Kasi Lurombo Lungamovwirani Wuli?

Apo Pamela wakalwara nthenda ya kansa, wakapenja wovwiri wapadera ku chipatala. Ndipouli wakalombaso kwa Chiuta kuti wamupe nkhongono kuti wazizipizge suzgo ili. Kasi lurombo lukamovwira?

Pamela wakuti: “Apo nkhapokeranga wovwiri, kanandi nkhaŵanga na wofi. Kweni para nalomba kwa Chiuta, mtima wane ukazikanga na kwamba kughanaghana makora. Nangauli nichali kupulika vyakuŵinya vikuru, kweni lurombo lukunovwira kuti niwonenge vinthu mwakwenelera pa suzgo lane. Para ŵanthu ŵakunifumba umo nkhujipulikira, nkhuŵaphaliranga kuti, ‘nkhujipulika makora yayi, kweni nili wakukondwa!’”

Kweni tikwenera kulindilira kuti tirwale dankha yayi panji kusangana na masuzgo ghanyake ndipo tambenge kulomba. Tose tikukumana na masuzgo, ghakuru panji ghachoko, ndipo kanandi tikukhumbikwira wovwiri kuti tilimbane na masuzgo agha. Kasi lurombo lungatowvira?

Baibolo likuti: “Katundu wako umuthwikiske Yehova, ndipo wakovwirenge. Wazomerezgenge chara kuti murunji wawe.” (Salimo 55:22) Agha ni mazgu ghakukhozga chomene! Ntheura kasi lurombo lungamovwirani wuli? Para mukulomba kwa Chiuta munthowa yakwenelera, iyo wazamumupani ivyo mukukhumbikwira kuti mumarane na masuzgo ghinu.—Wonani bokosi la mutu wakuti: “Umo Lurombo Lungamovwilirani.”

Umo Lurombo Lungamovwilirani

Mtende wa mu mtima

“Madandawuro ghinu ghamanyikwe kwa Chiuta. Ndipo mtende wa Chiuta uwo ukuluska maghanoghano ghose, uvikilirenge mitima yinu na maghanoghano ghinu kwizira mwa Khristu Yesu.” (Ŵafilipi 4:6, 7) Para mwamuphalira Chiuta ivyo mukwenjerwa navyo, iyo wamovwiraninge kuti mtima winu ukhazikike na kuchita makora vinthu pa nyengo ya suzgo.

Vinjeru vyakufuma kwa Chiuta

“Usange yumoza wa imwe wakupeleŵera vinjeru, walombenge Chiuta, pakuti iyo wakupeleka mwawanangwa ku wose, nakuti wakutombozga yayi, ndipo vipikenge kwa iyo.” (Yakobe 1:5) Para tasangana na suzgo, kanandi tikusankha makora yayi vinthu. Ntheura para talomba vinjeru, Chiuta wangatikumbuska fundo zinandi zakuzirwa izo zili mu Baibolo.

Kusanga nkhongono na chipembuzgo

“Mu vinthu vyose, nkhusanga nkhongono mwa uyo wakunipa nkhongono.” (Ŵafilipi 4:13) Pakuti Chiuta ngwa Nkhongonozose, iyo wangamupani nkhongono izo mukukhumbikwira kuti mutonde masuzgo panji viyezgo. (Yesaya 40:29) Baibolo likuti Yehova ni “Chiuta wa chisangulusko chose.” Iyo wangatipembuzga “mu suzgo yithu yose.”—2 Ŵakorinte 1:3, 4.

KASI MUKUKHUMBA KUTI MALUROMBO GHINU GHAZGOREKENGE?

Mbunenesko kuti Yehova wakumuchichizgani yayi kuti mulombenge kwa iyo. Kweni chifukwa chakuti ngwachitemwa lekani wakumupemphani kuti mulombenge kwa iyo. (Yeremiya 29:11, 12) Kweni wuli usange mukuwona kuti malurombo ghinu ghakumanyuma ghandazgoreke? Lekani kutaya mtima panji kugongowa. Nyengo zinyake ŵapapi ŵachitemwa ŵakuŵapa nyengo yeneyiyo yayi ŵana ŵawo vinthu ivyo ŵapempha. Iwo nyengo zinyake ŵakuŵa na nthowa yiwemi yakuŵawovwilira. Kweni fundo yambura kususkika njakuti: Ŵapapi ŵachitemwa ŵakovwira ŵana ŵawo.

Yehova Chiuta uyo ni mupapi wachitemwa chomene wakukhumba kumovwirani. Usange mungaŵikapo mtima kulondezga fundo za mu Baibolo izo tadumbiskana, Chiuta wazgorenge malurombo ghinu.—Salimo 34:15; Mateyu 7:7-11.