NKHANI YAKUSAMBIRA 23
Lutilirani Kusonkhezga Kuti “Dimi la Ya” Lileke Kuzimwa
“Madimi [gha chitemwa] ni moto wakugolera, dimi la Ya.”—SUMU. 8:6.
SUMU 131 “Icho Chiuta Wagumanya Pamoza”
IVYO VILI MU NKHANI IYIa
1. Kasi Baibolo likuchilongosora wuli chitemwa chanadi?
“MADIMI [gha chitemwa] ni moto wakugolera, dimi la Ya. Maji ghakututuka ghangazimwa yayi chitemwa, nanga ni milonga yingachikukura yayi.”b (Sumu. 8:6, 7) Lemba ili likulongosora makora chomene umo chitemwa chanadi chiliri! Mazgu agha ghakusimikizgira awo ŵali mu nthengwa kuti, ŵangafiska kutemwana zanadi.
2. Kasi ŵakutorana ŵakwenera kuchita vichi kuti chitemwa chawo chileke kuzizima?
2 Kuti ŵakutorana ŵalutilire kutemwana umoyo wawo wose, waliyose wakwenera kuyezgayezga kuti chitemwa chileke kuzizima. Kuti tipulikiske, tiyeni tighanaghanire za moto. Moto ungalutilira kugolera chikuru pali munthu wakuwusonkhezga. Kweni para munthu waleka kusonkhezga, moto ukuzimwa. Mwakuyana waka, chitemwa cha pakati pa mfumu na muwoli chingalutilira kuŵa chankhongono pekha para ŵenecho ŵakukhozga ubwezi wawo. Nyengo zinyake ŵakutorana ŵangawona kuti chitemwa chawo chamba kuzizima, chomenechomene para ŵasangana na suzgo la vya ndalama, ulwari, panji kulera ŵana. Ntheura usange muli pa nthengwa, kasi mungachita wuli kuti “dimi la Ya” lileke kuzimwa mu nthengwa yinu? Mu nkhani iyi, tidumbiskanenge vinthu vitatu ivyo vingamovwirani kuti ubwezi winu ulutilire kuŵa wakukhora, kweniso kuti mukhalenge mwakukondwa mu nthengwa yinu.c
LUTILIRANI KUKHOZGA UBWEZI WINU NA YEHOVA
Nga ni Yosefe na Mariya, ŵakutorana ŵakwenera kuŵa paubwezi wakukhora na Yehova (Wonani ndime 3)
3. Kasi para ŵakutorana ŵali paubwezi wakukhora na Yehova, vingawovwira wuli kuti chitemwa chawo chilutilire kugolera? (Mupharazgi 4:12) (Wonaniso chithuzi.)
3 Kuti “dimi la Ya” lileke kuzimwa, mfumu na muwoli, wose ŵakwenera kuyezgayezga kuŵa paubwezi wakukhora na Yehova. Kasi kuŵa paubwezi wakukhora na Yehova kungawovwira wuli nthengwa yawo? Para ŵakutorana ŵakuzirwiska ubwezi wawo na Yehova, vikovwira kuti ŵalondezgenge fundo zake. Ndipo ivi vikovwiraso kuti ŵagege panji kulimbana na masuzgo agho ghangapangiska kuti chitemwa chawo chizizime. (Ŵazgani Mupharazgi 4:12.) Ŵanthu ŵakukhwima mwauzimu ŵakuyezgayezgaso chomene kuyezga Yehova na kuŵa na mikhaliro iyo wali nayo nga ni lusungu, kuzikira na kugowoka. (Efe. 4:32–5:1) Ŵakutorana awo ŵali na mikhaliro iyi chikuŵa chipusu kuti chitemwa chawo chikure. Mudumbu munyake zina lake Lena, uyo wakhala mu nthengwa vyaka vyakujumpha 25 wakayowoya kuti, “Ntchipusu kutemwa na kuchindika munthu wauzimu.”
