“Sungilirani Maghanoghano Ghinu, Muŵe Maso!”

1. Kasi Yesu wakaŵaphalira vichi ŵasambiri ŵake pakuyowoya za nyengo yaumaliro, ndipo wakaŵachenjezga vichi?

KWATI kwakhala mazuŵa ghachoko waka pambere Yesu wandafwe, ŵasambiri ŵake ŵanayi ŵakiza kwa iyo na kumufumba kuti: “[Kasi] ntchivichi chizamuŵa chimanyikwiro . . . cha umaliro wa charu?” (Mat. 24:3) Vikulongora kuti ŵasambiri aŵa ŵakafumbanga umo ŵangamanyira apo Yerusalemu na tempile vizamuparanyikira. Pakuzgora, Yesu wakayowoya vya kuparanyika kwa Yerusalemu na tempile pera yayi, kweni wakayowoyaso vya “umaliro wa charu,” agho ni mazuŵa agho tilimo sono. Pakuyowoya za apo umaliro wizirenge, Yesu wakati: “Palije munthu uyo wakumanya vya zuŵa panji ora ilo, nanga mbangelo kuchanya nesi Mwana, kweni Adada pera.” Kufuma apo wakachenjezga ŵasambiri ŵake wose kuti ‘ŵaŵenge maso.’—Mrk. 13:32-37.

2. Chifukwa wuli chikaŵa chakuzirwa kuti Ŵakhristu ŵakwambilira ŵaŵe maso?

² Ŵakhristu Ŵachiyuda mu nyengo yakale ŵakeneranga kulutilira kuŵa maso kuti ŵaponoske umoyo wawo. Yesu wakaphalira ŵalondezgi ŵake ivyo ŵakwenera kuwona kuti ŵamanye usange Yerusalemu na tempile lake vili pafupi kuparanyika. Iyo wakati: “Para mukuwona Yerusalemu wakuzingilizgika na ŵankhondo, penepapo manyani kuti kupasuka kwake kuli pafupi.” Para ŵawona ivi, ŵakeneranga kupulikira chenjezgo la Yesu na ‘kwamba kuchimbilira ku mapiri.’ (Luka 21:20, 21) Awo ŵakapulikira chenjezgo ili ŵakapona apo Ŵaroma ŵakaparanya Yerusalemu.

3. Kasi tidumbiskanenge vichi mu nkhani iyi?

³ Mazuŵa ghano tikukhala mu nyengo yaumaliro wa charu chiheni ichi. Ntheura nase tikwenera kusungilira maghanoghano ghithu na kuŵa maso. Mu nkhani iyi, tiwonenge umo tingachitira mwamahara apo tikuŵa maso na ivyo vikuchitika mu charu ichi, umo tingaŵira maso pa ise taŵene, kweniso umo tingagwiliskira makora ntchito nyengo iyo yakhalako.

CHITANI VINTHU MWAMAHARA APO MUKUWONA VYAKUCHITIKA VYA MU CHARU

4. Chifukwa wuli tikunweka na vinthu ivyo vikuchitika mu charu sono umo vikufiskira uchimi wa mu Baibolo?

⁴ Pali vifukwa viwemi ivyo tikuŵira ŵakunweka kuwona umo vyakuchitika vya mu charu vikufiskira uchimi wa mu Baibolo. Mwachiyelezgero, Yesu wakayowoya vinthu ivyo vizamutovwira kumanya kuti umaliro wa mgonezi wa Satana uwu wasendelera. (Mat. 24:3-14) Mpositole Petrosi wakutichiska kuti tiŵikeko mahara panji kuti tiŵe maso na kufiskika kwa uchimi mwakuti chipulikano chithu chilutilire kuŵa chakukhora. (2 Pet. 1:19-21) Buku laumaliro la mu Baibolo likwamba na mazgu ghakuti: “Uvumbuzi wa Yesu Khristu, uwo Chiuta wakamupa, kuti walongore ŵazga ŵake vinthu ivyo vikwenera kuchitika mwaluŵiro.” (Chivu. 1:1) Ntheura tikunweka chomene na vinthu ivyo vikuchitika mu charu mazuŵa ghano kweniso kumanya umo vikufiskira uchimi unyake wa mu Baibolo. Ndipo nyengo zinyake tikukhumbisiska chomene kudumbiskana na ŵanji za vyakuchitika ivi.

