Kasi Chiuta Wakukhumba Nichitengechi?

Ivyo Baibolo likuyowoya

Chiuta wakukhumba kuti mumumanye, muŵe nayo paubwezi, mumutemwenge, na kumuteŵetera na mtima wose. (Mateyu 22:37, 38; Yakobe 4:8) Ivyo Yesu wakachita na kusambizga, vingamovwirani kumanya na kuchita khumbo la Chiuta. (Yohane 7:16, 17) Yesu wakasambizganga khumbo la Chiuta, kweniso wakachitanga ivyo wakasambizganga. Iyo wakati: “Nili kukhira kufuma kuchanya kuzakachita khumbo lane chara, kweni khumbo la uyo wakanituma.”—Yohane 6:38.

Kasi nkhwenera kuwona dankha vimanyikwiro, mboniwoni, panji munthondwe unyake kuti nimanye ivyo Chiuta wakukhumba kuti nichitenge?

Yayi, chifukwa Chiuta wakutiphalira ivyo wakukhumba kwizira mu Baibolo. Baibolo likutiphalira ivyo tingachita kuti tiŵe ‘ŵakunozgeka kuchita mulimo uliwose uwemi.’ (2 Timote 3:16, 17) Chiuta wakukhumba kuti mugwiliskirenge ntchito Baibolo na “nkhongono yinu ya kughanaghana” kuti mumanye ivyo wakukhumba.—Ŵaroma 12:1, 2; Ŵaefeso 5:17.

Kasi ningakwaniska kuchita khumbo la Chiuta?

Enya, mungakwaniska, chifukwa Baibolo likuti: “Malango ghake ngazito yayi.” (1 Yohane 5:3) Nyengo zinyake chikuŵa chipusu yayi kulondezga malango gha Chiuta. Kweni para mwaŵikapo mtima kuchita ivyo Chiuta wakukhumba, muzamutumbikika chomene. Yesu wakati: “Ŵakukondwa ni awo ŵakupulika mazgu gha Chiuta na kughasungilira!”—Luka 11:28.