4. Chifukwa wuli Yehova wakasankha Yosefe na Mariya kuti ndiwo ŵaŵe ŵapapi ŵa Mesiya?
4 Wonani chiyelezgero cha mu Baibolo ichi. Apo Yehova wakasankhanga mbumba iyo mungazakababikira Mesiya, wakasankha Yosefe na Mariya nangauli kukaŵa ŵanthu ŵanandi ŵa mu mphapu ya Davide. Chifukwa wuli? Chifukwa chakuti wose ŵakaŵa paubwezi wakukhora na Yehova, ndipo Yehova wakamanya kuti mu nthengwa yawo ŵazamumudangizganga iyo pa malo ghakwamba. Kasi ŵakutorana mungasambirako vichi kwa Yosefe na Mariya?
5. Kasi ŵafumu ŵangasambirako vichi kwa Yosefe?
5 Yosefe wakapulikiranga luŵiro ulongozgi wa Yehova, ndipo ivi vikapangiska kuti waŵe mfumu muwemi chomene. Mwachiyelezgero, maulendo pafupifupi ghatatu ghose, wakapokera ulongozgi kwa Chiuta wakukhwaskana na mbumba yake. Ndipo pa maulendo ghose agha, Yosefe wakapulikiranga mwaluŵiro nangauli chikaŵanga chakusuzga. (Mat. 1:20, 24; 2:13-15, 19-21) Chifukwa cha kupulikira ulongozgi wa Chiuta, Yosefe wakamuvikilira Mariya na kumupwelelera. Ghanaghanirani umo vyakuchita vya Yosefe vikwenera kuti vikamuchiskira Mariya kuti wamutemwenge kweniso kumuchindika chomene! Ŵafumu, mungamuyezga Yosefe para mukupenjerezga ulongozgi wa mu Baibolo pa nkhani ya kupwelelera mbumba yinu.d Para mukulondezga ulongozgi uwu, nanga vingaŵa kuti mukukhumbikwira kusintha vinthu vinyake, mukulongora kuti mukumutemwa muwoli winu kweniso mukukhozga nthengwa yinu. Mudumbu munyake wa ku Vanuatu, uyo wakhala mu nthengwa vyaka vyakujumpha 20 wakayowoya kuti: “Para mfumu wane wakupenja ulongozgi wa Yehova na kuwulondezga, nkhumuchindika chomene. Nkhujiwona wakuvikilirika kweniso ivyo wakusankha nkhuvigomezga chomene.”
6. Kasi ŵawoli ŵangasambirako vichi kwa Mariya?
6 Mariya nayo pa iyo yekha wakaŵa paubwezi wakukhora na Yehova. Chipulikano chake chikathembanga waka pa ivyo Yosefe wakachitanga yayi. Wakaghamanyanga makora Malemba. Kweniso wakayezgayezganga kusanga nyengo ya kughanaghanirapo. (Luka 2:19, 51) Chifukwa chakuti Mariya wakaŵa wakukhwima mwauzimu tikukayika yayi kuti wakaŵa muwoli muwemi chomene. Mazuŵa ghano napo, ŵawoli ŵanandi ŵakuyezgayezga kuchita nga ni Mariya. Mwachiyelezgero, mudumbu munyake zina lake Emiko wakayowoya kuti: “Apo nkhaŵa kuti nindatengwe, nkhaŵa na ndondomeko yakukhazikika yakuchitira vinthu vyauzimu. Kweni nati natengwa, pakuti mfumu wane ndiyo wakalombanga na kulongozga pa vinthu vyauzimu, nkhawona kuti chipulikano chane chikamba kuthemba waka pa ivyo mfumu wane wakachitanga. Ntheura nkhawona kuti nane nkhwenera kunyamura nekha katundu wane pa nkhani ya kukhozga ubwezi wane na Yehova. Nkhamba kupatura nyengo ya kuyowoyeskerana na Chiuta wane mu lurombo, kuŵerenga Baibolo, na kughanaghanirapo pa fundo zake.” (Gal. 6:5) Ŵawoli, apo mukulutilira kukhozga ubwezi winu na Yehova, afumu ŵinu ŵaŵenge na vifukwa vinandi vyakumulumbirani kweniso kumutemwerani.—Zinth. 31:30.
