Viwawa Vikumazga Masuzgo Yayi

Ŵanthu ŵanandi mazuŵa ghano ŵakuwona kuti viwawa vingamazga masuzgo. Kweni ivi ndivyo Yesu Khristu wakasambizganga yayi panji kuchita. Wonani vinyake ivyo Yesu wakasambizga kweniso kuchita.

Ivyo Yesu wakayowoya

Pa Upharazgi wake wa pa Phiri uwo ngwakumanyikwa makora, Yesu wakasambizga kuti ukali, nkhaza, na viwawa vingamazga yayi kuleka kukolerana. Wonani viyelezgero vichoko waka ivi.

• “Vinthu vyose . . . ivyo mukukhumba kuti ŵanthu ŵamuchitiraninge, ndivyo namwe muŵachitirenge.” (Mateyu 7:12; Luka 6:31) Dango ili ilo likumanyikwa kuti Dango Lakuti Muchitenge Ivyo Mukukhumba Kuti Ŵanyinu Ŵamuchitiraninge,a likutichiska kuti tichitenge vinthu na ŵanji umo ise tingakhumbira kuti ŵachitirenge nase. Pakuti palije uyo wakukhumba kuti ŵanthu ŵamuchitirenge vinthu mwankhaza,nase tikwenera kuchita vinthu na ŵanthu wose mwa ntchindi kweniso mwalusungu nanga vingaŵa kuti tikukolerana navyo yayi.

• “Kweni uyo wakupamantha pa thama lako lamalyero, umuzgolereso linyake.” (Mateyu 5:38, 39; Luka 6:29) Apa Yesu wakasambizganga kuti tichitenge kupempha kuti ŵanthu ŵatichitire nkhaza yayi. Kweni, wakasuskanga chisambizgo chakubudika icho ŵalongozgi ŵanyake ŵakasambizganga chakuti kuwezgera nkhwakuzomerezgeka. Wakasambizganga ŵalondezgi ŵake kuti ŵakwenera yayi kuwezgera kweni ŵazgorenge mwakuzika para munyake wakuŵachitira nkhaza.b

• “Lutilirani kutemwa ŵalwani ŵinu.” (Mateyu 5:43, 44; Luka 6:27) Yesu wakasambizga kuti tikwenera kuŵa ŵalusungu ku awo ŵakutitinkha panji ŵakutichitira nkhaza. Kweni wakang’anamuranga kuti tikwenera kuzomerezga viheni ivyo ŵakuchita yayi.c Ndipouli, para tikuŵalongora lusungu ŵanthu awo ŵakutitinkha, vingapangiska kuti ukali wawo utune kweniso panji kuŵapangiska kuti nawo ŵalongoreso lusungu.

Ivyo Yesu wakachita kweniso ivyo wazamuchita

Yesu wakasambizga kuti viwawa vingamazga masuzgo yayi ndipo wakachitanga ivyo wakapharazganga. Pa usiku uwo wakakakikira, yumoza wa ŵalondezgi ŵake wakachita nkhaza kuti wavikilire Yesu, kweni Yesu wakati: “Wezgera lupanga lwako mu malo ghake, pakuti wose awo ŵakukora lupanga ŵafwenge na lupanga.” (Mateyu 26:52) Yesu wakalongora kuti wakatemwanga ŵalwani ŵake mwa kuŵagowokera awo ŵakamuchitira nkhaza nanga nkhuŵalombera.—Luka 23:33, 34; 1 Petrosi 2:23.

Baibolo likulayizga kuti Yesu uyo ni Karonga wa Mtende sonosono apa wazamumazga nkhaza zose. (Yesaya 9:6, 7) Kuti mumanye vinandi vyakukhwaskana na munthazi muwemi ŵazgani nkhani yakuti “Kasi Nkhondo na Viwawa Vizamumara Wuli?.”