mt 24:9) Para Mkhristu wakukumbukira fundo izi, vimovwirenge kulutilira kuzizipizga para wakunyozeka, waŵenge na maghanoghano ghakwenelera ndipo waŵenge wakwenelera kuzakapokera njombe chifukwa cha kuzizipizga kwake.—Lu 6:22, 23.

FEBULUWALE 5-11

Ivyo Tasambira

it-1-E 425

Mwelero

Ni viswaswa ivyo vikusangika pamanyuma pa kupwantha balere panji tirigu. Nangauli mazgu agha mu Baibolo nyengo zinyake ghakwimira waka chinthu chinyake, kweni ghakulongora waka ivyo ŵanthu mu nyengo yakale ŵakachitanga para ŵakupwantha tirigu panji balere. Pamanyuma pakuti ŵapwantha tirigu panji balere, mwelero ukaŵanga na ntchito yayi, ndipo nyengo zinandi ŵakawutayanga waka. Lekani Baibolo likuyaniska vinthu vyambura ntchito kweniso viheni na mwelero, vinthu ivyo vikwenera waka kutayika.

Chakwamba, ŵakapwanthanga balere panji tirigu kuti mwelero ufumeko. Pamanyuma ŵakatoranga vira ŵapwantha na kuviwuluska, ndipo mwelero ukafumangako nga ni umo fuvu likunyamulikira na mphepo. (Wonani WINNOWING.) Ivi vikulongora waka umo Yehova Chiuta wakuchitira pakuwuskapo ŵakugaluka pakati pa ŵanthu ŵake kweniso umo wakutayira ŵanthu ŵaheni na mitundu iyo yikuŵasuska. (Yob 21:18; Sa 1:4; 35:5; Yes 17:13; 29:5; 41:15; Ho 13:3) Ufumu wa Chiuta uzamuteketa ŵalwani ŵake wose kuŵa tunthu tuchokotuchoko, ichi chizamupangiska kuti chiŵe chipusu kuti ŵawuluke nga ni mwelero.—Da 2:35.

Nyengo zinandi para ŵapwantha tirigu panji balere, mwelero wakawuwunjikanga pamoza na kuwuwotcha kuti uleke kuputa na kuwulukiraso ku mbewu. Mwakuyana waka, Yohane Mubatizi wakayowoyerathu za kuwotcheka na kuparanyika kwa chisopa chautesi. Yesu Khristu, uyo wakwimira wakupwantha, wazamuwunjika tirigu, “kweni mwelero wazamuwuwotcha na moto wambura kuzimwika.”—Mt 3:7-12; Lu 3:17; wonani THRESHING.

FEBULUWALE 12-18

Ivyo Tasambira

it-1-E 995

Dindi

Pa Ŵaroma 3:13 mpositole Paulosi wakakora mazgu agho ghali pa Salimo 5:9, agho ghakuyaniska chigolomiro cha ŵaheni ndiposo awo ŵakuyowoya upusikizgi na “dindi lakujulika.” Nga ni umo dindi ilo lajulika likuzulira na ŵakufwa kweniso vyakuvunda, vigolomiro vyawo ni vyakujulika kuti viyowoye mazgu ghakukoma na ghakuvunda.—Yaniskani na Mt 15:18-20.

FEBULUWALE 19-25

Ivyo Tasambira

it-1-E 832

Munwe

Mwakuyelezgera, Chiuta wakulongosoreka kuti wakamalizga milimo yose na “munwe,” wake nga nkhulemba Malango 10 pa malibwe ghapapati (Ek 31:18; Do 9:10), kuchita minthondwe (Ek 8:18, 19), kweniso kulenga kuchanya (Sa 8:3). “Munwe” wa Chiuta apa ukwimira mzimu utuŵa panji nkhongono, uwo Yehova wakagwiliskira ntchito pakulenga vinthu. Tikumanya fundo iyi para tikuŵazga buku la Genizesi, ilo likulongosora ivyo Chiuta wakachita pakulenga. Buku ili likulongosora kuti mzimu wa Chiuta (ruʹach, “spirit”) ukendendekanga pachanya pa maji. (Ge 1:2) Ndipouli, Malemba Ghachigiriki ghakutovwira kupulilikiska ivyo mazgu agha ghakung’anamura. Buku la Mateyu likutiphalira kuti Yesu wakafumiska viŵanda na ‘mzimu utuŵa wa Chiuta’ ndipo buku la Luka likutiphalira kuti wakachita ivi na “munwe wa Chiuta.”—Mt 12:28; Lu 11:20.