7. Kasi mbumba zingasambirako vichi kwa Yosefe na Mariya pa nkhani ya kusopera lumoza?
7 Yosefe na Mariya, ŵakachitirangaso vinthu pamoza kuti ŵakhozge ubwezi wawo na Yehova. Iwo ŵakamanyanga kuti ntchakuzirwa kusopera Yehova lumoza nga mbumba. (Luka 2:22-24, 41; 4:16) Nangauli chikaŵa chipusu yayi kuchita nthena, chomenechomene apo mbumba yawo yikamba kuŵa yikuru, kweni ŵakafiska. Ichi ntchiyelezgero chiwemi chomene ku ŵakutorana mazuŵa ghano. Usange muli na ŵana nga umo vikaŵira kwa Yosefe na Mariya, nyengo zinyake chingaŵa chakusuzga kuluta ku maungano panji kusanga nyengo ya kuchitira sambiro la mbumba. Chingaŵaso chakusuzga chomene kusanga nyengo yakusambilira panji kulombera lumoza nga ni mfumu na muwoli. Kweni kumbukani kuti para mukusopera Yehova pamoza, muŵenge paubwezi uwemi na iyo kweniso namwe mutemwanenge chomene. Ntheura kusopa Yehova ndiko kuŵenge pakwamba pa umoyo winu.
8. Kasi ŵakutorana awo mu nthengwa mwawo muli masuzgo ŵangachita wuli kuti ŵapindurenge chomene na kusopa kwa mbumba?
8 Kweni kasi mungachita wuli usange mu mbumba yinu muli masuzgo? Kuchitira lumoza kusopa kwa mbumba kungaŵa kwakusuzga. Usange ni nthena, mungamba dankha kusambira kwanyengo yichoko waka kweniso mungasankha vinthu ivyo mose mungakondwa navyo. Kuchita nthena kovwirenge kuti mwambe kutemwana chomene kweniso mukhumbenge chomene kuchitira lumoza vinthu vyauzimu.
MUSANGENGE NYENGO YAKUCHEZGERA
9. Chifukwa wuli mfumu na muwoli ŵakwenera kusanga nyengo yakuchezgera?
9 Ŵakutorana, chitemwa chinu chingalutilira kugolera para mukusanga nyengo yakuchezgera lumoza. Kuchita nthena kumovwiraninge kumanya ivyo munyinu wakughanaghana kweniso umo wakujipulikira. (Gen. 2:24) Wonani ivyo Lilia na Ruslan ŵakawona ŵati ŵatorana waka, vyaka 15 ivyo vyajumpha. Lilia wakati: “Tikawona kuti tikaŵavya nyengo yinandi yakuchitira vinthu lumoza nga umo tikakhazgiranga. Kanandi tikatangwanikanga na ntchito yakulembeka, ntchito za pa nyumba, kweniso pamanyuma tikamba kutangwanika na kupwelelera ŵana. Tikawona kuti para tingaleka kuchitapo kanthu kuti tisangenge nyengo yakuchezgera nga mbumba chitemwa chithu chizizimenge.”
10. Kasi ŵakutorana ŵangalondezga wuli ulongozgi wa pa Ŵaefeso 5:15, 16?
10 Kasi ŵakutorana ŵangachita wuli kuti ŵasangenge nyengo yakuchezgera? Nyengo zinyake mungakhumbikwira kuchita kupatura nyengo yakuti muchezgenge. (Ŵazgani Ŵaefeso 5:15, 16.) Mubali munyake wa ku Nigeria zina lake Uzondu wakuti: “Para nkhupanga ndondomeko ya vinthu ivyo nichitenge, nkhusazgapo na nyengo yakuchezgera na muwoli wane, ndipo nkhuwoneseska kuti nyengo iyo yileke kutimbanizgika.” (Fil. 1:10) Wonani umo Anastasia, muwoli wa mulaŵiliri wa dera, wa ku Moldova, wakuchitira kuti wagwiliskirenge ntchito makora nyengo yake. Iyo wakuti: “Nkhuyezgayezga kuti ntchito zane nigwilirengethu pa nyengo iyo mfumu wane nayo wakugwira ntchito zake. Ivi vikovwira kuti pamanyuma tose tiŵenge na nyengo yakuchezgera lumoza.” Kweni wuli usange mukutangwanika chomene mwakuti chikuŵa chakusuzga kusanga nyengo yakuchezgera?