5. Kasi tikwenera kugega vichi, ndipo tikwenera kuchita vichi? (Wonaniso vithuzi.)

⁵ Ndipouli, apo tikudumbiskana vya uchimi wa mu Baibolo, tikwenera kusachizga waka yayi ivyo vichitikenge. Chifukwa wuli? Chifukwa tikukhumba yayi kuyowoya chilichose icho chingapangiska kugaŵikana mu mpingo. Mwachiyelezgero, tingapulika ŵalongozgi ŵa charu ŵakuyowoya umo ŵangamazgira suzgo yinyake na kwiziska bata na mtende. M’malo mwa kwamba kuthandazga kuti fundo iyi yikufiska uchimi wa pa 1 Ŵatesalonika 5:3, tikwenera kumanya fundo izo zalongosoreka mwasonosono. Para ivyo tikuyowoya vikufuma mu mabuku ghithu agho ghakupharazgika na gulu la Yehova, tikovwira kuti mpingo ulutilire kuŵa wakukolerana ‘pakuŵa na kaghanaghaniro kamoza.’—1 Kor. 1:10; 4:6.

6. Kasi tikusambirapo vichi pa lemba la 2 Petrosi 3:11-13?

⁶ Ŵazgani 2 Petrosi 3:11-13. Mpositole Petrosi wakutovwira kuti tikwenera kulutilira kuwona vinthu mwakwenelera apo tikusanda uchimi unyake wa mu Baibolo. Wakutichiska kuti ‘tikumbukenge kuŵapo kwa zuŵa la Yehova.’ Chifukwa wuli? Chifukwa chakuti tikukhumba kuti tisange zuŵa na ora apo Yehova wizirenge na Aramagedoni yayi, kweni tikukhumba kugwiliskira ntchito nyengo iyo yakhalako kuti ‘tiŵe na makhaliro ghatuŵa na kuchita milimo iyo yikulongora kuti tikusopa Chiuta mwakujipeleka.’ (Mat. 24:36; Luka 12:40) Panji tingati, tikukhumba kulutilira kuŵa na nkharo yakunyoloka na kuwoneseska kuti chilichose icho tikuchitira Yehova, ntchifukwa chakuti tikumutemwa. Kweni kuti tichite nthena, tikwenera kuŵa maso pa ise taŵene.

KASI CHIKUNG’ANAMURACHI KUŴA MASO PA TAŴENE?

7. Kasi tikulongora wuli kuti tili maso pa taŵene? (Luka 21:34)

⁷ Padera pakuŵaphalira ŵasambiri ŵake kuti ŵaŵe maso na ivyo vikuchitika mu charu, Yesu wakaŵaphaliraso kuti ŵaŵe maso pa iwoŵene. Fundo iyi wakayiyowoya mwakupulikikwa makora chomene pa chenjezgo ilo lili pa Luka 21:34. (Ŵazgani.) Wonani mazgu gha Yesu ghakuti: “Muŵe maso pa mwaŵene.” (Baibolo la Malemba Ghakupatulika mu Mang’anamuliro gha Charu Chiphya Mateyu—Uvumbuzi) Munthu uyo wali maso pa iyomwene nyengo zose wakuŵa maso na chilichose icho chingananga ubwezi wake na Yehova, ndipo wakuyezgayezga kuchigega. Ntheura, wakujisungilira mu chitemwa cha Chiuta.—Zinth. 22:3; Yuda 20, 21.

8. Kasi mpositole Paulosi wakapeleka ulongozgi wuli ku Ŵakhristu?

⁸ Mpositole Paulosi wakaphalira Ŵakhristu kuti ŵaŵenge maso. Mwachiyelezgero, wakaphalira Ŵakhristu ŵa ku Efeso kuti: “Muŵe maso chomene na umo mukwendera, nga mbambura vinjeru yayi, kweni nga mbanthu ŵavinjeru.” (Efe. 5:15, 16) Satana wakuyezgayezga zuŵa lililose kuti wanange ubwezi withu na Yehova, ntheura Baibolo likutiphalira kuti ‘tilutilire kumanya khumbo la Yehova’ mwakuti tilimbane na njomba zose za Satana.—Efe. 5:17.