Kasi ni vichi ivyo mungachitira lumoza nga mbumba? (Wonani ndime 11-12)
11. Kasi Prisika na Akwila ŵakachitiranga lumoza vichi?
11 Ŵakutorana ŵangasambirako kwa Prisika na Akwila, mbumba iyo Ŵakhristu ŵanandi ŵakwambilira ŵakayichindikanga chomene. (Rom. 16:3, 4) Nangauli Baibolo likuyowoya vinandi yayi vya mbumba iyi, kweni likulongora kuti ŵakagwiliranga ntchito lumoza, kupharazgira lumoza, kweniso kovwira ŵanji lumoza. (Mil. 18:2, 3, 24-26) Nakuti palipose apo Baibolo likuyowoya vya Prisika na Akwila, likuzunura wose lumoza.
12. Kasi mfumu na muwoli ŵangachita wuli kuti ŵaŵenge na nyengo yakuchitira vinthu lumoza? (Wonaniso chithuzi.)
12 Kasi mbumba zingasambirako vichi kwa Prisika na Akwila? Ghanaghanirani za ntchito izo imwe na munyinu mukukhumbikwira kugwira. Kasi vingachitika yayi kuti ntchito zinyake mugwilirenge lumoza, m’malo mwakuti waliyose wagwirenge waka payekhapayekha? Mwachiyelezgero, Prisika na Akwila ŵakapharazgiranga lumoza. Kasi namwe nyengo na nyengo ndimo mukuchitira? Akwila na Prisika ŵakagwilirangaso lumoza ntchito. Nangauli imwe na munyinu wa mu nthengwa mungaŵa kuti mukugwira ntchito zakupambana, kweni kasi mungagwilira lumoza yayi ntchito za panyumba? (Muph. 4:9) Para mukovwirana pakugwira ntchito, mukuŵa ŵakukolerana nga ni timu ya bola, kweniso mukuŵa na mipata yakuyowoya vyakusingo. Robert na Linda ŵakhala mu nthengwa kwa vyaka vyakujumpha 50. Robert wakuti: “Kuyowoya unenesko, tilije nyengo yinandi yakuchitira vyakusanguluska lumoza. Kweni para ine nkhusuka mbale mbwe muwoli wane wakuzipuputa, panji para ine nkhupwelelera dimba mbwe muwoli wane wakunovwirako, nkhukondwa chomene. Kuchitira vinthu lumoza kukutovwira kuti tiŵe ŵakukolerana. Ndipo chitemwa chithu chikulutilira kukura.”
13. Kasi mfumu na muwoli ŵakwenera kuchita vichi kuti ŵaŵe ŵakukolerana zanadi?
13 Kweni kumbukani kuti kuŵira waka lumoza, ni nyengo zose yayi apo kukovwira kuti mfumu na muwoli ŵaŵe ŵakukolerana. Mwanakazi munyake wa ku Brazil wakuti: “Mazuŵa ghano taŵanthu tikutangwanika chomene, mwakuti nyengo zinyake tingawona nga tikuchitira vinthu lumoza chifukwa chakuti waka tikukhala mu nyumba yimoza. Nawona kuti pakukhumbikwa vinandi padera pakuŵira waka lumoza. Pakukhumba kuŵikakoso mahara kwa munyako.” Wonani umo Bruno na muwoli wake, Tays, ŵakuchitira kuti waliyose waŵikengeko mahara kwa munyake. Bruno wakuti: “Pa nyengo yithu yakuchezgera, mafoni tikuŵika kutali mwakuti yaleke kutitimbanizga para tikuchezga.”
14. Kasi ŵakutorana ŵangachita wuli para ŵakutemwa yayi kuchitira vinthu lumoza?
14 Kweni wuli usange imwe na munyinu mukutemwa yayi kuchitira vinthu lumoza? Panji chifukwa chakuti mukutemwa vinthu vyakupambana, panji para muli lumoza mukwambana waka nthena. Kasi mungachita wuli? Ghanaghaniraniso za chiyelezgero cha moto icho tanguchiyowoya kukwambilira. Moto ukwamba kubuka mwankhongono nyengo yeneyiyo yayi. Tikwamba dankha na kuŵikapo tuswatu ndipo paumaliro tingamba kuŵikapo vigodo. Mwakuyana waka, namwe mungamba dankha na kuchitira lumoza vinthu vinyake kwanyengo yichoko waka zuŵa lililose. Woneseskani kuti mwasankha kuchitira lumoza chinthu icho mose mungakondwa nacho, m’malo mwa icho chingakondweska waka yumoza. (Yak. 3:18) Para mungamba na tunthu tuchokotuchoko, paumaliro chitemwa chinu chingaŵaso chankhongono.
MUCHINDIKANENGE
15. Chifukwa wuli kuchindikana nkhwakuzirwa mu nthengwa?
15 Ntchindi ni zakuzirwa chomene mu nthengwa. Zili nga ni mphepo iyo yikovwira kuti moto ubuke chomene. Kwambura mphepo, moto ungalutilira yayi kubuka. Mwakuyana waka, kwambura kuchindikana, chitemwa chingalutilira yayi mu mbumba. Kweni para mfumu na muwoli, waliyose wakuyezgayezga kulongora ntchindi kwa munyake, chitemwa chawo chikulutilira kugolera. Kweni manyani kuti kughanaghana waka kuti mukumuchindika munyinu nkhwakukwana yayi, kweni nayo wakwenera kujipulika kuti mukumuchindika. Penny na Aret ŵakhala mu nthengwa vyaka vyakujumpha 25. Penny wakuti: “Chifukwa chakuti tikuchindikana, tikutemwana chomene. Tose tikuŵa ŵakufwatuka kuyowoya umo tikujipulikira chifukwa tikumanya kuti munyane wachindikenge maghanoghano ghane.” Ntheura kasi mungachita wuli kuti munyinu wawonenge kuti mukumuchindika nadi? Tiyeni tiwone umo ŵakachitiranga Abrahamu na Sara.
Mfumu Wachikhristu wakulongora kuti wakuchindika maghanoghano gha muwoli wake, para wakumutegherezga mwakupwelelera (Wonani ndime 16)
16. Kasi ŵafumu ŵangasambirako vichi kwa Abrahamu? (1 Petrosi 3:7) (Wonaniso chithuzi.)
16 Abrahamu wakamuchindikanga chomene Sara. Para Sara wakuyowoya, iyo wakaŵikangako mahara chomene na kuchindika maghanoghano ghake. Zuŵa linyake Sara wakasuzgika chomene maghanoghano ndipo wakamuphalira Abrahamu umo wakajipulikiranga, kweniso wakati Abrahamu ndiyo wapangiska suzgo. Kasi Abrahamu wakakwiya na kumuzgora mwaukali? Yayi. Abrahamu wakamanyanga kuti Sara ni mwanakazi wakupulikira kweniso wakujilambika. Iyo wakamutegherezga na kudumbiskana nayo kuti ŵamazge suzgo ilo likaŵapo. (Gen. 16:5, 6) Kasi tingasambirako vichi? Ŵafumu, ndimwe muli na udindo wakupanga vyakusankha mu mbumba yinu. (1 Kor. 11:3) Kweni mungalongora chitemwa usange mungapulikako dankha maghanoghano gha muwoli winu pambere mundapange chakusankha, chomenechomene para ivyo musankhenge nayo vimukhwaskenge. (1 Kor. 13:4, 5) Nyengo zinyake muwoli winu wangasuzgika maghanoghano ndipo wangakhumba kumuphalirani umo wakujipulikira. Kasi mukutegherezga mwakupwelelera kulongora kuti mukuchindika maghanoghano ghake? (Ŵazgani 1 Petrosi 3:7.) Angela na Dmitry ŵakhala mu nthengwa vyaka pafupifupi 30. Angela wakulongosora umo mfumu wake wakulongolera kuti wakumuchindika. Iyo wakuti: “Dmitry nyengo zose wakuŵa wakunozgeka kunitegherezga, kwali nakhuŵara kwali nakhumba waka kuti tiyowoyeskanepo. Iyo wakuzikira nane nanga vingaŵa kuti ine nkhuyowoya mwambura kuzikira.”