9. Kasi tingamanya wuli khumbo la Yehova ilo wali nalo kwa ise?

⁹ Baibolo likutiphalira vyose yayi ivyo vingananga ubwezi withu na Yehova. Kweni kanandi tikukhumbikwira kusankha vinthu pa nkhani yinyake iyo yindayowoyeke mwakudunjika mu Malemba. Ntheura kuti tisankhe mwamahara, tikwenera kumanya “khumbo la Yehova.” Tingachita nthena para nyengo zose tikusambira Mazgu gha Chiuta na kughanaghanirapo. Para tikulutilira kumanya makora khumbo la Yehova na kuŵa na “maghanoghano gha Khristu,” ntchakuwonekerathu kuti tendenge “nga mbanthu ŵavinjeru,” nanga pangaŵa kuti palije malango ghakudunjika agho ghakutiphalira chakuchita. (1 Kor. 2:14-16) Nyengo zinyake chikuŵa chipusu kumanya ivyo tikwenera kugega, kweni nyengo zinyake chikuŵa chipusu yayi.

10. Kasi ni vinthu wuli vyakofya ivyo tikwenera kugega?

¹⁰ Vinthu vinyake ivyo tikwenera kugega, nkhuphotokerana na munthu uyo ni mfumu panji muwoli withu yayi, kumwa chomene, kukwiya mwakujumphizga, kayowoyero kaheni, mendezgano ghaheni, kweniso kuwonelera vinthu vyankhaza, vyamuziro, na vinyake vyakuyanako na ivi. (Sal. 101:3) Mulwani withu, Dyabulosi, wakulutilira kupenja mipata kuti wanange ubwezi withu na Yehova. (1 Pet. 5:8) Para tili maso yayi, Satana wangapanda mu maghanoghano ghithu mtima wa sanji, ukhuluku, uryezi, thinkho, ukali, na kusunga vyakusingo. (Gal. 5:19-21) Pakwamba, tingaghanaghana kuti vinthu ivi ni vyakofya viŵi yayi. Kweni para tikuchitapo kanthu mwaluŵiro yayi, vingalutilira kukura nga ni thondo ilo likunanga mbuto.—Yak. 1:14, 15.

11. Kasi ntchinthu wuli chinyake chakofya icho tikwenera kugega, ndipo chifukwa wuli?

¹¹ Chinthu chinyake chakofya chomene icho tikwenera kugega ni mendezgano ghaheni. Wonani chiyelezgero ichi. Tiyelezgere kuti mukugwira ntchito na munthu uyo ni Kaboni wa Yehova yayi. Mukukhumba kuti uyo mukugwira nayo ntchito waghanaghanenge viwemi vya Ŵakaboni ŵa Yehova, ndipo mukumulongora lusungu na kumovwira. Nyengo zinyake mukulyera lumoza chakurya cha muhanya na munthu uyu. Kweni pamanyuma mukwamba kulyera lumoza chakurya kanandi waka. Ndipo para mukuchezga nyengo zinyake wakuyowoya nkhani zawakawaka, izo imwe pakwamba mukuyezgayezga kusulako waka. Kweni pamanyuma, mukwamba kuzgoŵerana nazo nkhani izi ndipo mukukhuŵaraso nazo yayi. Mbwenu zuŵa linyake, munyinu uyu wakumuchemani kuti mukamwere lumoza vyakumwa vyakuzizimiska kusingo para mwaŵeruka ku ntchito, ndipo imwe mukuzomera. Pamanyuma, mukwamba kuwona kuti namwe mwamba kughanaghana nga munyinu uyu. Para vyaŵa nthena ntchipusu kuti namwe mwambe kuchita vinthu nga munyinu wa ku ntchito uyu. Mbunenesko kuti tikwenera kuchindika na kulongora lusungu ŵanthu wose, kweni tikweneraso kukumbuka kuti kanandi tikutolera nkharo ya ŵanthu awo tikutemwa kuchezga nawo. (1 Kor. 15:33) Para tikuŵa maso pa taŵene, nga umo Yesu wakatichiskira, tigegenge kuchezga chomene na ŵanthu awo ŵakwendera fundo za Yehova yayi. (2 Kor. 6:15) Ndipo tiwonenge ulwani uwo ulipo na kuwugega.