17. Kasi ŵawoli ŵangasambirako vichi kwa Sara? (1 Petrosi 3:5, 6)
17 Sara wakalongoranga kuti wakumuchindika Abrahamu mwa kukolerana na ivyo wasankha. (Gen. 12:5) Zuŵa linyake Abrahamu wakachema ŵalendo awo ŵakapukwa iyo yayi, kuti ŵarye chakurya. Iyo wakaphalira Sara kuti waleke ivyo wakachitanga na kuphikira ŵalendo vingwa vinandi. (Gen. 18:6) Sara wakakhozgera ivyo Abrahamu wakayowoya, ndipo wakachita mwaluŵiro ivyo wakamuphalira. Ŵawoli, mungamuyezga Sara para mukukhozgera ivyo ŵafumu ŵinu ŵasankha. Para muchitenge nthena, nthengwa yinu yiŵenge yakukhora. (Ŵazgani 1 Petrosi 3:5, 6.) Dmitry, uyo tamuzunura mu ndime iyo yajumpha, wakulongosora umo muwoli wake wakulongolera kuti wakumuchindika. Iyo wakuti: “Nkhumuwonga chomene Angela chifukwa wakuyezgayezga kukhozgera ivyo nasankha, nanga vingaŵa kuti wakukolerana navyo yayi. Nanga ni para ivyo nasankha vindayende makora, iyo wakuninena yayi.” Nadi, ntchipusu chomene kutemwa munthu uyo wakukuchindika.
18. Kasi pakuŵa uwemi wuli para ŵakutorana ŵakulutilira kutemwana mu nthengwa yawo?
18 Mazuŵa ghano, Satana wakuŵikapo mtima kuti Ŵakhristu ŵaleke kutemwana mu nthengwa zawo. Iyo wakumanya kuti para ŵaleka kutemwana, chingaŵa chipusu kwamba kupatukako kwa Yehova. Ndipouli, chitemwa chanadi chikumara yayi! Ntheura yezgayezgani kuti chitemwa cha mu nthengwa yinu chiŵe nga icho chikuyowoyeka mu Sumu ya Solomoni. Ŵikanipo mtima kuti nyengo zose mudangizgenge Yehova mu nthengwa yinu, musangenge nyengo yakuchezgera, kweniso muchindikenge maghanoghano na vyakukhumba vya munyinu. Usange muchitenge nthena, nthengwa yinu yipelekenge uchindami kwa Yehova, uyo ni Mweneko wa chitemwa chanadi. Kweniso chitemwa chinu chizizimenge yayi, chiŵenge chakugolera nga ni moto uwo ŵakuwusonkhezga.
SUMU 132 Sono Tili Thupi Limoza
a Yehova wali kupa ŵanthu chawanangwa cha nthengwa, icho chikupeleka mwaŵi kwa mfumu na muwoli kuti ŵakondwenge na chitemwa chapadera. Ndipouli, nyengo zinyake chitemwa ichi chingazizima. Usange muli kunjira mu nthengwa, nkhani iyi yimovwiraninge kuti mulutilire kutemwana na kukhala mwakukondwa mu nthengwa yinu.
b Chitemwa chanadi, icho chikusintha yayi kweniso chikuzizipizga, ndicho chikuchemeka kuti “dimi la Ya” chifukwa Yehova ndiyo ni Mweneko wa chitemwa ichi.
c Nanga vingaŵa kuti munyinu wa mu nthengwa ni Kaboni wa Yehova yayi, masachizgo agha ghangamovwirani kukhozga nthengwa yinu.—1 Kor. 7:12-14; 1 Pet. 3:1, 2.
d Mwachiyelezgero, ghanaghanirani ulongozgi wakovwira uwo uli pa chigaŵa chakuti article series pa kamutu kakuti “Vyakovwira Mabanja,” pa JW Library® kweniso pa chigaŵa chakuti nkhani zakupambanapambana pa kamutu kakuti “Vyakovwira Mabanja,” pa jw.org.