MUGWILISKIRENGE NTCHITO MAKORA NYENGO YINU

12. Kasi ŵasambiri ŵa Yesu ŵakachitanga vichi apo ŵakalindiliranga nyengo iyo Yerusalemu na tempile lake viparanyikirenge?

¹² Ŵasambiri ŵa Yesu ŵakakhalanga waka yayi apo ŵakalindiliranga nyengo iyo Yerusalemu na tempile lake viparanyikirenge. Yesu wakaŵapa mulimo wakuti ŵachitenge. Wakaŵaphalira kuti ŵapharazge makani ghawemi “mu Yerusalemu, mu Yudeya mose na Samariya, na ku vigaŵa vyakutali chomene vya charu chapasi.” (Mil. 1:6-8) Uwu ukaŵa mulimo ukuru chomene. Iwo ŵakachita mulimo uwu na mtima wose ndipo ŵakagwiliskira ntchito makora nyengo yawo.

13. Chifukwa wuli tikwenera kugwiliskira ntchito makora nyengo yithu? (Ŵakolose 4:5)

¹³ Ŵazgani Ŵakolose 4:5. Kuti tiŵe maso pa taŵene, tikwenera kughanaghanirapo chomene pa umo tikugwiliskira ntchito nyengo yithu. “Vyakuchitika vyamabuchi” vingawira waliyose. (Muph. 9:11) Tingafwa mwamabuchi.

14-15. Kasi tingachita wuli kuti tigwiliskirenge ntchito makora nyengo yithu? (Ŵahebere 6:11, 12) (Wonani chithuzi.)

¹⁴ Tingagwiliskira ntchito makora nyengo yithu para tikuchita khumbo la Yehova na kukhozga ubwezi withu na iyo. (Yoh. 14:21) Tikwenera kuŵa ‘ŵakukhora, ŵambura kusunkhunyika, kweniso nyengo zose tiŵe na vyakuchita vinandi mu mulimo wa Fumu.’ (1 Kor. 15:58) Para umaliro wafika, kwali ngwa umoyo withu panji wa charu chiheni ichi, tizamudandawurapo yayi kuti mphanyi tikamuchitira vinandi Yehova.—Mat. 24:13; Rom. 14:8.

¹⁵ Mazuŵa ghano, Yesu wakulutilira kulongozga ŵasambiri ŵake apo ŵakupharazga uthenga wa Ufumu wa Chiuta pa charu chose. Ndipo Yesu wafiska nadi layizgo lake ili. Kwizira mu gulu la Yehova, Yesu wakutisambizga umo tingapharazgira, kweniso wakutipa ivyo tikugwiliskira ntchito pakupharazga makani ghawemi. (Mat. 28:18-20) Tikuchita ivyo Yesu wakukhumba, para tikuŵikapo mtima pa mulimo wakupharazga na kusambizga, kweniso para tikuŵa maso apo tikulindilira Yehova kuti waparanye charu chiheni ichi. Para tilondezgenge ulongozgi wa pa Ŵahebere 6:11, 12, tikoleskenge chigomezgo chithu “m’paka paumaliro.”—Ŵazgani.

16. Kasi taŵikapo mtima kuchitachi?

¹⁶ Yehova wali kuŵika kale zuŵa na ora apo wazamuparanyira mgonezi wa Satana uwu. Para zuŵa ili lafika, Yehova wazamufiska mauchimi ghose agho ghali mu Mazgu ghake. Kweni nyengo zinyake tingawona nga umaliro wizenge sonosono yayi. Ndipouli, zuŵa la Yehova “lichedwenge yayi!” (Hab. 2:3) Ntheura mphanyi taŵikapo mtima ‘kulutilira kulaŵiska kwa Yehova, na kulindilira waka Chiuta wa chiponosko chithu.’—Mika 7:7.